Salmo 126
126
Kararag Ta Manragsak Da Begew Sin Apiten Da
Idi intaolin Diyos ed Jerusalem si dakami,
kaman iitaw si pannemnem mi.
Palalo di siyek ya kanta mi begew si ragsak mi
et nandinamag sin odom ay ili.
Kanan da, “Nakaskasdaaw din inamag Diyos para sin ipogaw na.”
Nakaskasdaaw din inam-amag na
et peteg di ragsak mi tet-ewa.
Yahweh ay Diyos mi, itaolim kod en dakami
din sigod ay dayaw mi,
ay kaman din maamag mo domateng di odan
sin natdok ay ginawang ay wada sin abagatan.
Ipalobos mo koma ta din nan-og-oga sin nanmolaan da
et manragsak da koma sin pan-apitan da.
Din en nan-ibonobon ay nan-og-oga,
ikanta dan to di ragsak da
ay mangisaa sin inapit da.