31
Kas In Kasru Nu Sin Sie Tokosra
Kas inge kas oa nu sel Tokosra Lemuel sin nina kial:
“Kom wen kulo nutik, topken pre luk. Mea fal ngan fahk nu sum? Nimet kom sisla kuiyom ke inkanek in kosro, ac mani lom ke mutan; ma inge kunausla tari tokosra puspis. Lemuel, porongeyu. Tokosra uh tia enenu in nim wain, ku oasroasr ke mwe nim ku. Ke pacl elos nimnim uh, elos mulkunla ma sap, ac pilesrala enenu lun mwet ongoiya. Mwe nim ku uh ma na nu sin mwet ma apkuran in misa, ku elos su keoklana. Lela elos in nim mwe sruhi elos in mulkunla sukasrup lalos ac supwar lalos.
“Kom in sramsram in aol mwet su tia ku in sifacna fahkak enenu lalos. Karingin suwohs lalos nukewa su mukaimtal ac kofla in sifacna. Aolulos sramsram, ac oru kom in sie mwet nununku suwohs. Karingin suwohs lalos su sukasrup ac kwaco.”
Sie Mutan Payuk Su Pah In Ma Nukewa
10 Arulana upa in konauk sie mutan pah in ma nukewa! El saok liki wek yohk molo!
11 Mukul tumal uh filiya lulalfongi lal sel, ac el fah tiana enenu kutena ma.
12 Ke lusen moul lal nufon mutan se inge oru na ma wo nu sin mukul tumal, ac tia oru kutena ma koluk nu sel.
13 El kafofona in orek nuknuk ke unen sheep ac linen.
14 El use mongo nu lohm sel yen loesla me, oana ke oak wiwa kako uh oru.
15 El ngutalik meet liki lenelik ac akola mongo nu sin sou lal, ac fahk nu sin mutan kulansap lal ma elos in oru.
16 El suk sie ipin acn ac molela; el orekmakin mani el sruokya in yukwiya ima in grape se.
17 El sie mwet alken, ku, ac moniyuk in orekma.
18 El etu lupan kapak ke ma nukewa el oru, ac el orekma paht ke fong.
19 El sifacna orek turet, ac sang otwela nuknuk.
20 El kulang nu sin mwet sukasrup ac mwet enenu.
21 El tia fosrnga ke pacl ohu ke sripen oasr nuknuk fusrfusr lun sou lal.
22 El sifacna orala mwe loeyuk bed, ac el nukum nuknuk wowo orekla ke linen sroninmutuk.
23 Mukul tumal eteyuk in acn sel, ac el sie mwet kol we.
24 Mutan se inge el orek nuknuk ac mwe lohl, ac kukakin nu sin mwet kuka.
25 El sie mutan ku in mano su akfulatyeyuk, ac el tia elya ke pacl fahsru.
26 Kas lal uh lalmwetmet ac kulang.
27 El kafofo pacl nukewa, ac karingin enenu lun sou lal.
28 Tulik natul akkalemye insewowo lalos sel, ac mukul tumal kaksakunul.
29 El fahk mu, “Oasr mutan na wo puspis, a kom wo lukelos nukewa.”
30 Kulang uh mwe aklukukye, ac oasku uh tia kawil, a sie mutan su sangeng sin LEUM GOD fal in kaksakinyuk.
31 Kaksakunul ke ma nukewa el orala. Fallana mwet nukewa in akfulatyal.