Salmo 77
77
Panliwliwaan Di Ipogaw Ay Nadismaya
Apo, man-adawagak en sik-a
yan ipigsak di kararag ko ta domnge ka.
Nankarakararagak en sik-a isnan timpon di ligat ko.
Naninsinlabi ay intatag-ay kon takkay ko
ay mankararag en sik-a, Apo,
ngem magay makaliwliwa sin nemnem ko.
Mo nemnemek sik-a,
“Ay apaw na,” kanak, tan dadlonak nadismaya.
Gapon sik-a, adiak makaseyep ay naninsinlabi,
palalo ay nariribokanak et adiak makakali.
Din agew ya tawen ay nalabas yan manemnem ko,
maninsinlabi ay ad-adoy salodsod ko:
“Ay domokog si Diyos si eng-enggana?
Ay adi na ipaila kasin en sak-en din seg-ang na?
Ay enggay napap-eng din adi manbalbaliw ay layad na?
Ay polos ay adi matongpal din kari na?
Ay enggay magay seg-ang na?
Ay insaldeng na begew sin bonget na?”
10 Pagak kanan, “Siya nay pansakitan di nemnem ko,
din panakabalin Diyos ay Kangatoan yan baken kaman sin damo.”*
11 Nemnemek din nakaskasdaaw ay inam-amag mod idi, Apo.
12 Nemnemek amin din kaeegyat ay inamag mo.
13 Nasantoan amin ay inamag mo,
sik-a ay Diyos mi yan magay makaiso.
14 Sik-a din Diyos ay makaamag si milagro,
inpailam sin nanasyon din panakabalin mo.
15 Insalakan mo babaen sin panakabalin mo
din polin da Jacob en Jose ay ipogaw mo.
16 Inmegyat din danom idi inila nas sik-a,
olay din malosong ay baybay, nanpayegpeg si egyat na.
17 Din odan, inig-as din liboo
nankido ed kayang yan nankimat sin amin ay disso.
18 Din kidom yan man-agodood da,
nasilawan din lobong sin kimat na,
naikiweg ya nanpayegpeg din daga.
19 Nandan ka sin danom, Apo,
din baybay yan binalasat mo,
ngem adi maila din gatin mo.
20 Babaen en da Moses en Aaron, inpangom din ipogaw mo
ay kaman kan manpaspastol si karnero.
* 77:10 Di esa abe ay kaiologan nina sin Hebreo et: Pagak kanan, “Manipod ed wani siya nay pangiturongak sin nemnem ko, din panakabalin Diyos ay Kangatoan manlogi sin damo.”