Salmo 95
95
Dayawen Ya Onodan Tako Din Manakabalin Ay Diyos
Omali kayo ta mankanta ya manragsak tako,
ipigsa takon pangdayaw takon Diyos Apo.
Maiarig sisyas dakdake ay bato
ay pankamangan ta maisalakan tako.
Emey tako sin sangoanana ay man-iyaman en sisya,
manragsak tako ay mangidayaw babaen si kankanta.
Tan si Yahweh yan manakabalin ay Diyos
ya ari ay nangatngato mo din amin ay sinan didiyos.
Iturayana din intiro ay daga manipod sin kaonegan ay liyang
enggana sin dontog ay kakayangan.
Oka na abe din baybay tan pinarsua na,
siya abe din daga ay inamag na.
Omali kayo ta mandokmog ya manyakog-ong tako
ay mandayaw en Yahweh ay namarsua en datako.
Tan sisya din Diyos tako ya datako di ipogaw na
ay maiarig si karnero ay ay-ayowanana.
Dengngen yo koma ed wani ay agew din kalin Diyos Apo.
Kanana, “Adi yo pakenkentegen din nemnem yo
ay kaman din inyat di aap-o yo
sin agew ay kawada dad Meriba,
sin lugar ay magay omili ed Massa.*
Isdi ay pinmadpadas din aam-a yo
olay inil-ila da din inam-amag ko.
10 Opatapolo ay tawen ay sinigsigaak daida.
Isonga kanak, ‘Kankanayon ay masangsangaw das lawa.
Sigaan da ay mangonod sin bilbilin ko en daida.’
11 Gapo sin bonget ko inkarik ay adik polos pasgepen daida
sin pan-illengan ay enak insagana.”
* 95:8 Din istorya maipanggep sin naamag ed Meriba ya Massa et madtengan sin Exodo 17:1-7 ya Bilbilang 20:1-13.