Salmo 22
22
Din Nanligatan Ya Nangidayawan Di Nalinteg Ay Ipogaw
1 Diyos ko, Diyos ko, apay nga tinmaynan ka?
Ay daetan pay di adawag ko ay manpatolong en sik-a,
ngem magay mas-ed kos badang mo tan kambaw inmaddawi ka.
2 Inag-agew ya linablabi ay man-ad-adawagak en sik-a, Apo,
ngem adim polos songbatan nan kararag ko,
isonga adi inmon-onina nan ligat ko.
3 Ngem ammok pay dedan ay Ari ka ay nangato.
Sik-ay daydayawen di Israelita tan nasantoan ka ay Apo.
4 Din ap-apo mi ed bayag et sik-a di nantaltalkan da
et siya met kayman ay insalakan mos daida.
5 Inlisim daida sin am-in ay kaeegyat idi nankararag da
et adi da nadisdismaya idi sik-ay nantalkan da.
6 Ngem mo sak-en, baken ipogaw di omibilangan di iib-a
mo adi et kaman bigis ay magay silbi na
ay sigaan ya laslasoyen da.
7 Am-in ay omil-ila et somis-iyek da.
Manwegweg da dowan dan omitidtidla.
8 Kanan da, “Mo siya ay si Diyos di nantalkam,
apay ngarud ay adi dakan badangan?
Mo tet-ewan kanam ay laylayden daka,
into ngin di mangisalakan en sik-a?”
9 Ngem sik-a met ay Diyos di inmay-ayowan sin naianakak,
siya abe sin kamoyang ko ay nansossosoak.
10 Naitalekak en sik-a manlogi sin naianakak,
sik-a din Diyos ko manipod sin naisikogak.
11 Adi ka koma tomaytaynan
tan din problimak et adi makakkaan.
Mo adi ka bomadang,
magay odom si enak pankamangan.
12 Din linmilikob ay kaibaw ko, palalo ay ad-ado da.
Kaman dan mabonget ay baka ed Basan ay nankapipigsa.
13 Kaman manngangaed ay layon ay manatakaw si tepek da,
nasasagana da ay komat ta pomse da.
14 Isonga din bikas ko et enggay maga
ay kaman danom ay naiwasit sin lota.
Enggay namaga di pigsak,
tan kaman naikomsiw din am-in ay tong-ak.
Kaman natonaw ay allid din namnamak ya toled ko,
tan enggay naabakak sin peteg ay egyat ko.
15 Enggay namgaan di bagang ko,
din dilak et naipket sin tepek ko.
Binaybay-am sak-en sin lota ta masokpot di leng-ag ko.
16 San bonggoy di makedse ay ipogaw et linmikob da,
atap ay aso ay omas-asag-en di kaiarigan da.
Din sikik ya takkay ko et tinodok da.
17 Am-in abe ay tong-ak et mabalin ay bilangen da,
din kalaban ko et ominenengneng da.
18 Din badok et nanbibingayan da,
din naloyong pay et nanbinonotan da.
19 Sik-a ay Diyos, baken koma sin addawi di panteam,
dalasem pay et koma ay en bomadang.
20 Es-esa et anggoy di biyag ko,
omisalakan ka kod sin kampilan di kaibaw ko,
tan maangat da ay kaman natiwel ay aso.
21 Salaknibam sak-en tan kaman dan layon ay en omisida
ono atap ay baka ay kaeegyat di sakngod na.
22 Idad-at kon to din maipanggep en sik-a sin gimong di aag-i,
idaydayaw kos sik-a sin kasinsinopan mi:
23 “Dakayo am-in ay mamatpateg en Diyos, idaydayaw yos sisya,
dakayo ay polin Jacob, bigbigen yo din kinangato na.
Dakayo am-in ay Israelita, patgen ya dayawen yos sisya.
24 Tan adi binaybay-an Diyos din kakaasi ya maligligatan,
idi inmey da en sisya, adi nan dinokdokogan,
et din ad-adawag da, ena aben sinongbatan.”
25 Begew sin inam-amag mo et idaydayaw kos sik-a
sin sangoanan di am-in ay mamigbig en sik-a,
et idawat ko abe din daton ay en ko insapata.
26 Mangan din nabibiteg enggana ay mabsog da,
din mangan-anap en Diyos et idayaw das sisya,
sapay koma ta matagotago da si eng-enggana.
27 Am-in ay nasyon isnan daga et bigbigen da
ay si Diyos di kosto ay daydayawen da,
isonga am-in ay tribu et mansagong da
ay en mandayaw en sisya.
28 Tan si Diyos di ari ay mangituray sin intiro ay daga.
29 Din babaknang et makikan ya mandokmog da en sisya,
siya abe din kaseseg-ang ya din dandani di kateyan da,
mandokmog da am-in ay mandayaw en sisya.
30 Din kapototan tako sin maodi ay timpo
et mansilbi da am-in en Diyos Apo.
31 Maibaga abe sin ipogaw ay daan bomala
din kinalinteg Diyos ay nangisalakan sin ipogaw na.