Salmo 18
18
Kanta Ay Pan-iyaman David Begew Sin Naabakan Di Kaibaw Na
1 Laylaydek si Yahweh ay Diyos ko,
sisyay poon di bikas ko.
2 Maiarig si dakdake ay bato ay enak pankamangan
ono dontog ay enak pantabonan,
tan napigsa ay omisalakan.
Mo wadaak en sisya, magay pan-egyatan.
Kasay ay somalaknib di ena kaiarigan,
kaman aben mayat ay pantabonan
ay adi makasgep di kalaban.
3 Mankedawak si badang Diyos et omisalakan sin kalaban ko.
Lebbeng na ay madayaw si Diyos Apo.
4-5 Din pese yan nangisagana si kaknaak koma ay tagdey.
Kamanak napolipolan si tali ay omigoyod sin kad-an di natey,
kaman omianod ay layos
ono kaeegyat ay dalloyon ay domalapos.
6 Sin palalo ay ligat ko,
kindaw ko din badang Yahweh ay Diyos ko,
et sin Timplo na, dinnge na din adawag ko.
7 Pag manyegyeg ya naikiweg din daga,
din naisaadan di dontog yan nagon-gon da
gapo sin palalo ay bonget na.
8 Bomalbala di asok sin eng na
ya manbidbidang ay apoy sin tepek na.
9 Binokatana ed langit et binmaba,
waday mangitit ay liboo sin dallem di siki na.
10 Binmaba ay nanlogan si kerubim,
napigsa ay tinmayaw babaen sin payak di dagem.
11 Binongona din awak na si bolinget,
naposkol ay liboo ay nanapnos danom di nanlikmot.
12 Waday kimat sin sangoanana,
dalalo ya somilsilap ay apoy di inpawada na,
din mangitit ay liboo yan nilosot da.
13 Si Diyos ay kangatoan et nadnge din kali na,
kaman kido ay mapo ed daya.
14 Inosal na din pana na
et nansisian din kalabana.
Nankimatena et nanagtag da.
15 Din lanad di baybay yan nabonsian da,
siya abe sin naisaadan di daga,
idi inpailan Diyos din palalo ay bonget na.
16 Ed langit ay kad-an Diyos, inadawa nas sak-en,
et kinmay-at sin malosong ay danom.
17 Sin omililiget ay kalaban ko, inmisalakan sisya,
tan nankapipigsa da et magay bael kon daida.
18 Dinmoklos da sin timpon di ligat ko,
ngem wadas Diyos ay salaknib ko.
19 Gapo sin layad nan sak-en, inmisalakan sisya,
et inmiey sin lugar ay nawaya.
20 Binindisyonan Diyos sak-en gapo sin kinalinteg ko,
indawat nay gon-gonak tan magay basol ko.
21 Tan inon-onodak din ogali ay laydena,
yan adiak dinokogan sisya.
22 Tinongtongpal ko din linteg na,
magay nilabsing ko ay bilina.
23 Sin sangoanan Diyos, magay maipabasol en sak-en,
tan inaddawiak di enak panbasolan.
24 Isonga gon-gonaanas sak-en tan nalintegak,
ammo na ay magay binmasolak.
25 Sin ipogaw ay matalek, ipailan Diyos ay matalek sisya,
ipaila na din kinasanto na sin magay kaoyawana.
26 Sin nalinis et maila din kinalinis na,
ngem sin nasikap ay manowitik si ib-a na,
nalaing si Diyos ay mangabak en sisya.
27 Isalakana din napakombaba,
ngem ipababa na din mangipapangatos awak na.
28 Si Yahweh ay Diyos ko di silaw ko,
silawana din mabolinget ay danan ko.
29 Gapo sin badang na, abakek di ad-ado ay kalaban ko,
alad di ili yan makalay-at ko.
30 Sinay ay Diyos yan kostokosto di amagena,
maila ay pag tet-ewa di inbagbaga na.
Sin am-in ay mankamang en sisya,
kaman kasay ay salaknib da.
31 Magay odom ay Diyos mo adi et din Apo.
Magay odom ay pankamangan mo adi et si Diyos tako.
32 Sisya si Diyos ay mangidawdawat si pigsak,
bantayana din pandanak et magay pan-egyatak.
33 Pinapigsa na din sikik et kaman din kapigsan di ogsa,
et olay sin kakayangan ay dontog, adiak maisokba.
34 Din iyat ko ay makigobat yan itdo na
ta say kabaelak ay mangosal si bronsi ay pana.
35 Sinmalaknib ya inmisalakan sisya,
pinmigsaak gapo sin badang na.
Magay pandanagak gapo sin panakabalina.
36 Pinasiged mo din pandanak et inmannawa,
isonga adiak naisokba.
37 Inapayaw ko din kalaban ko ya dinpap kos daida,
adiak sinmaldeng enggana ay namaga da.
38 Adi da nakabangon sin nangtodokak en daida,
sin sangoanak yan naiwalang da.
39 Tan din pigsak ay makigobat yan indawat na,
inabak ko din kalaban ko begew en sisya.
40 Inturong Diyos et din kalaban ko yan tinmagtag da,
din omililiget yan pinsek daida.
41 Nan-adawag da ngem magay binmadang en daida.
Nanpakpakaasi dan Diyos ngem adi na pinatgan kararag da.
42 Minekmek kos daida et nanbalin das kaman lota
ay sin dagem, nalaka ay maitayaw da.
In-gatigatin kos daida ay kaman pitek sin kalsada.
43 Inmisalakan si Diyos sin ipogaw ay kinmonkontra,
sin nanasyon, nanbalinenas sak-en ay pangolo da,
ipogaw ay adiak am-ammo, yan nay iturayak daida.
44 Manyakog-ong din nanasyon sin sangoanak,
tongpalen da ay dagos mo dengngen dan ibagak.
45 Enggay namaga din toled da,
et manpayegpeg das egyat da
ay bomala sin nantatabonan da.
46 Matagotago din Apo!
Madaydayaw din salaknib ko!
En yo et daddad-aten
din kinangaton Diyos ay mangisalakan en sak-en.
47 Binmadang et inabak kon kalaban ko,
inpaiturayanan sak-en din ipogaw ay ad-ado.
48 Sin mankakekedse ay kalaban ko, inmisalakan sisya,
yan insaad nas sak-en ay nangatngato mo daida.
49 Isonga sin kaipoipogaw, idaydayaw kos sisya,
mankantaak ay mangidaydayaw sin ngadana.
50 Dadlonan pangabaken din ari ay pinili na,
ya ipaila na din adi manbalbaliw ay layad na
en David ya din poli na si eng-enggana.