3
Yeŧu apel Moyiŧ
1 An bayiţ naan nanwooŋ bajinţ ţi këş ki Naşibaţi kë adatan, natenan keeri ţi Yeŧu. Naşibaţi ayila kë awo *naşih i baţeŋan, uko mënţ wi wi ŋfiyaaruŋ akuţ aţup.
2 Ado iko bŧi yi Naşibaţi anţu'uluŋ ulemp mënţ ajakuluŋ ado jibi *Moyiŧ adolaŋ iko bŧi yi Naşibaţi aţu'uluŋ pdo ţi katoh ki nul kanwooŋ pntaali pi nul.
3 Anniwuŋ katoh adëm apel katoh, kë hënk di Yeŧu aŧaaŋuŋ na pyeenk mndëm mampeluŋ mi Moyiŧ.
4 Katoh kandoli ñaaŋ ajaaŋ aniw ka, Naşibaţi aşaaŋ aji do iko bŧi.
5 Moyiŧ awo nalempar Naşibaţi, ado iko yi Naşibaţi aţu'uluŋ pdo ţi katoh ki nul kanwooŋ pntaali pi nul, ajukan uko wi Naşibaţi akluŋ kadiiman.
6 Kë Kriŧtu aşë wo abuk katoh i Naşibaţi aţuuŋ ţi kadun ki ka. Nja ŋşaaŋ awo katoh mënţ woli ŋmëban akuţ ahaţ ţi a, alilan ţi uko wi ŋhaţuŋ.
Plipara ppok pţaş uko wi Naşibaţi ajakuŋ
7 Ukaaŋ kë, jibi *Uhaaş wi Naşibaţi uţupuŋ:
« Woli naŧiink nţa pdiim pi nul,
8 nawutan kadënëţan ŋhaaş,
jibi bateeman babiiŋ ado, adeka kafeţ unuur wi bakdakuluŋ du *pndiiş. »
9 Naşibaţi aţiini aji :
« Du pndiiş mënţ, bateeman bado na pten me nhil pdo uko wi njakuŋ, adakën,
te bawin iko yi nji ndoluŋ
10 ŋşubal iñeen ŋbaakër.
Ukaaŋ kë nji ndeebaţër pntaali mënţ aji :
“Ŋhaaş ŋi baka ŋaji ŋaneeman baka unuur undoli,
baandi pţaşën.”
11 Uko waŋ ukaaŋ kë mmehna, wi ndeebaţuŋ, aji :
“Baankneej nin du dko di nji mbomanuŋ baka aji banoorfënaan.” »
12 An bayiţ naan, naţaafaraan aloŋ ţi an awo na uhaaş uwuţaan, aţañan pfiyaar adoo low Naşibaţi anjaaŋ awul ubida.
13 Nabaa wo kaţëp ţëp katëŋţëndër ŋnuur bŧi ŋi nakŧiinkuŋ pdiimul, pekadu dawutna kaguur nin aloŋ ţi an adënëţën uhaaşul.
14 Ŋwo ţi ploolan na *Kriŧtu na manjoonan woli ŋmëban te ubaañşaani ţi mnhaţ mi ŋbiiŋ awoonaan du ujuni.
15 Jibi nţupanaŋ:
« Woli naŧiink nţa pdiim pi nul,
nawutan kadënëţan ŋhaaş,
jibi bateeman babiiŋ ado, adeka kafeţ unuur wi bakdakuluŋ. »
16 Na manjoonan in abiiŋ aŧiink pdiim pi Naşibaţi aşë deka kafeţ? Mënţ bañaaŋ bŧi bampënnuŋ uŧaak wi *Ejiptu kë *Moyiŧ awo ţi kadun ki baka i?
17 Kë bahoŋ biki adeebaţëruŋ ŋşubal iñeen ŋbaakër ba? Mënţ bambiiŋ ajuban akeţ du pndiiş baka i?
18 Bahoŋ biki amehniiŋ aji baankneej du dko di abomanuŋ baka babi banoorfën ba? Mënţ bambiiŋ apok pŧiinka baka i?
19 Ŋwin bnuura kë baambi hil pneej du dko dnoorfënaani di nul ţiki bapok pfiyaar.