Salmo 33
33
Kanta Ay Pangdayaw En Diyos
1 Dakayo ay nalinteg, manragsak kayo
gapo sin inamag Diyos Apo.
Tan din managtongpal sin bilina
et lebbeng da ay mangdayaw en sisya.
2 Dayawen yo si Diyos babaen si gitara ya arpa.
3 Ikantaan yos sisya si baro ay kanta.
Esten yo ay mankotingting sin arpa
ya ipigsa yo ay mankanta.
4 Tan din kalin Diyos et pag tet-ewa
ya matalek si Diyos sin amin ay amagena.
5 Din kosto ya nalinteg di laydena.
Maila isnan intiro ay daga
din komakaman ay layad ya seg-ang na.
6 Babaen sin kali na et pinarsua na ed daya.
Amin ay wadas di et nawada babaen sin bilina.
7 Din danom sin baybay et sininop na,
inpeey na sin lugar ay laydena.
8 Patgen ya dayawen yos sisya,
dakayo amin ay ipogaw isnan daga.
9 Tan inbaga na et tinmet-ewa,
inbilina et nawada.
10 Din panggep di nanasyon yan dadaelena
et adi matongpal din plano da.
11 Ngem din planon Diyos et magay pap-eng da,
komakaman da si eng-enggana.
12 Nagasat din nasyon ay si Yahweh di Diyos da,
nagasat din pinili na ay ipogaw na.
13-14 Os-osdongan Diyos ay manturturay ed daya
amin ay ipogaw ay wadas nan daga.
15 Sisya di nangipawada si nemnem da
et ammo na amin ay am-amagen da.
16 Baken say kaisalakanan di ari din kaad-adon di soldado na.
Adi aben maisalakan di soldado babaen sin bikas na.
17 Din kabayo ay para gobat et baken pannamnamaan
ay say begew si pangabakan.
Tan din am-in ay pigsa da
et magay maitolong da.
18 Kanayon ay bantayan Diyos din mangipatpateg en sisya
ya mantalek sin adi manbalbaliw ay layad na.
19 Sin pese et isalakanas daida,
olay timpon di betil et matagotago da.
20 Si Diyos di pannamnamaan tako,
tan sisya di mamadang ya manalaknib en datako.
21 Manragsak tako,
tan si Diyos ay nasantoan di pantalkan tako.
22 Apo, sapay koma ta lak-amen mi
din adi manbalbaliw ay layad mo en dakami,
tan sik-a din pantaltalkan mi.