15
Taahili a Moses
Malaa digau Israel mo Moses ga daahili gi Dimaadua i taahili deenei:*
Au e daahili hagaamu a Dimaadua
i ono mahi aamua i dono aali.
Mee ne haga abulu nia hoodo
mo digau ala e deledele nia maa
la gi lodo di tai.
Dimaadua la go dogu abaaba maaloo,*
go Mee dela ne haga mouli au.
Go Mee dela go dogu God,
gei au e haga hagaamu a Mee,
go Mee dela go di God o dogu damana,
gei au e daahili i ono mahi.
Dimaadua la tangada dauwa de madagu,
di ingoo o Maa go Yihowah.
 
Mee ne kili di llongo gau dauwa o
Egypt mo nadau waga gi lodo di tai.
Digau dauwa ala e maaloo dangihi
la gu maalemu i lodo Tai Mmee.
Di tai guu gahu digaula
gu aabulu gadoo be di hadu
gi tua di moana.
Meenei Dimaadua, doo lima
gau donu le e mahi huoloo,
gu hunahuna hagauwwou
madau hagadaumee.
Goe gu hunahuna o hagadaumee
gi oo mahi.
Do hagawelewele la gu ulaula
guu dudu digaula gii wwele
gadoo be nia geinga maangoo.
Goe ne ili di tai,
gei nia wai gu tuu gi nua,
gu wwae lua guu hai nia abaaba,
gei gu bagu ia gi tua loo i lala.
Di madau hagadaumee ne helekai boloo,
‘Au ga waluwalu digaula gaa kumi
ko au, gaa duwwe nia goloo digaula,
gei au gaa daa agu mee
ala e hiihai ginai au.
Au ga haga mmuu dagu
hulumanu dauwa
gaa dada nia mee huogodoo digaula.’
10 Gei deeai! Meenei Dimaadua,
Goe gu ili hua dau madangi gei di tai
gu lamuhi digaula gi aabulu gadoo be
nia baalanga daamaha gi lodo di moana.
 
11 Meenei Dimaadua, ma di god
koai e hai be Goe?
Ge koai e hai be Goe
dela e mogobuna huoloo ge dabuaahia?
Ge koai e hai be Goe
dela e hagamadagudia huoloo?
12 Goe ne dahi aga hua doo lima
gau donu gei henuailala
guu holo madau hagadaumee.
13 Goe gu haga huudonu au hagababa
i dau dagi au daangada
ala ne haga mouli Kooe.
Goe gu laha mai digaula gi do henua
dabu i nia mahi o mogobuna.
14 Digau o nnenua llauehe gu longono
gei gu mmaadagu.
Di manawa gee huoloo
gu i lodo digau Philistia.
15 Nia dagi o Edom
gu mmaadagu huoloo.
Digau maaloo o Moab
gu daamada gu polepole.
Gei digau Canaan
gu paagege nadau lodo.
16 Digaula gu mmaadagu,
gei gu uli nadau gai huoloo.
Meenei Dimaadua, digaula guu mmada
gi o maaloo, gei gu noho deemuu
i di nadau mmaadagu,
gaa dae loo gi di tanga adu gi daha
o au daangada, go au daangada
ala ne haga dagaloaha mai gi daha
mo nadau noho hege.
17 Meenei Dimaadua, Goe ne dagi mai
digaula gaa dugu i hongo dau gonduu,
go di gowaa dela ne dongo Kooe
belee hai do lohongo, go di Hale
Daumaha dela ne bida hau Kooe.
18 Meenei Dimaadua, go Kooe hua di
king ga hana hua dee odi.
Taahili a Miriam
19 Nia hoodo a di king o Egypt mono waga hongo henua mo digau ala e dele nia maa guu hula gi lodo di tai, gei Dimaadua gu haga mmidi mai nia wai gi hongo digaula, gei digau Israel gu hula hua gi di baahi dela i golo i di gowaa hua bagu ia.
20 Soukohp ahina go Miriam, tuaahina o Aaron ne gaamai dana mee hagatangitangi ‘tambourine’, gei nia ahina huogodoo ga daudali a mee mo di haga tangitangi nadau ‘tambourine’ mo di gagaalege. 21 Miriam gaa huwa taahili deenei gi digaula:
“Goodou daahili hagaamuina Dimaadua,
i Mee dela ne aali i dono mahi aamua.
Mee ne haga abulu nia hoodo
mo digau dele nia maa gi lodo di tai.”
Nia wai mmala
22 Moses ga dagi mai digau Israel mai Tai Mmee gi lodo di Anggowaa o Shur. Digaula nogo taele i nia laangi e dolu i lodo di anggowaa, digi gidee nia wai. 23 Digaula gaa dau i di gowaa dono ingoo go Marah, gei nia wai i golo le e mmala, e deemee di inu, deelaa di mee digaula ne haga ingoo di gowaa deelaa bolo ‘Marah’.* 24 Nia daangada guu hai nadau donu gi Moses boloo, “Gidaadou ga inu tadau aha?” 25 Gei mee gaa dangi gi Dimaadua, gei Dimaadua ga hagi anga dana bida laagau, gei Moses gaa hudu di maa gi lodo di monowai, gei nia wai gu humalia dono inu.
Di madagoaa deelaa, gei Dimaadua guu wanga ana haganoho gi digaula, gu hagamada digaula. 26 Mee ga helekai, “Maa goodou ga hagalongo mai gi di Au huoloo, gaa hai go nia mee ala e humalia, ga hagagila aga agu haganoho, gei Au hagalee hagaduadua goodou gi nia magi huaidu ala ne hai ko Au gi digau Egypt. Idimaa deenei Au go Yihowah di godou God dela e hagahili goodou.”
27 Nomuli, gei digaula gaa dau adu gi Elim, go di gowaa dela iai nia monowai uwa aga e madangaholu maa lua, ge mada hidu laagau niu, gei digaula ga haga duu aga nadau hale laa i baahi o nia monowai aalaa.
* 15:1 Hagagida 15.3 * 15:2 Pisalem 118.14; Isaiah 12.2 * 15:23 Marah: i nnelekai Hebrew le e hai dono hadinga bolo e mmala