69
[Psalm lal David]
Pusren Pang In Suk Kasru
1 Moliyula, O God;
Tuh kof uh lapak sun inkwawuk.
2 Nga tili in acn furarrar na loal,
Ac wangin acn nga in tu fac.
Nga oasr in kof loallana,
Ac noa uh apkuran in utiyuwi.
3 Nga totola in tung;
Kapinsrulyuk paola.
Mutuk munasla
Ke nga tupan kasru lom.
4 Elos su srungayu ke wangin sripa
Elos pus liki na aunsifuk.
Mwet lokoalok luk fahk kas kikiap lainyu;
Elos arulana fokoko ac kena in uniyuwi.
Elos oru nga folokonang ma su nga tia pisrala.
5 O God, ma koluk luk tiana wikla liki kom,
Kom etu lupan nikin luk.
6 Nikmet lela tuh nga in akmwekinyalos su lulalfongi kom,
O LEUM GOD Kulana.
Nikmet lela in nga pa pwanang pilesreyuk elos su alu nu sum,
O God lun Israel.
7 Ke sripom nga akkolukyeyuk,
Ac mwekin apinyula.
8 Nga oana sie mwet tia eteyuk sin mwet lik,
Ac oana sie mwetsac in sou luk.
9 Moniyuk luk nu ke Tempul lom firirrir in nga oana sie e;
Ac kas in akkoluk lun mwet keim putati nu fuk.
10 Nga sifacna akpusiselyeyu ke lalo luk,
Ac mwet uh fahk kas in akkolukyeyu.
11 Nga nokomang nuknuk in asor
Ac elos isrunyu.
12 Elos sramsramkinyu inkanek uh,
Ac mwet sruhi elos kinala on keik.
13 A funu nga, LEUM GOD, nga ac pre nu sum;
Topukyu, O God, in pacl kom sulela,
Topukyu ke lungse yohk lom,
Ke sripen kom akpwayeye wulela lom in molela.
14 Moliyula tuh nga in tia tili yen furarrar,
Langoeyula liki mwet lokoalok luk,
Ac liki inkof loal.
15 Tia lela sronot in afinyula,
Nikmet lela nga in walomla yen loal
Ku tili nu in kulyuk.
16 Topukyu, O LEUM GOD, ke wolana lun lungse kawil lom;
Ke pakoten lom, kom in forma nu sik.
17 Nikmet okanla motom liki mwet kulansap lom,
Nga muta in ongoiya lulap — topukyu inge!
18 Kaluku nu yuruk ac moliyula.
Moliyula liki mwet lokoalok luk.
19 Kom etu lupan kas koluk lun mwet uh keik,
Ac lupan akmwekin ac aklusrongten orek nu sik.
Kom liye mwet lokoalok luk nukewa.
20 Kas in akkoluk lalos kunausla insiuk,
Ac nga muta in ongoiya.
Nga finsrak mu ac oasr pakomuta nu sik, tuh pa wangin,
Nga nunku mu ac oasr mwet tuku akwoyeyu, a wangin.
21 Ke nga masrinsral, elos se pwasin,
Ac ke nga malu, elos se vinegar nimuk.
22 Lela tepu lalos in ekla mwe kwasrip nu selos;
Lela kufwa mutal lalos in mwe lusla nu selos.
23 Oru tuh mutalos in kunla,
Ac oru tuh fintokolos in munas pacl e nukewa.
24 Okoaung mulat lom nu faclos;
Ac lela kasrkusrak lom in ukwalos ac sruokolosi.
25 Lela iwen aktuktuk lalos in pisala,
Ac in wangin mwet moul lula in lohm nuknuk selos.
26 Elos kalyaelos su kom kai,
Ac elos kaskas ke keok lun mwet su kom kanteya.
27 Kom in simusla ma koluk lalos nukewa,
Ac tia lela elos in wi eis molela sum.
28 Lela tuh inelos in iyukla liki book in moul,
Ac lela elos in tia wi sikyak inmasrlon mwet suwoswos lom.
29 A nga muta in keok ac ongoiya,
Srukyuyak, O God, ac moliyula!
30 Nga ac fah kaksakin God ke soko on;
Nga ac fah akkalemye fulat lal ke nga sang kulo nu sel.
31 Ma inge mwe akinsewowoye LEUM GOD, yohk liki in kisakin cow,
Aok, yohk liki kisakin cow mukul ma matula ac oasr koac kac.
32 Ke mwet su muta in ongoiya elos ac liye ma inge, elos ac engan;
Ac fah mwe akkeye insien mwet su alu nu sin God.
33 LEUM GOD El porongalos su muta in enenu
Ac El tia mulkunulosla su muta in presin.
34 Kaksakin God, kusrao ac faclu,
Meoa ac ma nukewa loac.
35 Tuh God El fah molela Jerusalem
Ac sifil musaeak siti in Judah.
Mwet lun God elos ac fah muta we, ac acn we ac fah ma lalos.
36 Tuh fwilin tulik nutin mwet kulansap lal fah usrui acn inge,
Ac elos su lungse El, fah muta we.