Salmo 36
36
Din Kinalawan Di Ipogaw Ya Din Kinasiged Diyos
1 Magay egyat dan Diyos din mangam-amag si lawa,
kanayon ay panbasolan di nemnemnemen da.
2 Palalo ay ingangato da di awak da,
isonga kanan das nemnem da
en adi maammoan ya adi kaliliget Diyos din basol da.
3 Kedse ya pag etek di kali da,
din siged ay amagen di masirib ay ipogaw yan dinokogan da.
4 Lawlawa di kabibiyag da.
Sin kaseyseyepan da yan manplano das lawa,
et sigaan da ay dokogan din lawa ay sana.
5 Din kinamatalek mo ya adi manbalbaliw ay layad mo, Apo,
edasan da ed langit sin labes di liboo.
6 Adi aben manbalbaliw din kinalinteg mo.
Kaman dontog ay adi kaigido,
tan kanayon ay kosto din ikeddeng mo.
Kaman aben lanad di baybay ay malosong,
tan adi polos makad-as di nemnem.
Amin ay ipogaw ya animal yan ay-ayowanam, Apo.
7 Palalo ay nabanol din adi manbalbaliw ay layad mo,
isonga kamangen mi di panalaknib mo.
8 Mapnemapnek kami sin ad-ado ay makan sin beey mo,
kaman ginawang ay pan-inoman din kinasiged mo.
9 Tan sik-a di poon di biyag mi
ya silaw ay maningtinggaw sin nemnem mi.
10 Din layad ya seg-ang mo, mantoltoloy koma
sin makaammo ya manongtongpal en sik-a.
11 Adim ipalobos ay domoklos ya omipatagtag da
din nangato di nemnem na ya mangam-amag si lawa.
12 Ilaem din mangam-amag si lawa,
doy naabak da et natey da.