Salmo 38
38
Kararag Di Ipogaw Ay Mansakit
1 Apo, adi ka kod mabonget sin domosaam.
2 Tan sin dinmosaam, kamanak nasogatan sin panam,
kamanak aben natokang gapo sin dinmespegam.
3 Madagsen di sakit ko gapo sin bonget mo,
mansakit amin awak ko begew sin basol ko.
4 Tan enggay nalim-otanak si basol ko,
adiak makag-en tan madagsen dadlo.
5 Naboyok et man-agob din sogat ko
gapo sin kinaong-ong ko.
6 Adiak makabangon gapo sin sakit ko.
Maninsin-agew ay man-og-ogaak si ladingit ko.
7 Man-atong ay kaman apoy nan awak ko,
palalo nan sakit ko.
8 Enggay kinmapsokapsotak, Apo,
manbayewengak gapo sin sakit di nemnem ko.
9 Ammom din laydek, Apo,
dedengngem amin ay bayeweng ko.
10 Mankayebkeb nan poso ya enggay kinmapoyak,
kinmapsot abe nan matak.
11 Adi somag-en din gagayyem ya katokmang ko
gapo sin bayang ko, olay abe din toton-od ko.
12 Din manpanggep sin biyag ko, man-amag das tagdey da,
din manglayad ay domadael yan omipalawlawa da,
adi da somaldeng ay manplanos lawa.
13-14 Ngem kamanak nateweng, tan tetewengek daida,
ya kamanak omel, tan adiak songbatan din ibaga da.
15 Tan sedsed-ek sik-a, Apo,
songbatam kod kararag ko, Yahweh ay Diyos ko.
16 Adim ipalobos ay manragsak dan kalaban ko
gapo sin kadadaelak ya ligat ko,
17 tan kamanak matey sin kanayon ay sakit ko.
18 Ipodnok nan basbasol ko
madandanaganak begew sin lawa ay inamag ko.
19 Napipigsa da din kalaban ko,
ad-ado da ay omililiget, olay magay gapo.
20 Din manobalit si lawa sin siged ay inamag ko,
daida din kalaban ko gapo sin pangamagak si kosto.
21 Adi ka kod bomaybay-an, Apo,
adi ka omaddawi ay Diyos ko.
22 Dalasem ta bomadang ka, sik-a ay omisalakan ya Apo.