Salmo 14
14
Din Kinalawan Di Am-in Ay Ipogaw
1 Kanan din naong-ong sin nemnem da,
“Ay siya mo waday Diyos tet-ewa?”
Kadodogis sin pangilan Diyos din lawa ay am-amagen da,
dadlon makadadael din kabibiyag da.
Magay olay esa si kosto di am-amagena.
2 Si Diyos ed langit, os-osdongana di ipogaw isnan daga
ta ilaena mo waday masirib en daida
ay manganap ta ammoan das sisya.
3 Ngem man-iiso da am-in ay lawlawa,
tan din kosto ay danan et tinaynan da.
Magay mangam-amag si kosto, maga di olay esa.
4 Kanan Diyos ay nangibaga,
“Ay daetan pay dana ay mangam-amag si lawa!
Pig-an ngin di pannemneman da?
Din pamalpaligatan da sin ipogaw ko et nalaka en daida
ay kaman din kalakan di mangokmon si kanen da.
Sigaan da abe ay mankararag en sak-en ay Diyos da koma.”
5 Ngem peteg to di kibtot ya egyat da
mo ilaen da ay salakniban Diyos din ipogaw na.
6 Laslasoyen abe din ipogaw ay lawa
din planon di nabibiteg ay magay kowinta na,
ngem si Diyos pay et salaknibanas daida.
7 Sapay koma ta si Yahweh ay manbeey ed Zion sin Timplo na
et isalakana din Israelita ay ipogaw na.
Am-in ay polin Israel et maragsakan da koma
mo ipataolin Diyos din sigod ay kinabaknang da.