40
Kas Ke Finsrak
“Akwoye mwet luk,” God lasr El fahk. “Kowos in akwoyalos!
Akkeye insien mwet Jerusalem.
Fahk nu selos lah fal tari lusen pacl elos keok,
Ac inge ma koluk lalos iyukla.
Nga kalyaelos tari fal nu ke ma koluk lalos nukewa.”
 
Sie pusra wowoyak,
“Akoela soko inkanek yen mwesis nu sin LEUM GOD!
Sakunla innek yen mwesis uh nu sin God lasr!+ +
Infahlfal nukewa ac fah nwekyukla;
Ac eol ac tohktok nukewa fah akpusiselyeyuk.
Acn tohktok uh fah ekla acn tupasrpasr,
Ac acn siruprup ac fah akfwelyeyukla.
Na wolana lun LEUM GOD fah akkalemyeyukla,
Ac mwet e nukewa fah liye.
LEUM GOD sifacna El wulela ouinge.”
 
Na sie pusra wowoyak ac fahk, “Sulkakin pweng se inge!”
Na nga siyuk, “Pweng fuka nga ac sulkakin uh?”
“Fahkak lah mwet nukewa oana mah uh;
Wo lalos uh ac oanna ke kitin pacl, oana ros inimae.+
Mah uh ac uli, ac ros uh ac efla
Ke LEUM GOD El supwama eng in okla.
Mwet uh sukawil oana mah uh.
Aok, mah uh uli ac ros uh efla,
A kas lun God lasr oan ma pahtpat.”
Jerusalem, utyak nu fin soko eol fulat
Ac sulkakin pweng wo!
Zion, pangla ke sie pusra lulap;
Ac fahkak ke pweng wo se inge!
Kaskas akyokye, ac nimet sangeng.
Fahk nu sin siti lun Judah
Lah God lalos El summa!
 
10  LEUM GOD Fulatlana El tuku in leumi ke ku,
Ac us mwet El molela uh welul.+
11 El fah karingin un sheep natul oana sie mwet shepherd;
El fah orani sheep fusr nu sie
Ac kafiselosyak inpaol;
El fah kakasrisrik akfasrye kientop uh.+
Wangin Ma Ku In Lumweyuk God Lun Israel Nu Kac
12 Ya oasr mwet ku in srikeya meoa uh ke inpaol,
Ku srike kusrao ke sralapan paol?
Ya oasr sie mwet ku in nwanak fohk ke faclu in sie cup,
Ku pauniya eol ac inging uh ke sie mwe paun?
13 Ya oasr sie mwet ac ku in fahk nu sin LEUM GOD ma Elan oru?
Su ku in lotel, ku sang kas in kasru nu sel?+
14 Su God El lutlut se
Tuh Elan ku in etu
Ac kalem lah El ac oru fuka ma uh?
 
15 Yurin LEUM GOD, mutunfacl uh ma na pilasr,
Oana tul in kof sefanna in sie bucket;
Tuka ma oan yen loessula mulala oana kutkut srisrik ma eng uh uk.
16 Kosro nukewa ke insak in acn Lebanon
Sufalla nu ke sie mwe kisa nu sin God lasr,
Ac sak nukewa we sufalla in kalmateak sie e in kisa.
17 Mutunfacl uh ma na lusrongten se sel.
 
18 Su ac ku in lumweyuk God nu kac?
Kom ac aketeya fuka lah El oana mea?+
19 El tia oana sie ma sruloala ma orekla ke poun mwet,
Ma mwet orekma ke osra uh nokomla ke gold,
Ac oakiya in sie kahpu silver.
20 Mwet se ma wangin silver ku gold yoro
El sulela soko sak ma ac tia kulawi.
El ac konauk sie mwet tufahl pisrla
In taflela sie ma sruloala su ac tia topla.
 
21 Ya kom tia etu?
Ya tiana fwackot nu sum oemeet?
Kom tiana lohng lah faclu mutawauk fuka?
22 Orekla sin El su muta fin tron lal
Lucng liki faclu ac yen loessula liki yen engyeng uh;
Liyeyuk mwet ten uh oana mak na srisrik.
El asroelik yen engyeng uh oana sie mwe lisrlisr,
Oana sie lohm nuknuk mwet uh in muta loac.
 
23 El sisya mwet leum na ku
Ac aksrikyelosla nu ke ma na lusrongten.
24 Elos oana sak na fusr,
Ma tufahna yoki ac soenna okahla.
Ke LEUM GOD El supwama sie eng,
Ma inge ac uli ac sohkla oana mah pao.
 
25 Su God mutal El ac ku in lumweyuk nu se?
Oasr sie pac saya oana El?
26 Ngetak nu inkusrao!
Su orala itu ma kom liye uh?
El su kololosla oana sie un mwet mweun.
El etu pisalos
Ac pangon kais sie ke inelos.
Ke ku lulap lal
Tia sie selos ku in tuhlac!
 
27 Israel, fin ouinge, efu ku kom torkaskas mu
LEUM GOD El tia etu mwe elya lom,
Ac El pilesru keok lom ke sripen nununku sesuwos?
28 Ya kom tia etu? Kom tiana lohng?
LEUM GOD El God ma pahtpat.
El orala faclu nufon.
El tiana totola ku mulalla.
Wangin mwet kalem ke nunak lal.
29 El akkeyalos su munas ac totola.
30 Finne elos su fusr, elos munasla;
Mwet fusr uh ku in totola ac ikori.
31 A elos su filiya lulalfongi lalos in LEUM GOD
Ac fah aksasuyeyuk ku lalos.
Elos fah sohkak ke posohksok oana eagle uh,
Elos fah kasrusr ac tia totola;
Elos fah fahsr ac tia munasla.
+ 40:3 Mt 3:3; Mk 1:3; Jn 1:23 + 40:3 40:3–5; Lk 3:4–6 + 40:6 40:6–8; Jas 1:10–11; 1 Pet 1:24–25 + 40:10 Isa 62:11; Fwack 22:12 + 40:11 Ezk 34:15; Jn 10:11 + 40:13 Rom 11:34; 1 Cor 2:16 + 40:18 40:18–19; Orek 17:29