Salmo 66
66
Kanta Ay Pangdayaw En Diyos
1 Dakayo amin ay ipogaw isnan daga,
begew si ragsak yo, ipigsa yo koma
ay mankanta en Diyos ay mangidaydayaw en sisya.
2 Ikanta yo din kinapateg di ngadana,
ta say madaydayaw din nakaskasdaaw ay kinadiyos na.
3 Kanan yo, “Nakaskasdaaw din inam-amag mo,
isonga manpalikotkot da din kalaban mo
gapo sin kaeegyat ay panakabalin mo.
4 Amin ay ipogaw sin daga yan daydayawen daka,
mankanta da ay mangidayaw en sik-a.”
5 Omali kayo ta ilaen yo
amin din inamag di Apo.
Inamag na di nakaskasdaaw
ay inilan di kaipoipogaw.
6 Din baybay yan nanbalinena
ay namgaan din lanad na,
siya abe sin ginawang et nandan din ipogaw na
sin nanbalasatan da,
isonga dayawen takos sisya.
7 Manturay si eng-enggana babaen sin panakabalina,
din nanasyon et kanayon ay il-ilaena,
maga koma di mangontra en sisya.
8 Amin ay ili, dayawen yo din Diyos tako,
ikanta yo din panangdayaw yo.
9 Inayowanana din biyag tako,
adi na inpalobos ay maisokba tako.
10 Tan pinadas mos dakami, Apo,
nilinisam dakami ay kaman balitok ay maioto.
11 Inpalobos mo ay matagdey kami,
inpabaklay mo di nadagsen en dakami.
12 Pinalobosam din kalaban mi
ay mangigatigatin en dakami.
Sin nanligligatan mi,
kaman apoy ya layos di nilasat mi,
ngem ed wani, in-ey mos dakami
si nabaknang ay ili ay pantean mi.
13 Man-idatengak to si daton ay mapooan sin beey mo
et tongpalek din inkarik en sik-a, Apo,
14 sin timpon di ligat ko.
15 Man-idatonak si mankalalames ay karnero
ta maidaton ay maipoo.
Man-idatonak to abe en sik-a
si bomaro ay kalding ya baka.
16 Omali kayo ay mangipatpateg en Diyos Apo
ta din inam-amag nan sak-en, dad-atek en dakayo.
17 Nan-adawagak ay nankedkedaw si badang na,
nankankantaak ay nangidayaw en sisya.
18 Mo adiak inbabawi din basol ko,
adi koman dinngen Diyos din adawag ko.
19 Ngem siya met ay dinnge na ya sinongbatana.
20 Madaydayaw si Diyos tan din kararag ko et pinatgana,
din adi manbalbaliw ay layad nan sak-en yan intoltoloy na.