13
Metona ago gira ma yuata sina
Mina bi nai uru regode nigo mini ya rofu odi digida. Bura reyo kana, “Amiye yokoi nitourage regori, bi amiye remanu o regode bi ini ago dabi risi niyainedi.” Na yaku sena vegu no regamadi vene ma bouna vene ago gira maraka.* Gua na ini nemokori amena de, ka ago gira maida, uru remanu odi bae nesi reyaka kana: ye dudusa dairigida vonisi, bi ini kaunava magida, adina Keriso yaku na dudu, mina ago nido mina bi rama di beika baika baku rededi. Ina bi ya fafau yau de nido, idu yi fogori bi yeiva iniye. Adina yau ninari, moi satauro ikoko reyadi, idu gua Sei di vava dudu amedo. Ini adina ini ideri una ka yau nisifa, idu Sei di vava dudu inasa amegifa ya dada.
Ya kaya yi uka vei mona refa ya bi mokena vari gira aena nufa ba ide. Ya kaya ebene refa. O Iesu Keriso yi uka mekori amedo, mina ya kaya mokededi ba ide? O rama ya kaya ebene resi no baku reyadi baeko! Nai uka mokena bi una yaku uniye ebene resi no baku de reyafa, mina veitao regedi. Idu gua, ya yaku vegu no yokoi ga reyaganedi Sei rofu usa usa nisifa. Uni ura bi diya uniye ebene resi no yokoi baku de reyafa oteimagifa, idu ya yaku vegu rama reyaganedi dada, yi mokenari una ka no baku reyafa. Adina ago rama fafau vegu yokoi anua regifa, idu ago rama fafau maka moimai rebigifa. Ini adina una yau nisifa ma ya yeiva nidediri, bi ada resifa. Uni usa usa ya rofu nisifa bi ya yaku rorobo iniye niyaganedi. 10 Mina dada, na ya maikeri amegasa mina bura reida, ye ya rofu bae negasa na yaku ya moi are rei gira resi ukero vau de regika, Varika amiye di vava na maro bi ago gira gira dudu, ya moi odoro regika.
11 Usika ourena, metonari ada refo. Rorobo iniye nina baku resi ya kaya ya kaya moi aedesi uka yokoi maka nisi uka amuta dudu vegu amebifo; resi uka mana ma amuta nina di Sei bi yasa amebiyaine.
12 Ya kaya ya kaya yuata nigasa ekalesia vene di fuka refo.
Sei di vene tau gade ya yuata nifeideyadi. 13 Varika amiye Iesu Keriso di buni tora gade ma Sei di uka mana ma Vima kikifa di auta rena bi ya noibanusa ameyaganedi.
13:1 Deut 17.6; 19.15 * 13:2 maraka; bura bedakai masi bura reyaka nufa. 13:7 nisifa; bura bedakai nida nufa.