9
Nununku Lun LEUM GOD
1 Nga liye LEUM GOD El tu sisken loang uh. El sap, “Liksreni puok sifen sru in Tempul tuh pwelung uh fah kusrusryak, ac acn lucng musalsalu ac raki nu fin sifen mwet uh. Nga fah onela mwet lula nukewa ke mweun. Wangin sie selos ac fah moulla, tia siefanna ac fah kaingla.
2 Elos finne pikin nu ten in oatui nu ke facl lun mwet misa, nga ac fah sruokolosi. Elos finne fanyak nu inkusrao, nga ac fah tulakunulosi nu ten.
3 Elos fin wikla fin mangon Eol Carmel, nga ac fah sokolos ac sruokolosi. Elos fin wikla likiyu oe yen loal meoa, nga ac fah sap tuh ma sulallal in meoa in ngalselosi.
4 Mwet lokoalok lalos fin usalosla nu in sruoh, nga ac fah sap in anwuki mwet sruoh ingan. Nga wotela tari in kunauselosla, ac tia kasrelos.”
5 LEUM GOD Fulat ac Kulana El kahlye faclu
Ac faclu kusrusryak.
Mwet nukewa su muta we elos asor.
Faclu nufon ac fah mutyak ac putati oana Infacl Nile.
6 LEUM GOD El musai acn sel inkusrao,
Ac oru tuh acn engyeng uh in sunya faclu.
El eis kof liki fin meoa uh
Ac okoala nu fin faclu.
Inel pa LEUM GOD!
7 LEUM GOD El fahk, “Mwet Israel, nga saokkin mwet Ethiopia oana ke nga sekoekowos. Nga use mwet Philistia liki acn Crete, ac mwet Syria liki acn Kir, oana ke nga tuh uskowosme liki acn Egypt.
8 Nga, LEUM GOD Fulat, nga suiya tokosrai koluk se lun Israel inge, ac nga fah sukela liki faclu. Tusruktu nga fah tia kunausla nukewa mwet in fwil natul Jacob.
9 “Nga fah sapkin in likliki mwet Israel oana ke mwet uh likliki puk. Nga fah osrokolosyak inmasrlon mutunfacl uh in srela mwet wangin sripa.
10 Mwet koluk inmasrlon mwet luk fah anwuki ke mweun — elos nukewa su fahk, ‘God El fah tia lela kutena mwe ongoiya in tuku nu facsr.’ ”
Sifil Folokyak Lun Israel
11 LEUM GOD El fahk, “Len se ac fah tuku ke nga ac fah sifil folokonak tokosrai lal David, su oana sie lohm ma ikori ac sruala. Nga fah tulokunak ac aksasuyela sinka kac. Nga fah sifilpa musaela ac orala tuh in oana pacl meet ah.
12 Ouinge mwet Israel fah kutangla acn nukewa lula ke facl lun mwet Edom, oayapa mutunfacl nukewa su tuh ma luk meet. LEUM GOD El fahk ouinge, ac El ac fah oru oana ke El fahk.
13 LEUM GOD El fahk, “In kutu len fahsru,
Matula lun wheat uh ac pisrpisr liki mwet kosrani,
Ac kap lun grape uh fah sa liki na in orekla nu ke wain.
Sronin grape uh ac fah sororla fineol ma kapak we,
Ac kahkla pe eol uh.
14 Nga ac fah folokonma mwet luk nu in acn selos.
Elos fah sifil musai siti selos ma musalla, ac muta we.
Elos ac yukwi ima in grape ac nim wain kac.
Elos ac yukwi ima srisrik lalos ac kang fahko kac.
15 Nga fah yukwiya mwet luk fin acn ma nga tuh sang selos,
Ac elos fah tia sifilpa fifyak.”
LEUM GOD lom pa fahk ouinge.