Salmo 145
145
Din Kinangato Ya Kinasiged Diyos
1 Sik-a ay Diyos ko ya arik, it-ek kos sik-a,
nan pan-iyamanak en sik-a et magay pap-eng na.
2 Inag-agew ay man-iyamanak en sik-a,
idaydayaw kos sik-a si eng-enggana.
3 Lebbeng na ay madayaw ka ay Yahweh, tan nangato ka od,
din kinangatom et magay makalokod.
4 Din nakaskasdaaw ay inam-amag mo et idaydayaw da
sin amin ay mansinoskat ay ipogaw isnan daga.
5 Idaddad-at da din kinangatom ya dayaw mo,
ipapasnek ko ay nemnemnemen din nakaskasdaaw ay inam-amag mo.
6 Idaddad-at din kaipoipogaw din panakabalin mo,
din kinangatom abe di idaddad-at ko.
7 Kanayon ay ipaammo da din madaydayaw ay kinasiged mo
ya ikanta da din kinalinteg mo.
8 Managseg-ang ka ay Diyos ya naanos ka,
din layad mo et magay balbaliw na.
9 Siged di iyat mo ay Diyos sin amin ay ipogaw mo,
managseg-ang ka sin amin ay parsua ay inamag mo.
10 Amin ay pinarsuam et daydayawen daka,
amin ay ipogaw mo yan man-iyaman dan sik-a.
11-12 Dad-aten dan to din madaydayaw ay turay mo
ya din nakaskasdaaw ay inam-amag mo,
siya abe sin panakabalin mo,
ta ammoan am-in di gagait da
di maipanggep en sik-a.
13 Din panturayam ay Yahweh, magay pap-eng na,
tan ari ka si eng-enggana.
Amin ay karim et sigurado ay tongpalem,
yan maila din seg-ang mo sin amin ay amagem.
14 Din maligligatan et badangam daida,
ya papigsaem din nemnem di madisdismaya.
15 Sik-a di pannamnamaan di amin ay parsua,
et idawat mo sin kosto ay timpo din kanen da.
16 Idawdawat mo din kanen di esa ya esa,
et mangan da enggana ay mabsog da.
17 Sin amin ay amagem, nalinteg ka,
kanayon abe ay managseg-ang ka.
18 Mo way ipogaw ay naimposoan di kararag dan sik-a,
nakasagana ka ay mangidawat sin kedawen da.
19 Idawat mo din kasapolan di mangipateg en sik-a,
dengngem din adawag da et isalakan mos daida.
20 Salaknibam amin ay manglaylayad en sik-a,
ngem dosaem din ipogaw ay lawa.
21 Yahweh ay Diyos ko, it-ek kos sik-a,
et sapay koma ta am-in ay ipogaw isnan daga,
dayawen da din nasantoan ay ngadan mo si eng-enggana.