Salmo 68
68
Mangabak Si Diyos Ay Manakabalin
Sapay koma ay Diyos ta man-gonay ka,
din mangonkontra ya mangililiget en sik-a
et pansisianem koma ta lomayaw da.
Kaman da koman asok ay itayaw di dagem
ya allid ay matenaw sin apoy mo isag-en,
say iyat di managbasol ay madosa sin sangoanam.
Ngem din nalinteg pay et manragsak da sin sangoanam,
manbogbogaw da ay maragsakan.
Mankanta kayo ta idaydayaw yo din Apo,
sisya ay manlogan si liboo,
din pandanana et isagana yo.
Si Yahweh di ngadana,
manragsak kayo sin panaydayawan yo en sisya.
Si Diyos ay wada sin nasantoan ay beey na,
ay-ayowanana ya salsalaknibana din nalasang ya olila.
Mo din kaseseg-ang ay magay ib-a na,
ianapanas pamilya ay pakibeeyana,
din balod yan wayawayaana et manragsak da.
Ngem din mangonkontra en sisya et mantee da
sin kadardaratan ay magay danom na.
7-8 Sik-a ay Diyos ay nanpaila ed Sinai, Diyos di Israelita,
gapo ta wada ka,
nanyegyeg ya nan-odan si napigsa
sin nangipangoam sin ipogaw mo
ay manbalasat sin lugar ay batbato.
Inpawadam di ad-ado ay odan
et sinibogana din lota ay namgaan
sin daga ay indawat mo kayman.
10 Nanbeey das di din ipogaw mo,
din kasapolan di kakkaasi yan indawat mo
gapo sin kinasiged mo.
11 Apo, inbagam din bilin mo
yan inpaammon di babbabai ay ad-ado.
12 Kanan da, “Din aari ya sosoldado da yan linmayaw da!”
Din babbabai ay mantees beey yan panbibingayan da
din nataynan ay sanikwa.
13 Mo tomalna kasin di biyag di Israelita
yan wada da ay man-ib-ibbay sin kad-an di karnero da,
napintas ay kalapati di kaiarigan da,
kaman nam-es si balitok din dotdot na
ya mankoniniing ay palata din payak na.
14 Diyos ay Manakabalin Am-in,
din aari yan en ka nansisianen,
kaman andap sin dontog ay Zalmon.
15 Dakdake ay dontog ed Basan ay ad-adoy toktok na.
16 Sik-a ay dontog ay ad-adoy toktok na,
apay nga maapal ka
sin dontog ay pinilin Diyos ay panteana?
Mantees di si eng-enggana.
17 Mo emey ka ay Diyos sin nasantoan ay beey mo,
mapo da ed Sinai ay kakoyog mo
di kalisam ay niliblibo.
18 Idi nantikid ka ay emey ed ngato,
inkoyog moy ad-ado ay inabak mo.
Inawat moy sagsagot ay napo sin mangonkontra en sik-a
ta makitee ka en daida.
19 Madaydayaw ka ay Diyos ay mangisalakan en dakami,
inag-agew ay bakbakwaem dakami.
20 Sik-a din mangisalakan ay Diyos mi,
sin pese, isalakan mos dakami.
21 Ngem tegtegem din toktok di kalaban mo
ay mangitoltoloy sin basol da ay napalalo.
22 Inkarim ay ialim daida
ay mapod Basan ya sin lanad di baybay ay kad-an da,
23 ta igatin mi din dada da
ya dildilan di aso mi enggana ay mabsog da.
24 Ilaen to di kaipoipogaw din pandad-anam
ay mangipaila si nangabakam
sin emeyam sin Timplo ay nasantoan.
25 Mangon-ona da din komakanta,
din babassang ay manamtambol di somigsigonda,
maod-odi din mangitgitara.
26 Dakayo am-in ay Israelita, idaydayaw yo
si Diyos sin gimong yo.
27 Din polin Benjamin di mangon-ona,
daida di kakitkittoyan ay tribu da,
pag din papangolon di polin Juda ya din grupo da.
Pag omonod abes di
din papangolon di tribun da Zebulun en Naftali.
28 Ipailam kod kasin, Apo,
din inpailam en dakami ay panakabalin mo.
29 Et sin Timplom ed Jerusalem yan man-idateng da
di aari si regalo dan sik-a.
30 Din ili ay Egipto, yamyamam koma,
maangat ay animal sin katantanobongan di kaiarigana.
Yamyamam abe din nanasyon ay kaiarigan da
di bobomaro ya oolbon ay baka,
enggana ay manpakombaba da
ya idaton dan palata da.
Din nanasyon ay gobat di laylayden da,
abakem ya pansisianem kod si daida.
31 Din taga-Egipto yan idondon day oopisyal da,
din taga-Etiopia yan itag-ay dan Diyos din takkay da
ay mankararag en sisya.
32 Kaipoipogaw sin amin ay nasyon isnan daga,
dayawen yos Diyos babaen si kankanta,
33 ya dengngen yo din napigsa ay bogaw na.
Nanlologan sisya ed daya,
ed daya ay sipod ed nabaon di kawadaana.
34 Idaydayaw yo din panakabalin Diyos ay mangituray sin Israelita,
maipaila ed daya din panakabalina.
35 Kaeegyat si Diyos sin kapoana
sin nasantoan ay kad-ana.
Sisya din Diyos ay daydayawen di Israelita,
idawtana si pigsa ya panakabalin din ipogaw na.
Madaydayaw si Diyos!