4
4:1-12 Abraham Barago, Jo Nunda Ari Eveva Edo Ghusira Aimi, Jebugaeri.
1 Giti beká, namane Jusi embo da abua javo Abraham ava kotaeteri. Nu nange edo ghusira ava kote givu!
2-3 Jo nunda ari eveva edo ghusira aindae, God nundae ‘eveva’ saeri. Nunda ari eveva edo ghusira aindae, God nunda ari ekoko kote dodo, nundae ‘eveva’ saetira amo, namanenda abua Abraham, nu tofo sakai saeti. Avata jo nunda ari eveva eni aindae jo saeri. God da Geka eminge resira:
“Abraham God tumondusira aindae, God nundae ‘eveva’ sisira,”
God da Geka aminge resira. Ava sedo, Abraham barago nu jo tofo sakai saeri.
4 Moni genembo mave saramana use barira aindae, namonde jo joba sae eraera. Moni amo, nunda minori. Nu saramana kau mavega arira, ainda inononda barira. Eveva arira, mino eveva barira. O eko arira, mino eko ava barira.
5 God nu ari ekoko embo da mino ekoá mutaetira avata, nenda tumondari ava gosuse, nenda ari ekoko kote dodo, nendae ‘eveva’ seraira. Ava sedo, evetu genembo mave nenda ari eveva jo tumondae use, ne God vanembo tumondarera amo, God nu evetu genembo aindae ‘eveva’ sarira.
6 God amingarira aindae, evetu genembo ivuga use irarera ava kotise, David nunda Yaru Buku jokáda eminge gefusira:
7 “Evetu genembo mave, God nenda ari ekoko kote dodo, nenda ari sembae seghe fugarira amo, ne ivuga arera.
8 Genembo mave God nunda ari ekoko kote dodo, jo sekago kotae arira amo, nu ivuga arira.”
David aminge gefusira.
9-10 Namonde geka ava tegedo eminge kasama erera. Abraham jo rejo eni ae, nu taká tumondusira ava gido, God nundae ‘eveva’ sisira. Avori, kote gaore! Abraham nunda vika mendo anoso jo gafugae irise ainda gitida, nu God tumondetiri gido, God nundae ‘eveva’ sisira. Ava sedo, David genembo ivuga arira gefusira amo, jo namane Jusi embo vika mendo anoso gafugeraera aindae nembo saeri. Evetu genembo isambu mave tumonderaera aindae sedo, geka emo gefusira.
11 Abraham giti tumondetiri gido, God nundae ‘eveva’ sisira. Nundae ‘eveva’ sedo, amboda nunda tumondari da tano futuse, vika mendo anoso gafugare dae sisira. Ava sedo, mave vika mendo anoso jo gafugae irise tumondari gido, God nundae ‘eveva’ sarira, ainda numamo a jiro mo, Abraham nune arira.
12 Kotugo, nu namane Jusi embo da afa resena emo, jo namanenda tamo gafugeraera aindae sise saeri. Kau Abraham nunda tamo jo gafugae irise tumondedo ghusira aminga ava, namane tumonduse irera aindae sise, ‘nu namanenda afa’ resena.
4:13-25 God Beka Gagojuse Rea Mutari Sisira Ava, Jo Saramana Use Bae Arera. Tumonduse Barera.
13 God beka gagojuse, Abraham kena sisira, “Enda nane usena emo, ninda tofo a ninda sasingu da tofo arira,” Abraham God tumondusira aindae sedo, God aminge sisira. Abraham jo Agho Dari da emboroda+ ise ari eveva ari gido, aindae enda jo mutari saeri. Nunda tumondari ava gido, nundae ‘eveva’ sise, God nu beka gagojuse, numokena enda mutari dae sisira.
14 Ai resira amo, God beka gagojuse rea mutari sisira ava, evetu genembo mave Agho Dari kaifa e gogoghombuse baetera amo, namondeda tumondari soesa aeti, a God da beka gajari barago soesa aeti.
15 Avori, Agho Dari aimi God da janje eko budo foa gheraira. Ainda beká mo: Agho Dari futusira amo, jo kaifa ae eraera. O, Agho Dari jo mutae aetira amo, Agho Dari bejari da emboro jo sirorae aeti.
16 Avori, God nunda beka gajari amo, mave numo tumonderaera aikena tefo futusira. Amo, na Abraham da sasingu a imemesiri aindae resena. Kotugo na jo nunda oro beká Agho Dari budo irera, aindae nembo jo saeri. Mave God tumonderaera, ainda afa mo Abraham. Ainda beká mo: ne tumonduse, kau Abraham God tumondedo ghusira, aminga ava use irera.
17 God da Geka aindae eminge resira:
“Na ni esimbugetena aindae, ni oro mendeni mendeni da numamo aresa.”
Avori, God tofo setiri Abraham namonde tumondari embo da afa usira. A God resena emo, nu inono bekári. Nune seari ambari embo ambarida ghe jebugeraera. A nune seari roera tofo siroreraira.
18 God sisira, “Ni oro mendeni mendeni da numamo aresa,” setiri, Abraham ava tumonduse, beká sirorare dae sedo gigitusira. Rejodae gigitusira amo, jo numokena sirorari da kaugo iraeri. Avata nu tefode numonde gigitusira. Gigitiri, beká sirorusira. God da Geka eminge sisira, “Ninda sasingu digarigo sirorarera.”
19 Geka sisira ainda sifoda mo, Abraham nu ghaeko 100 ari dae use nunda tamo gido eminge kotisira, “Na embako beká eteni. Ava sedo ambari dae erena. A nanda evetu Sarah mo, erovari.” aminge kotisira avata, kotari amo dodo, nu tefode numonde tumondusira.
20 Nu jo manamana use, nunda tumondari doyae usira. Nu tumonduse God dae sakai sise fakina usira.
21 God numokena rea ari dae sise beka gagojusira ava, nune ari inono arira ava kasama use, Abraham nu God tumonde gogoghombusira.
22 A God Abraham da tumondari teria ava gido, nundae ‘eveva’ sisira.
23 Avata kotugo geka, “nundae ‘eveva’ sisira,” amo, God jo Abraham dae nembo saeri.
24-25 Namonde barago kotise, God aminge setiri gefuseri. God nu namondeda Bajari Iesu setiri, namondeda ari ekoko da mino mutari dae sedo, fira ambududurusira. Ambiri, namondedae ‘eveva’ sari dae sedo, God sekago setiri Iesu ambarida ghe jebuge erorusira. Ava sedo, namonde God evia tumonderaera aindae, God ‘eveva’ sarira.