22
[Psalm lal David]
Sie Tung In Keok Ac Soko On In Kaksak
1 God luk, God luk, efu kom ku fahsr likiyu?
Nga tung ke insiuk nufon in suk kasru
A wangin kasru tuku.
2 Ke len uh nga pang nu sum, God luk,
A kom tia topuk;
Nga pang ke fong
A nga tia ku in mongla.
3 Tusruktu kom muta fin tron lom oana El su Mutal,
Su mwet Israel elos kaksakin.
4 Mwet matu lasr meet ah elos filiya lulalfongi lalos in kom;
Elos lulalfongi kom, ac kom molelosla.
5 Elos tuh pang nu sum, ac kom molelosla liki mwe sensen;
Ac ke elos lulalfongi kom, elos tiana akmwekinyeyuk.
6 A inge nga tia sifilpa mwet se; nga oana wet soko,
Mwet nukewa srungayu ac aksruksrukyeyu.
7 Elos nukewa su liyeyu elos aksruksrukyeyu;
Elos yayaiyu ac isrunyu.
8 Elos fahk nu sik, “Kom lungsena lulalfongi LEUM GOD,
Efu El ku tia molikomla?
Fin pwaye LEUM GOD El lungse kom,
Efu ku El tia kasrekom?”
9 Kom pa akisusyeyula liki insien nina kiuk,
Ac karinginyu ke nga katitiiyuk.
10 Nga nuna lulalfongi kom e ke len se nga isusla ah me,
Ac kom nuna God luk.
11 Nik kom loesla likiyu!
Mwe ongoiya apkuranme
Ac wangin mwet in kasreyu.
12 Mwet lokoalok puspis apinyula oana cow mukul;
Elos rauniyula yen nukewa
Oana cow mukul sulallal in acn Bashan.
13 Elos mangelik oana lion
Su ngutngut ac kena kunausyula.
14 Ku luk wanginla,
Wanginla oana kof ma kahkla nu infohk uh.
Sri nukewa keik tufwaclik;
Insiuk kofelik oana kiris.
15 Kapinsrulyuk pulamlamla oana kutkut,
Ac louk fulfuli nu ke lac oalik lucng.
Kom sisyula oana mwet misa se infohk uh.
16 Sie un mwet koluk rauniyula,
Oana sie un kosro ngalngul su kuhlusyuwi
Ac ngalis pouk ac niuk.
17 Sri keik nukewa pisryak — ku in liyeyuk.
Mwet lokoalok luk elos ngetma ac suiyuwi.
18 Elos susfa ke nuknuk luk
Ac kitalik inmasrlolos.
19 O LEUM GOD, nik kom muta loesla likiyu.
Fahsru aksaye ac kasreyu!
20 Moliyula liki cutlass;
Molela moul luk liki kosro ngalngul inge.
21 Moliyula liki lion inge;
Wangin ku luk in lain cow mukul lemnak inge.
22 Nga fah fahkak Inem nu sin mwet luk,
Nga ac fah kaksakin kom ke pacl in tukeni lalos:
23 “Kowos mwet kulansap lun LEUM GOD, kowos in kaksakunul!
Mwet in fwil natul Jacob, kowos in akfulatyal!
Mwet Israel, kowos in alu nu sel!
24 El tia pilesru mwet sukasrup ku ngetla liki keok lalos;
El tia forla lukelos,
A El topuk ke elos pang in suk kasru sel.”
25 Nga ac fah kaksakin orekma lom inmasrlon walil uh;
Ye mutalos su alu nu sum
Nga ac fah oru mwe kisa su nga wulela kac.
26 Mwet enenu elos ac fah mongo nwe ke na elos kihpi;
Elos su suk LEUM GOD elos fah kaksakunul.
Lela tuh in wo ouiyalos nu tok ma pahtpat!
27 Mutunfacl nukewa ac fah esam LEUM GOD.
Liki acn nukewa fin faclu elos ac fah forla nu sel;
Kain tuhn nukewa fin faclu fah alu nu sel.
28 LEUM GOD El tokosra,
Ac El leumi mutunfacl uh nufon.
29 Mwet nukewa su ku in mano fah mongo ac pasrla nu sel.
Mwet nukewa su misa tari fah oayapa putati nu ye mutal,
Aok, mwet nukewa su sukawil moul lalos.
30 Fwil tok uh ac fah kulansap nu sel;
Elos ac fah kaskas ke Leum nu sin mwet in fwil tokolos.
31 Ac fah srumunyuk nu sin mwet su soenna isusla
Lah LEUM GOD El molela mwet lal.