Salmo 41
41
Kararag Di Ipogaw Ay Mansakit
1 Nagasat di ipogaw ay din kakkaasi yan seg-angana,
tan isalakan Diyos sin timpon di ligat na.
2 Salakniban ya ayowanan Diyos sisya
et naragsak di biyag na isnan daga.
Adi baybay-an Diyos sin kalabana.
3 Ayowanan Diyos sin pansakitana,
agasana sin amin ay sakit na.
4 Mo sak-en pay yan say kanak na,
“Apo, nanbasolak en sik-a,
maseg-ang ka koma ta omagas ka.”
5 Omipalawlawa din kalaban ko yan kanan da,
“Pig-an pay di kateyana ya kaliw-anan di ngadana?”
6 Baken aben matalek din ipogaw ay bomisita,
tan mo bomala da, omipalawlawa da
et iwaras da di ay istorya.
7 Amin din omiliget yan man-aayasak da,
Din kalawlawaan ay mapasamak en sak-en et say nemnemen da.
8 Kanan da en inayan di sakit ko
et magay namnamak ay matago.
9 Olay din tinaltalek ko ay gayyem ko
ay nakiokob en sak-en yan nanbalin ay kaibaw ko.
10 Maseg-ang ka ay Diyos ta omipabikas ka
ta say makaibaesak en daida.
11 Mapnek kan sak-en, et siya nay pangammoak:
din kalaban ko yan adi dan omabak.
12 Gapo sin kinalinteg ko, omayowan ka,
manteeak sin kad-am si eng-enggana.
13 Yahweh ay Diyos di Israelita,
madaydayaw ka ed wani ya si eng-enggana.
Siya sa. Amen.