2
1-3 Kaa aõbohe rỹire wiòhedỹỹna luuna‑wana Kristu‑ki, biòwana aõbo Deuxu Tyytybytyhy‑ki. Kohe, kia ibutumy Jesuisi Kristu kilehekỹ rỹire. Ibutumy tahe wiluumy boibeke, wiwesehyyle mohõtinybenyke, wii bitòrabutenybenyke. Tai tahe areysakre aòrarureny‑ki.
4 Iximy xiwederenyõmy. Tahe wiribi lahitximy boibeke, aõkõmy ixi‑di marãykynybenyke. Iny sohoji sohoji aõna aõnadirenyremy ixi‑di nohõtirenyõmy. Tahe hitxihitximy bòwidỹỹke iny sohoji sohoji iny witxira aõmydỹỹnana yrubudỹỹmy marãykywydynanyke.
5 Iwese Jesuisi Kristu inywitxira aõmydỹỹnana‑di rõhõtinymyhỹre wesele, kaiboho mohõtinybenyke.
6 Jesuisi Kristu juhuhyy raremyhỹ, Deuxule rarehãre. Deuxururu tahe rimyõhyyre.
7 Tahe iribi ritare kaò idi kodobehekemy deòdu weselemy. Tahe inyumyõ rimyre kaki inylemy rarekemy.
8 Tamy tahe ibinatyhymy nade itxeò‑ki rurukemy wahe. Ibutu aõbo kaki riwinyke heka, riwinyre. Tai tahe ibutu ratyre Deuxu Jesuisi risỹnyre. Ibutuni ratyre ini rare.
9-11 Kiani‑ò tahe ibutumy tatiowomy resekemy rỹire, biu mahãdu, bedeludu mahãdu, suwomy rỹira mahãdu. Tahe ibutu rybe witxira witxiramy iny rarybemyhỹre: —Jesuisi Kristu ibutu wedu rare. Deuxu inytybymy ibutumy reàlàmyhỹre. Kiamy waseriòre waluuduboho. Awana watxireriki tule iwitxira bede‑ki aratxikre hãrele. Deuxukihyyle atximahãbenyke. Warybe bityhynyke.
12 Aityhydỹỹna‑di òraru‑ribi bexitabenyke, bexiebenyke òraru‑txi ixelau.
13 Deuxu heka adeewina riwahinymyhỹre òbiti widỹỹna. Tiile riwiòhenanymyhỹre òbitina widỹỹna.
14 Uritere rybe binamy rybeõmy. Adeburemy iny iijeõmy.
15-16 Tai tahe inyõ rybe binamy umy rarybeõtyhy. Òbitityhymy boibeke kaiboho dori Deuxu riòremy toite. Kristu kodobehekreu, aòrarureny‑ki areysakre. Retare dori aõmydỹỹnana wihikỹõ ayreny‑ki.
17 Arurukewana ayreny‑ki rybe wihikỹmy rybe òraru‑ki, taile areysakre. Deuxu‑ò dori rexiwahinyre xiwena wesemy arurukremy wahe.
18 Kaiboho tahe wadi beysahyymy boibekre ixideewimy tahe adeereny arurukremy wãhãre.
19 Aõwesele Tximòtxi ayreny‑ò ariteònykemy idi watxiwãhãre. Jesuisi Inynyrỹ dee wikeki. Tai tahe arierykre timybo kaiboho toite wahe. Tai heka areysakre.
20 Tximòtxi tahe arawiòhenanyrenykre iny witxira witxira ratyre wahe.
21 Ijõ dori ixidile rõhõtinymyhỹre Jesuisi Kristu aõmydỹỹnana‑di aõkõ.
22 Tximòtxi tahe teerytenyte iwese riwawiòhenanyre wese Rybewihikỹmy rybe‑ki. Iwese tyby iriòre riwiòhenanymyhỹre wese Tximòtxi riwawiòhenanyre.
23 Aõbo wadee ròhònyke arierykreu, tai wylemy ayreny‑ò aditeònykremy idi watxireri.
24 Jiarỹ òsana tule wylemy Deuxu riwateònykemy wadi ratxireri ayreny‑ò.
25-26 Ijõ hãbuõ iteòdỹỹmy raruwãhãre ayreny‑ò, Epafroditu wahe. Tii wawana noduõ rare. Kaiboho juhuu wadee teteònytenyte wawiòhedỹỹdumy rarekemy. Tii heka awehityyrenymy rurumyhỹre. Tai tahe reòkesedỹỹnyreri kaiboho iwebinaduna‑ò taholatenyte. Tai heka òkesemy riwisỹnyre.
27 Inatyhy rare rurure inihe. Tahe Deuxu riruxetòenyreki riteytenyre. Jiarỹ tule Deuxu wadi raruxetòere. Tai rabedewoõhyyre aõwitxira witxiramy ratỹỹnymahãreki.
28 Tahe aõwesele ariteònykemy watxireri. Kaiboho beysabenykre kia araerymahãrenyre. Jiarỹ tahe urihimy‑ò arexielehynykre wanohõti yrena‑ribi.
29 Tii kedehemynykreu, tahe bididybedenykre biwowydynybenykre. Rexiòhãrunymy rare Kristu òraru‑ki riwawiòhenanykremy.
30 Tahe tii inihe heka rurure iòraru‑ki. Arokoreny‑ki tii riwawiòhenanyre.