24
Iesu bi dadi rae reyo
(Mt 28.1–10; Mk 16.1–8; Jn 20.1–10)
Idu ari uveyori uriyaku gorogoro iniye, fura di ourena medari, rema vene dadisi guri sanari sisika buni muramura sena dogo reyadi mina moi boyadi. Resi veyadi bi mina guri di ida venari fore bi sena moi kurevai rei etagae riyadi. Idu dui regasa Iesu Varika amiye di roaita baku de reyadi. Mina ini mokena moi forovai reyori, bi amiye remanu ina atafu are reyadi, kaere ini varuka bi kama kama iniye. Ma ori resi ini seira kono rofu agu riyadiri, bi mina amiye remanu yaku nikabai reyadi, “Beika resi vegu amedo amiye bi muyena vene di fogori maina rededi? Ina bi minari de amedo; bi dadi rae reyo. Galilee ri amegasa beika sina ya nigamo bi mokededi ba ide? Yomakai niyo, ‘Amiye di mida bi vegu no rededi vene di vanari aesi satauro ikoko regedi, idu meda regodenu koina nigori bi dadi rae rego.’ ”
Ini ago kamini mokesi guri sanari gutuna dairisi bi beika tau vata niyadi mina amiye 11 ma ini usi dina vene be rofu nioteimaradi. 10 Mina rema bi Mary Magdalene, Joanna ma Mary, kaere bi James di nono; ma rema be ina venesa yaku mina vegu nifeidena vene rofu niyadi. 11 Idu mokeyadi mina rema di sina bi ago tavoi niyadi, ye mokena vari gira de aeyadi dada. 12 Idu Peter bi dadisi raga bosi guri sana ideri agu risi dui regasa varuka buni maka veyo. Kamini beika vata niyo mina tururu regasa ini yavari dairiyo.*
Emmaus rautu rofu nana rena
(Mk 16.12–13)
13 Mina medari, Iesu di usi dina amiye remanu bi rautu roka Emmaus ri bogamadi, Jerusalem gutuna ini maike bi 11 kilometre kana. 14 Ina remanu bi mina beika tau vata niyo mina nidodi regamadi. 15 Mina sina nigasa nidodi regamadiri, bi Iesu iniye bi ina vene atafu nisi kamini vakoi bogamadi. 16 Vegamadi mini, idu de vei mama regamadi ina bi Iesu. 17 Kamini niyo, “Ya vene bi beika sina nigasa didedi?”
Kamini ini ne uruma bi iriyeduka dudu are reyadi. 18 Ina remanuri, bi yokoi di roka bi Cleopas, ina yaku kamini nikabai resi niyo, “Ya bi Jerusalem ri odi okiyo amiye baeko, dada ya toto mina meda be koina niyori beika vata niyadi bi?”
19 Kamini bi ina vene rofu niyo, “Beika vata niyo?”
Ma ina rofu niyadi, “Iesu Nazareth amiye rofu nisifa, kaere bi Sei di ago nido amiye. Ina bi ini ago ma ini reremama bi yeiva iniye Sei ma amiye di nemokori. 20 Ma uni Sei ma amiye utari naivo vene di varika vene ma uni ourefeidena vene yaku gokai iniye ini vanari moisi muyena ida risi satauro ikoko reyadi. 21 Idu uni uka mokena regamafa bi ina bi Israel vene erufugo amiye! Mina beika vata niyo bi meda regodenu koina niyo mini. 22 Idu gua uni rema vene be yaku una moi tururu reyadi. Uriyaku gorogoro guri sanari bosi 23 bi ini roaita de baku resi dairi desi niyadi bi yaduka kana naivo naivo vima ka veyadi. Mina naivo naivo vima yaku nioteimaradi bi vegu niyo. 24 Be vene unasa bi kamini dadi guri sanari bogasa bi rema vene yaku niyadi kana makai baku reyadi, idu Iesu bi de veyadi.”
25 Kamini Iesu yaku ina vene rofu niyo, “Ya vene bi ada de iniye; yi mokena bi mukuna tora. Sei di ago nidedi vene di ago tau bi mokena vari gira de aededi! 26 Ba rorobo ide, Keriso bi mina kana esika moisi ini vabara moigo?” 27 Kamini Moses gutuna Sei di ago niyadi vene tau rofu ago buni tau gaderi ina dada bura reyadi sina di rama mina ni-itara reyo.
28 Kamini bogasa rautu ekaira reyadi, idu Iesu bi ebu rei digo kana dudu nana reyo. 29 Idu guyaguya nisi niyadi, “Unasa amevo; uriyenau kamini niyo, ma doba de urusa nigo.” Dada ina venesa amegi dui rei boyo. 30 Ina regodenu iruku irigi ameinu reyadiri, bi Iesu yaku beredi moisi buni tora gade masi bi okusi ina remanu maro. 31 Minari mamo ini nemoko areyadi, bi vei mama reyadi ina bi kaere, ma ini neri roro nisi diyo. 32 Iniye iniye rofu niyadi, “Uni uka ita kana vaido, idau baegamafa, ago nigasa Sei di ago di adina mina ni-itara regamori.”
33 Minari maka dadisi Jerusalem ri dairiyadi. Iesu ini usi dina amiye 11 ma amiye be inasa bi minari egogo resi amededi baku reyadi. 34 Ka niyadi, “Rama Varika amiye bi dadi rae resi Simon rofu ogau niyo!”
35 Ina remanu yaku idau beika vata nigi kora reyo ma gokai vei mama reyadi beredi okuyori ni-itara reyadi.
Iesu yaku ini usi dina vene rofu ogau niyo
(Mt 28.16–20; Mk 16.14–18; Jn 20.19–23; Acts 1.6–8)
36 Mina vegu fafau nigamadiri, bi Iesu iniye ini utari are resi niyo, “Uka amuta bi yasa ameyaine.”
37 Idu ina vene bi ori yaku no iniye iniye nisi ini mokenari bi muyena vima yokoi vegamadi. 38 Idu Iesu yaku niyo, “Beika resi yi mokena forovai redo ma yi uka deda nikaitena mina baededi? 39 Nai yuka vana vefa, mina bi na mini; na avaka moisi vefa. Adina vima bi musa ma nena koina ma na vededi na bi nai musa ma nena nufa.”
40 Mina ni vau resi bi ini vana ma yuka oteimaro.§ 41 Idu tururu reyadi ma ada yaku no iniye niyadi, ye bi ofa ba rama mokena moi forovai reyadi, dada Iesu yaku niyo, “Iruku keika be amedo ba ide?” 42 Oyena kiro reyadi di tu yokoi** maradi 43 ma ini nemokori moisi iriyo.
44 Resi niyo, “Mina bi nai ago yasa amegasa nigamaka: na dada beika tau bura reyadi Moses di ago girari, Sei di ago niyadi vene di burari ma Psalms bukari. Mina tau bi baesi rama aeyaine.”
45 Dada Sei di agori beika bura reyadi vei mama reyaganedi ini mokena moi vabara risi 46 niyo, “Yomakai bura reyo: Keriso bi mina kana esika moigo ma meda regodenu koina nigori, bi muyena sanari dadi rae rego. 47 Dada Keriso di roka dudu vegu no feresi moi etagae rina ma vegu no koite makuna di ago ouresi Jerusalem gutuna gagani gagani vene tauri disi nirausi rei diga boga reyagane. 48 Ya vene yaku mina vegu tau bi yi nemokori veyadi mina oteimagedi. Mina dada ya vene yaku nirausi regedi. 49 Dada, nai Baba ya magi nitore reyo, bi na mina ya vene fafau nifeidei degida. Kamini ya bi†† taoni ideri tua regedi bogo mina vava yaku ya fafau nivai rego mamo.”
Iesu bi omari afei boyo
(Mk 16.19–20; Acts 1.9–11)
50 Kamini Iesu yaku ina vene taoni gutuna afei boyo Bethany atafu, ini vana moi odoro resi ni buni tora gade maro. 51 Mina buni tora gade magamori, bi ina vene rofu etagae riyo ma oma odoro afei boyo.‡‡ 52 Ina vene yaku nivakesi ada tora iniye dudu Jerusalem rofu dairiyadi. 53 Kamini Sei nivakena yavari ari neinei Sei rofu buni tora gade magamadi.§§
24:6 Mt 16.21; 17.22–23; 20.18–19; Mk 8.31; 9.31; 10.33–34; Lk 9.22; 18.31–33 * 24:12 Bura bedakai bi nanaka 12 nufa de. 24:13 11 kilometre: Greek agori mina bi 60 stadia. 24:36 resi niyo, “Uka amuta bi yasa ameyaine;” bura bedakai mina ago nufa de. § 24:40 Bura bedakai bi nanaka 40 nufa de. ** 24:42 Bura bedakai ka ma kaoro di ona nufa. †† 24:49 Bura bedakai ka Jerusalem nufa. 24:49 Acts 1.4 ‡‡ 24:51 ma oma odoro afei boyo; bura bedakai mina ago nufa de. §§ 24:53 Bura bedakai ka Rama nufa.