Salmo 31
31
Talek En Diyos Sin Timpon Di Ligat
1 Apo, mankamangak en sik-a,
adim polos ipalobos ay maibabainak koma.
Gapo sin kinalinteg mo, omisalakan ka.
2 Nan kararag ko, dengngem koma,
dalasem ta omisalakan ka.
Sik-a koma di salaknib ko
ay maiarig si dakdake ay bato
ono makneg ay beey ay pankamangak
ta maisalakanak.
3 Sik-a tet-ewa di kaman dontog ay enak pantabonan,
ta adi omdas di kalaban.
Gapo sin karim, omiturong ka.
4 Sin tagdey di kalaban ko, omilisi ka koma,
tan din pankamangak et sik-a.
5 Intalek ko din ab-abiik ko en sik-a,
tan Diyos ka ay matalek ya tet-ewa,
et namnamaek ay omisalakan ka.
6 Kaliliget mo din mandayaw si didiyosen ay magay silbi na,
ngem sak-en pay, mantalekak en sik-a.
7 Dadlonak manragragsak, Apo,
begew sin adi manbalbaliw ay layad mo,
tan ammom din problimak ya ligat ko.
8 Adim inpalobos ay dompap din kalaban ko
mo adi et inmiey ka sin lugar ay magay danag ko.
9 Maseg-ang ka, Apo, tan waday problimak.
Mansakit nan matak gapo si kaoogak
yan nay enggay nabbayak.
10 Begew sin palalo ay ladingit ko,
enggay inmaptik din biyag ko.
Gapo sin ligligat ko, enggay kinmapsotak,
olay abe din tong-ak.
11 Lomaslasoy din kalaban ko,
masepsep din katokmang ko.
Olay din gagayyem ko yan emegyat da,
lomisi da mo omila da sin kalsada.
12 Kamanak natey ay nilinglingan da
ono nagopak ay banga ay inwasit da.
13 Dedengngek din ayasak di kalaban ko,
kaeegyat sin nanliniked ko.
Mantotolag da ay omibaw da,
manpaplano da en pomse da.
14 Ngem mantalekak en sik-a, Apo,
sik-a di bigbigek ay Diyos ko.
15 Sik-ay makaammo sin intiro ay biyag ko,
omisalakan ka koma sin pomalpaligat ay kalaban ko.
16 Maseg-ang ka koma en sak-en ay mansilsilbi en sik-a.
Gapo sin layad mo ay magay panbalbaliwana,
omisalakan ka koma.
17 Sik-a, Apo, di pankararagak,
adim kod ipalobos ay maibabainak.
Say maibabain koma din mangam-amag si lawa
ya sin kad-an di natey di panturongan da.
Isdi et kanayon ay gomiginek da.
18 Din maetek, paginkem koma,
tan ipapangato dan awak da
ay manglaslasoy ya mangipalawlawa
sin ipogaw ay nalinteg di ogali na.
19 Nakaskasdaaw din kinasiged mo
sin mangipatpateg en sik-a, Apo.
Din kaipoipogaw yan maila da
din kinasiged mo sin mantalek en sik-a.
20 Wada ka ay manalsalaknib en daida
sin planon di ipogaw ay lawa
ya sin ipabasol di kalaban da.
21 Madaydayaw ka ay Diyos tan nakaskasdaaw din inyat mo
ay nangipaila sin adi manbalbaliw ay layad mo
idi linmikob din kagobat ko.
22 Madandanaganak en naisianak en sik-a, Apo,
ngem dinngem din kararag ko
sin nankedawak si badang mo.
23 Dakayo am-in ay matalek ay ipogaw di Apo,
ipaila yo en sisya din layad yo.
Din matalek yan ayowanana,
ngem idawat na di kosto ay dosa
sin mangipapangato si awak na.
24 Dakayo am-in ay mannamnama en Apo,
papigsaen yo di nemnem yo ta tomoled kayo.