Salmo 93
93
Nangato Ay Ari Si Diyos
1 Apo Diyos, sik-a di ari mi ay ipogaw mo,
dayaw ya pigsa et kaman mon inbabado.
Adi maikiweg din daga tan insaad mo ay kosto.
2 Nanturturay ka manipod sin damodamo,
nawawada ka sin daan manlogi di timpo.
3 Apo Diyos, dinmakdake din danom
et man-agodood din dalloyon.
4 Ngem sik-a ay Diyos ed daya,
addawi ay manakabalin ka
mo din baybay ya dalloyona.
5 Apo, adi polos manbalbaliw din linteg mo.
Bagay nas eng-enggana din kinasanton di beey mo.