11
1 Keu kateai louito vavue idi egete mai daoi loui avoe “Hovelahai talive Dilava dubu baluga ke vavuai Dilava hoesehavomale batabata keta vavuanela. Isi dubu kemo guliguliamale kebia dodave.
2 Isito heie dubue ologo ke halenela. Ainaho ke vavualive. Kosealemo atae toela keau heie vata ke mai keve ua. Iale abuna vagana abuita igaeta isi bata sigisi (6) ke uvumo keve ui Dielusalema oe tumu ke aiohavoi.
3 Iale vani kela dana di hoto loumale esemu abuita hanavege abuna ogo bukate vai vani koseale uani taoseni tu handele siksti (1,260) ke uvumo Dilava hoto loui ata haivei.”
4 Vata bahatae biage Dilava ke vudimo laviale esemu abui keabulike olive idi isi hati abui kebia.
5 Iale atabena isiviai kebia haveho vage venena aiabemo lohoniege ke hamai. Kosealemoike oleuoleu isiviai Dilava esemu abui kebia aiogeveliege keabuna haluvisi.
6 Keau vuvune maleale kemo abuna Dilava hoto lousege veniu bae otogomo loholivebene. Isi keau vuvune mole maleale kemo abuna louge e hana keabuna taholahai. Isi abuna isivilahaliege vaveve toela onoleonole vatae hanavoge auna vata aiohavoi.
7 Ige esemu abui keabuna hoto ke louliege gabilahasege kumoe umale kemo ata mole ovo aihanite nahate kena lohoniege ata abui kebia aiogevei havege abuna haluvisi.
8 Keabuna haluvige ataeau bae malevei abavuevelivebene. Isito halevege abuna o baluga ke humahadae ladevei ui. O keveike abu ata abui kebia Kosive mai idimo hamalu. Katealemoike Kosiveu o ke ivihai avoe, “Sodoma o Egubito.”
9 Ige vatamo ata bahata, hoto bahata, valada bahata kebiamo ataeabuna loholiege vani abuita igaeta ke uvumo vavaeabe elegeveito malevei abavuevelivebene.
10 Vani ke uvumo abuna vahaeholahai havulahai moleho onobenobe hanavoi loui kosea, “Ata abui keau haluviale keu duave.” Abu hoto kateale louale keu koseanu. Ata abui keau vatehani baluga mai vatae ata ovelu.
11 Abuna katelahasege vanie ni abuita igaetaeau uoholige vani mole ke vanie lilimo Dilavana ata abui kebia lu ovege keabuna hovedevei. Ige ataeabuna kebia elegevei tetelahai.
12 Isege hoto molena otogomo lohoniege hoai ata abui kebia namigevei kosea, “Vealuvisi kove lohove.” Kateai louge aiogevemale ataeabuna nibievesege ata abui kebiabuna goemo otogoe tai.
13 Abuna katelahasege o baluga keve hamu balugana hatuge o ke vaki mole (1/10) kemo o moagana dobuluvige ata moagamoaga seveni taoseni (7,000) keabuna haluvisi. Isege ata degomole nita uale keabuna vabulahai Dilavau otogoe umale ke hoesehavoi loui kosea, “Otogoe Kosive keu baluga.”
14 Kibi sigisi (6) kemoike vaveve toela kateale abuna lohoi. Isege kibi mole igae uale ke vavevetana bae lohoi.
Kibi seveni (7)
15 Ige anelu seveni (7) keu au kibi mai uvuge otogoe ataeau baita loui avoe, “Nahie Kosiveu abu moti abu vuvunemo nova abuna bae vata mai vani bahata vatae ata nibievegei.”
16 Katelahai louge eloda tuenti voa (24) Dilava vudimo uguiavoale keau abu kome bokoai vata bisi Dilava hoesehavolu.
17 Isi loui avoe,
“No Dilava, au vuvunete.
Au subuta ui aike umale Kosive a.
Iale no vahaeholahalu.
Kosealemo a vuvune baluga kemo aike vatae ata nalievema.
18 Isege atae toelaeau aho itumu balugalahalu.
Isito a itumue vanina aike abuemo bae lohoi.
Vani kemo haluviale keabuna hovedevege ana vaveveabe kaova.
Isi vani kemo a beloveta esemu kebia isi ata bahata oleuoleu a vabuhavomale ata baluga mesoho atae ese kebia ibina ana ovenela.
Isi oleuoleu vatae ata aiogevemale kebia ana vani kela aiogevenela.”
19 Eloda keau kateale lougeto otogoe Dilava dubue udahau alavonu. Ige ke uvue maua mole Dilavau au menaka louge abu ke hisaliai mai maua ke uvue mavoale keu ua. Iale udaha keu alavosege hatau nivolekai luluanu. Ige hamu hatuge aisi baluga keau otogomo keiohovolu.