5
Nanitabokobi Midipiate Ya꞉sukono Pe Tanaloma꞉ Olowiolo Nemakopelenama꞉na꞉
1-2 Ebema꞉ aimano nanitabokobi midipi ekakiala꞉, Kawodawa Ya꞉sukono Kawo Egelalo kebe iyaiya tanalate demaimioma꞉na꞉, ebe tanaloma꞉ nale me leta magumulo la꞉ kawiya akanaletama, mabu la꞉ iyatawanomolata pilo dubute idokolo keba kunu ka꞉penakole Ya꞉sute ebe Egelalo eba kunu ka꞉pemene. Iyo, ebe egelate pea꞉no dopamo nanitabokobi midia꞉piate ma kunu begelanakoma꞉na꞉, “Aimano ilukuli tanalo wadenomola, ega꞉walo tole tanalote agodolo kitana꞉ mabu me opo epate milo tanalo magumulo ilukulina.” Wiyasiya ebe tetenomolo Godokono kawo olalati tanalonomote iba꞉tamo gito ka꞉pemaigamene, lamitu kamiyalete iyaiya tanalo eba osiyodilolelo ebeno gudu alaimi temetemete ebetamo keba kunu ka꞉pemaiganakole eba kunu. Nanitabola, ebe tetelo nanitabokobi midia꞉piatamo da꞉pemaigamene, iba꞉te ebe olalati temeteme magumune alautioma꞉ gabo nipo kowadima꞉na꞉!
O nanitabokobi midipi ekakiala꞉, piyate idoko kawonomolo u delaonanaka iba꞉te pilo dubuno pe tanalo kiyatawaonakoa꞉, wiyasiya la꞉imano tanalo eba kunua꞉! La꞉ idoko magumulo kilukula꞉wena꞉ wiyasiya la꞉ Kawodawano pe tanaloma꞉ olowiolo ilukulinamata, ebema꞉ ebete ebeno Kawo Egelalo da꞉pemene la꞉le ebe tanalo uma꞉wete a꞉kela꞉wa꞉omata. Numa꞉la꞉, la꞉ bilibilinomate alo teteno gudima꞉ eda꞉onamata, iyo, a nanitabokobi midipi idoko teteno gudia꞉, 6-7 ebema꞉ epetapiate u delaonanaka ale ebako epoma꞉ eda꞉oma꞉ modoboa꞉, mabu idoko tete ebe ibino u lao tetela ega꞉walo idoko tete ebe ibino gamoda nio tetela. Modobola ale wiyasiya tuputupu wokilo eba ilukulinalo aimano Kawodawano pe tanaloma꞉ olowiolo kemakopelenamalema꞉, iyo, a nanitabokobi midipi a egela teteno epola, ebema꞉ modobola ale tete bilibilinomolo tuputupu wokilo bilukulinama꞉. Ega꞉walo modobola ale Godoko nanitabokobi midi tanalo ega꞉walo nilakapo kimalagidilo tanalo, ebe netewa kawokawo tanalo aimano apa꞉mo ka꞉pupulimalema꞉, gowelaodawate ebeno negege inamabu da꞉pulinako eba kunu. Ega꞉walo ale aimano igilo mula꞉ tanalo Ya꞉sugodone nanitabolo laema꞉, modobola ale ebeno pe tanaloma꞉ olowiolo bemakopelenama꞉, mabu ebako olowio tanalo ebe goweladawano diba keba kunula꞉ka꞉ eba kunula.
Numa꞉la꞉, Godote a keka꞉miya꞉ ebete aimano kuba osiyodilole mabuma꞉ ebeno kawo dowanomo magumulo wiya atamo kikaeaema꞉. Ao, ebete wiyasiya a uwateiya ale aimano Kawodawa Ya꞉su Kelisokono woko tanalodo aimano igilo mula꞉ tanalo kelaema꞉, 10 mabu Ya꞉sukono a꞉e tanalono magumu ma kunula, ebe ubila ale uwomua꞉ uwomua꞉ tetelo eba꞉go kilukulinama꞉. Ebema꞉ kalakala kawonomola, nanitabokobi midipi magumulo piyate dopamo da꞉elaiya ega꞉walo piyate ebeno pe egelalo me opolo dilukulionama꞉na꞉ ibi bilibilinomate kapiya tetelo ibino nanitabo kalakala ebegodone ka꞉nelaema꞉na꞉. 11 Iyo, me mabuma꞉ modobola la꞉ la꞉imano tabono tanalamo ega꞉walo la꞉imano osiyodilole tanalamo la꞉ magumulo epetapiate epetapi wadenomamo nowalubiuinakiyala꞉, la꞉ me tetelo keba kunu kosiyodilawenama eba kunu.
Polote Leta Uwomu Apulo Iyatulame Tabo Epetapi Da꞉kiyawaiya
12 Aimano nanitabokobi midipi ekakiala꞉, ale la꞉ analeta la꞉imano nanitabokobi midi magumulo piyate Kelisokono nanitabo gabo ega꞉walo okoli tanalo la꞉ iyatulaema꞉ woko dosiyodilona, modobola la꞉ la꞉imano tepo magumuno wokilo ibi unamo eba wadipalatelelo ibino tabamo na꞉tudila꞉onala꞉. 13 Numa꞉la꞉, iba꞉te la꞉ kowalubilitama꞉ wade woko osiyodilona, ebema꞉ modobola la꞉ ibino tabamo wadenomamo eba tudila꞉olo ibi nilakapolo nemalagidilolenala꞉. Ega꞉walo me tanalo idila, modobola la꞉imano taneba magumulo la꞉ bilibilinomate milolo nilukulinala꞉.
14 Ebema꞉ aimano nanitabokobi midipi ekakiala꞉, ale la꞉ kawiya nanaleta la꞉ magumulo piyate damolama꞉ deda꞉ona, modobola la꞉le ibi nanala꞉la꞉ woko nanitabolo kosiyodilolenama꞉. Ega꞉walo piyate ibino nanitabokobi midi magumulo ilipo diyatawaona ega꞉walo piyate elawoa꞉noma꞉ deda꞉ona, modobola la꞉le la꞉imano tabamo ega꞉walo osiyodilole tanalamo ibi nowalubiliyala꞉, iyo, la꞉le iyaiya epo epetapi bilibilinomo la꞉imano tabamo dowalubila꞉wenakoma la꞉le iba꞉tamo samamo ubia꞉noma꞉ akoeda꞉onakala꞉. 15 Ega꞉walo me tanalo idila. La꞉imano ilukuli magumulo idite iditamo kuba dosiyodilomene, ebe tetelo temeteme lawedawate kuba osiyodilodawatamo wiya akoikama꞉la꞉, wiyasiya modobola la꞉le tete bilibilinomolo la꞉imano ubi kawonomamo niyatinakiyala꞉, la꞉ magumulo idite iditamo nilakapo eba awokalimilo iyaiya epo epetapi bilibilinomatamo atumu wadewade tanalo kapiya ka꞉kosiyodilola꞉wenama꞉.
16 Ebene tete bilibilinomolo la꞉le Godokono kalakalago eba ilukulinalo, 17 idoko ega꞉walo egela bilibilinomolo eba꞉go tabo gela tanalo atepa꞉no, 18 wadewade tanalate maimio tetelo ega꞉walo olalati tanalate maimio tetelo ebetamo kalakala tabo nowadipalatelenakiyala꞉. Nanitabola, me netewa-kapiya tanalo ebe Godote la꞉imano ilukuli magumulo ulaema꞉ ubi diyatina ebe tanalola, mabu la꞉le Ya꞉su Kelisoko magumulo eba ilukulinalo ebe wadewade tanalate la꞉godolo nemaimionakoma꞉na꞉.
19 Ebema꞉ Godokono Talena Uliyanate kebe woko kosiyodilonale ebe woko ako-odiyobala꞉, 20 iyo, kebe tetelo lumagi idite Godokono woki nanitabonomolo dawokalimene, modobola la꞉le ebe tabo lawa꞉wete kubama꞉ akogelala꞉. 21 Wiyasiya la꞉ nanisiwale, epate kebe iyaiya tabono tanalo Godokono mailamo da꞉kiyawaonaka, la꞉le ebe tabono tanalo bilibilinomo la꞉imano wade wokiamo anagilama꞉wete nani tabonomoma꞉ samamo akogelala꞉. Me gabodo la꞉le Godokono nani tabono iyaiya tanalo kodakodalo eba watila꞉mota꞉nalo, 22 iyaiya kuba tabo ega꞉walo osiyodilole tanalo bilibilinomo la꞉le walogabo apuamo na꞉midaliyala꞉.
23 Nanitabola, kebe dawate a nanitabokobi midipiatamo milo dikaeamena, ebe Kawodawa ebe Godotela, ebema꞉ ale la꞉ mabuma꞉ ebe ma kunu toweomenakoma꞉, ebete la꞉imano ilukuli tanalo bilibilinomo magumulo la꞉ ebeno nani talenapima꞉ eba midililo, ebete la꞉imano uliyanano woki ega꞉walo tepo magumuno ubi tanalo ega꞉walo ape kawonomono osiyodilole tanalo wadenomamo nulamelelamenakoma꞉ta. Kalakala kawonomola, me gabodo Kawodawa Ya꞉su Kelisokono pe tetelo kuba da꞉peso idite la꞉ magumulo a꞉kitanamene. 24 Numa꞉la꞉, Godote la꞉ ebeno talenapima꞉ keda꞉oaema꞉ ka꞉la꞉minata, ebema꞉ ebe modobola ebete ebe wade woko la꞉ magumulo opoliyama꞉, iyo, ebete kebe tanalo osiyodilolema꞉ tabo da꞉kiyawaona ebete ebe iyaiya tanalo nanitabonomolo bosiyodilolenakomene.
25 Ebema꞉ aimano nanitabokobi midipi ekakiala꞉, modobola la꞉ atumu a mabuma꞉ Godotamo na꞉towetoweonakiyala꞉, 26 ega꞉walo la꞉ daladabuta꞉wenakoma, modobola la꞉ bilibilinomo epetapiate epetapino koto uwateuilo na꞉wiyamidauinakiyala꞉. 27 Na Polote Godokono mailamo la꞉ ma kunu analemata, la꞉ me leta nanitabokobi midipi ekaki bilibilinomatamo neka꞉la꞉mioliyala꞉.
28 Modobola aimano Kawodawa Ya꞉su Kelisokono nilakapo tanalote la꞉godolo nitanamene. Me ebe naimano tabo uwomula. Taula.