2
Musalla Lun Nineveh
Nineveh, ac mweuniyuk kom pa nge!
Ku se ma ac ipsrikikomi tuku tari.
Akoela mwet loang lom an!
Taran inkanek an!
Akola in mweun! (
LEUM GOD El akola in folokonak ku ac wolana lun Israel, in oana woiyen acn we meet liki mwet lokoalok elos kunausla.)
Mwet lokoalok elos us mwe loeyuk srusra,
Ac nukum nuknuk in mweun srusra.
Elos akola in mweun!
Chariot natulos sarmelik oana e uh!
Horse natulos rarala in tari kasrusr!
 
Chariot uh kasrla fin inkanek uh,
Sasot sasma in acn mwesas infulwen siti uh.
Elos kalmelik oana srokom in e,
Ac yuwot yume oana sarom.
Leum lun mwet mweun uh solsoleni.
Ingyak lalos uh oru elos tukulkul.
 
Mwet lokoalok uh kasryak nu ke kalkal uh,
Ac akoela acn in sunya sak in kunausla mutunpot an.
Mutunpot nu sisken infacl uh mulipwelik ikakla;
Ac mwet inkul sin tokosra arulana tuninfongla.
Kasra el sruhu utukla.
Mwet kulansap lal elos sasao oana wuleoa
Ac puok iniwalos ke asor.
Mwet uh kaingelik liki acn Nineveh,
Oana kof ma pisrelik liki dam fokelik se,
Pusra lulap se wowoyak ac fahk, “Tui! Tui!”
Tusruktu wangin mwet folokla.
 
Srukak kewa silver ac gold an!
Siti uh sessesla
Ke kain in mwe kasrup puspis!
 
10 Acn Nineveh kunanula, mwet uh kaingelik, ac wangin ma lula we!
Insialos kofelik ke sangeng,
Intwelos rarrar, mutalos efla,
Ac wanginla ku lalos.
 
11 Pia siti se
Ma tuh oana luf in lion ah in pacl inge?
Acn ma lion fusr uh tuh tohfla we,
Yen lion mukul ac lion mutan uh fahsri,
Ac lion fusr natultal mutana in misla?
12 Lion mukul uh ac uniya ma el sruokya nal,
Ac eiya in ip srisrik nu sin lion mutan ac lion fusr natul.
El nwakla luf sel ke ipin ikwa ma eiyuki.
13  LEUM GOD Kulana El fahk, “Nga mwet lokoalok lowos! Nga ac esukak chariot nutuwos an. Mwet mweun lowos ac fah anwuki ke mweun, ac nga fah usla ma nukewa kowos tuh eisla sin mwet saya. Sap ku su mwet utuk kas lowos tuh tafwekowos in fahkak ac fah tia sifil lohngyuk.”