66
Soko On In Kaksak Ac Sang Kulo
1 Kaksakin God ke pusren engan lulap, kowos mwet faclu nufon!
2 Onkakin Ine wolana lal,
Akfulatyal ke pusren kaksak wolana!
3 Kowos in fahk nu sin God, “Fuka lupan wolana lun ma kom oru!
Ku lom arulana yohk,
Oru mwet lokoalok lom elos sangeng ac putati ye motom.
4 Mwet nukewa fin faclu elos alu nu sum;
Elos on kaksakin kom,
Ac yuk on in kaksak nu ke Inem.”
5 Fahsru ac liye ma su God El orala,
Orekma wolana lal inmasrlon mwet uh.
6 El ekulla meoa nu ke facl pao.
Mwet matu lasr elos tuh fahsr sasla infacl uh ke nialos.
Kut arulana engan ingo ke sripen ma El oru uh.
7 El leum ma pahtpat ke ku lal,
Mutal ngeta liye mutunfacl uh.
Lela in wangin mwet tuyak lainul.
8 Kaksakin God lasr, kowos mutanfahl nukewa;
Lela in lohngyuk pusren kaksak lowos.
9 El karingin moul lasr
Ac tia lela kut in ikori.
10 O God, kom srike kut —
Oana ke silver ac liklikiyuki ke e,
Ouinge kom srike kut.
11 Kom lela tuh kut in putatyang nu in kwasrip
Ac filiya ma toasr finpisasr.
12 Kom lela tuh mwet lokoalok lasr in longkuti;
Kut fahsr sasla in e ac in sronot,
A inge kom sifil uskutme nu in sie acn misla.
13 Nga ac fah tuku nu in lohm sum wi mwe kisa firir;
Nga ac fah sot nu sum ma nga wulela kac.
14 Nga ac fah asot nu sum ma nga tuh fahk mu nga ac oru
Ke pacl nga tuh muta in ongoiya.
15 Nga ac fah sang sheep tuh in mwe kisa firir fin loang lom;
Nga ac fah kisakin cow mukul ac nani
Ac kulasr kac fah sowak nu lucng.
16 Fahsru ac lohng, kowos nukewa su sunakin God,
Ac nga ac fah fahk nu suwos ma El oru nu sik.
17 Nga pang in suk kasru sel,
Ac nga kaksakunul ke on.
18 Nga funu pilesru in fahkak ma koluk luk nu sel,
Leum El lukun tia lohngyu.
19 Tuh pwayena lah God El lohngyu;
El lohng pre luk.
20 Nga kaksakin God,
Mweyen El tia pilesru pre luk,
Ku sruokya lungse kawil lal likiyu.