Salmo 57
57
Kararag Ta Maseg-ang Si Diyos
1 Ay Diyos, bomadang ka, maseg-ang ka,
tan din pankamangak et sik-a.
Mankamangak en sik-a
ay kaman kiyap ay manpasakoko en ina na
enggana ay din kaeegyat ay ligligat ko et malabas da.
2 Mankararagak en sik-a, Diyos ay kangatoan,
ay mangidawdawat en sak-en si amin ay kasapolan.
3 Manipod ed langit, omisalakan ka,
din pomalpaligat, abakem daida.
Ipailam en sak-en din kinamatalek mo, Apo,
ya din adi manbalbaliw ay layad mo.
4 Linmilikob di kalaban ko ay kaman dan layon
ay nakasagana ay omokmon.
Kaman gayang ya pana di bab-a da,
kaman kampilan di dila da.
5 Apo, din kinangatom ya panakabalin mo et ipailam koma
sin am-in ay soli ed langit ya isnan daga.
6 Inmisagana das tagdey din kalaban ko
et palalo ay nadagsenan di nemnem ko.
Sin pandanak nankaot das bito,
ngem din nag-as et daida met laeng ay kalaban ko.
7 Apo, napodnoak en sik-a
et mankantaak ay mangidayaw en sik-a.
8 Bomangonak ay masapa
ta tokarek din gitara ya arpa.
9 Sin sangoanan di kaipoipogaw, man-iyamanak en sik-a,
mankantaak ay mangidayaw en sik-a.
10 Kaman din kakayang di ed daya, Apo,
din adi manbalbaliw ay layad mo,
din kinamatalek mo yan edasana din liboo.
11 Apo, din kinangatom ya panakabalin mo et ipailam koma
sin am-in ay soli ed langit ya isnan daga.