49
Kas Safla Lal Jacob
1 Jacob el pangoneni wen natul ac fahk, “Kilukeni nu yuruk, ac nga fah fahk nu suwos ma ac sikyak nu suwos ke pacl fahsru uh:
2 “Fahsreni nu sie, wen natul Jacob, ac porongo.
Porongo kas lal Israel, papa tomowos.
3 “Reuben, wounse mukul nutik, kom pa ku luk,
Kom pa fahko se emeet ke pacl in fusr luk.
Kom pa fwacfa ac watwen sin wen nutik nukewa.
4 Kom oana sie sronot fokoko,
Tusruktu ac tia kom pa yohk sripa oemeet,
Mweyen kom tuh ona yurin mutan kulansap kiuk
Ac aktaekyala mwe oan lun papa tomom.
5 “Simeon ac Levi eltal tamulel.
Eltal orekmakin mwe anwuk natultal in orek lokoalok sulallal.
6 Nga fah tia welultal in sramsram lukma laltal,
Ac tia pac welultal ke pacl in pwapa laltal,
Mweyen kasrkusrak laltal som nwe ke sun uniya mwet,
Ac eltal aksukapasyela cow mukul oana mwe pwar.
7 Lela in selngawiyuk kasrkusrak laltal, mweyen arulana upala,
Ac nu fin folo laltal, mweyen arulana sulallal.
Nga fah luseloselik fin acn Israel nufon.
Nga fah siseloselik nu inmasrlon mwet Israel.
8 “Judah, mwet lim fah kaksakin kom.
Poum fah iseya kwawen mwet lokoalok lom.
Mwet lim fah pasrla ye motom.
9 Judah el oana soko lion.
El uniya ma el sruokya uh, folokla nu in luf sel,
Ac asrosrelik ona.
Wangin mwet pulaik in lusrongol.
10 Scepter lun tokosra ac fah oanna sel Judah,
Ac fwilin tulik natul fah leum fin mwet Israel pacl nukewa.
Mutanfahl ac fah use mwe takma nu sel,
Ac pasrla ye mutal ac aksol.
11 El kapriya donkey fusr natul nu ke soko oa in grape,
Nu ke oa in grape soko ma wo emeet.
El oul nuknuk lal in wain su srusra oana srah.
12 Atronmutal srusrala ke nim wain;
Ac wihsel fasrfasrla ke nim milk.
13 “Zebulon el ac fah muta sisken meoa.
Molsron in acn sel ac fah acn in kawuk lun oak lulap,
Ac masrol lun acn sel ac fah sun acn Sidon.
14 Issachar el tia ekla liki soko donkey fokoko
Ma alsrangesr ac oanna inmasrlon mwe utuk lal.
15 A el liye lah acn in mongla uh wona
Ac facl sac pwar na,
Ouinge el kuruweni fintokol in us mwe utuk toasr uh,
Ac kumakinyuk el in orekma oana sie mwet kohs.
16 “Dan el ac fah sie mwet kol nu sin mwet lal.
Elos ac fah oana sruf saya lun Israel.
17 Dan el ac fah oana soko wet ma oan sisken inkanek uh,
Soko wet pwasin pe inkanek srisrik uh,
Su sro ac ngalis nien horse uh,
Ac oru tuh mwet muta fin horse uh in usrukyukla.
18 “LEUM GOD, nga tupan molela lom.
19 “Un mwet pusrapasr se ac fah anwuk nu sel Gad,
Tusruktu el fah forla ac ukwalos.
20 “Facl sel Asher ac fah oswe fokinsak wowo.
Kain mwe mongo ma fal nu sin tokosra ac fah tuku yorol me.
21 “Naphtali el oana soko deer lemnak ma kasrusr sukosok,
Su oswe natu fusr na wowo.
22 “Joseph el oana soko fain na ungung ma kap sisken infacl srisrik uh,
Ac oa kac uh fanukya fin pot uh.
23 Mwet lokoalok lal ah mweunel upana,
Ac ukwal ke mwe pisr ac sukan pisr natulos.
24 Tusruktu mwe pisr natul uh tiana mukuikui,
Ac paol akkeyeyuk ac aksuwosyeyuk
Ke ku lun God Kulana lal Jacob,
Su Mwet Shepherd ac Mwet Loango lun Israel.
25 God lun papa tomom pa kasrekom,
God Kulana pa akinsewowoye kom
Ke mwe insewowo ke af lucng me
Ac ke kof loal ye faclu,
Mwe insewowo ke tulik puspis ac ke un kosro puspis,
26 Mwe insewowo ke wheat ac ke ros uh,
Mwe insewowo ke eol ma oan oemeet me,
Ac ke ma wolana su tuku ke eol srisrik su ac oan nwe tok.
Lela mwe insewowo inge in oan fin sifal Joseph,
Fin mutunsron sie su pisrla inmasrlon mwet wial.
27 “Benjamin el oana wolf sulallal soko
El uniya ac okomla ma nal ke lotu ac eku.”
28 Sruf singoul luo lun Israel pa inge, ac pa inge kas in wilkas lun papa tumalos ke el sang kas in akinsewowo lal nu selos, fal nu sin kais sie selos.
Misa Ac Pukpuki Lal Jacob
29 Na Jacob el sapkin nu sin wen natul nukewa, “Inge ke nga ac misa ac som weang mwet luk somla, komtal fah pukinyuwi yurin papa tumuk in luf se ma oan ke acn sel Ephron mwet Hit,
30 in acn Machpelah, kutulap in Mamre in acn Canaan. Abraham el tuh molela luf sac ac ipin acn sac sel Ephron tuh in sie acn in kulyuk.
31 Acn se inge pa elos piknilya Abraham ac Sarah, mutan kial, we. Acn sac pacna pa elos piknilya Isaac ac Rebecca, mutan kial ah, we, ac pa pac nga piknilya Leah we ah.
32 Acn sac ac luf se we ah, ma moulla sin mwet Hit. Pikinyuwi we.”
33 Ke safla kas in wilwil lal nu sin wen natul nukewa, na el topla ona ac misa.