Paul di bura
Philippi vene
rofu
Ago di ini adina
Paul di bura Philippi vene rofu bi Europe gagani torari Paul di ourena dubu rofu bura reyo. Philippi taoni bi Macedonia gagani di taoni tora. Paul dibura yavari amegasa mina bura reyo, adina mina ariri, ekalesia moimai vene bedakai yaku ina rofu tourage reyadi ma ini mokena forovai reyo dada. Ini uka ka esika reyo, Philippi duburi ofa ago oteimagamadi dada. Idu ka ada rena ma mokena gira rofu bura reyo, ini mokena vari gira aena tora iniye Iesu Keriso rofu dada.
Mina bura di ouresi ago bi Philippi ekalesia vene fafau buni tora gade magika beika baika Paul rofu maradi, ini gugura fore de niyo medari. Ye makai ini mokena egira reyo, ina tau vakoi di esika ideri. Ina vene rofu usa usa niyo bi Iesu Keriso di ave nina moisi iniye maka ga mokesi ma ina kaya roka niodoro ga reyagane. Dudusa niyo ini vegu bi Keriso ideri, ma mina bi Sei di buni tora gade ini mokena vari gira aena dudu moiyadi; bi Jew vene di ago gira di reremama dudu de moiyadi. Bura reyo bi amiye tau gade, kaere Keriso ideri amegediri, bi Sei yaku ada rena ma uka amuta mago.
Mina bura di ago tora bi ada rena, mokena gira, uka yokoi maka nina, ekalesia vene di mokena vari gira aena ma vegu rofu toga moimai reyaganedi. Ini ago ka bi Paul yaku Philippi ekalesia vene rofu uka tora gade maro.
Beika sina ideri
Ago di ini adina 1.1–11
Paul di vegu amena 1.12–26
Keriso di vegu 1.27—2.18
Timothy ma Epaphroditus rofu nirorotari rena ago 2.19–30
Tuma vene ma no di nidiba rena ago 3.1—4.9
Paul ma ini Philippi asiyaka vene 4.10–20
Metona ago 4.21–23
1
Mina bura bi na Paul ma Timothy gutuna, kaere bi Iesu Keriso di moimai rei tavoi resifa vene —
Sei di vene tau gade Iesu Keriso ideri kaere bi Philippi ri amededi, ekalesia vene di ourefeidena vene ma ini naivo rededi venesa rofu:
Uni Baba Sei ma Varika amiye Iesu Keriso di buni tora gade ma uka amuta ya maragane.
Paul di usa usa nina ini bura vededi vene rofu
Ya rofu ari neinei mokegasa ya fafau nai Sei rofu buni tora gade maida; nai usa usa nina tau gaderi, ya vene tau gade fafau bi toga usa usa nida ada dudu, adina nasa ago buni di moimai rena kora reyafa baeyo gua mini, bi ya yaku na aedeyadi. Ma rama iniye na diba, kaere yaku mina moimai buni yi ideri kora reyo, bi moi raga rei bogo Iesu Keriso di dairina medari mamo koina nigo. Nai amutena ya rofu bi rama, adina ya vene bi toga toga nai mokenari! Adina ya tau vanu bi Sei di buni tora gade nasa rau reyadi, na gua dibura yavari ameida ma sena etofarori ago buni moi odoro risi egira regamaka. Ye gokai reyaka bi Sei yaku ninegau redo, Iesu Keriso yaku ini uka ya mado kana, nai uka ya mai vau reida.
Resi na usa usa nida yi uka mana bi besa besa toga tora nibobiyaine, yi mokena vabara ma vei dogo rena tau gade dudu, 10 ye beika buni vayavaya bi vei mama resi auba regedi. Mina yaku regedi ma ya bi vegu no yokoi de ma butigi yokoi de, bogo Keriso di dairi dena meda okigori. 11 Ye yi veguri bi mokena rorobo butu risi moi vata baego; mina bi Iesu Keriso dudu baego, ini vabara ma Sei di roka moi odoro rina rofu.
Vegu amena bi Keriso di
12 Nai usika ourena, na ura reida ya diba niyagane, beika na rofu ogau niyo bi rama iniye ago buni moi raga regika aedeyo. 13 Mina resi kini di ourefeidena yava di iya rededi vene noibanu ma amiye tau vakoi yaku diba niyadi na bi diburari, Keriso dada ameida. 14 Ma nai usika ourena tau Varika amiye rofu mokena gira aeyadi, na diburari ameida dada, ye uka bubu besa iniye dudu ori yokoi de resi ago* niokudedi.
15 Rama, bedakai bi gonema ma ebu regika ruda rena dudu, Keriso di ago nirausi rededi, idu bedakai bi uka buni dudu rededi. 16 Mina vene bi uka mana dudu rededi, ye diba niyadi bi ago buni rofu ruda rena moimai regika, na minari aeyadi dada. 17 Bedakai vene bi ebu regika ruda rena dudu Keriso niokudedi, uka buni dudu de, idu mokededi bi nai diburari amebinari, esika na magedi.
18 Bi beika yokoi de! Na ada reida bi ida tau vakoi dudu, mokena ofa dudu o ago rama dudu, Keriso di ago niokudedi. Rama resi na bi ada regida, 19 ini adina, bi na na diba yi usa usa ma Iesu Keriso ini Vima di ini aedena dudu, na bi erufugedi. 20 Na uka mokena dudu amutegida bi maena de iniye regida, idu yeiva tora dudu, gua ma toga toga nai roaitari Keriso nivava regida, veguri ma muyenari. 21 Adina na amegida bi Keriso di mini, ma muyegida bi asanu regida di mini. 22 Ye toga ameibobigida vonisi, bi moimai buni ma tora regida. Ye na na toto goina ere kamini auba regida. 23 Ye na rofu bi gira nido, mina remanu di utari goina ere bi auba regida. Na ura reida mina vegu feresi Keriso sa amegida, goina bi toga buni iniye; 24 idu besa ameibogida bi buni iniye ya dada. 25 Adina mina bi rama mokesi diba nida na bi ya aedegika ameibogida, yi mokena vari gira aena di ada renari raga rebiyainedi. 26 Ye dudusa ya baku regidari, bi na dada Iesu Keriso di roka toga besa moi odoro rigedi.
27 Keriso di ago buni dada, yi vegu amena di ida nari refa, ye na bosi ya vegida ba de vonisi, bi ya fafau ago buni neidegida; ya bi gogo vima yokoi makari are resi mokena yokoi maka dudu, mokena vari gira ago buni rofu aena, mina rofu ruda regedi. 28 Ma ida yokoi dudu yi tuma vene rofu ori ga refa; adina mina oteimado bi moi no rigo, idu ya moi vegu rigo, bi Sei di. 29 Ini adina Keriso rofu ya maro; ina rofu maka de mokena vari gira aeyaine, idu ka ina dada esika esika mago. 30 Gua ya vene bi nasa mina rudari are regifa. Mina ruda yokoi maka sena na veyadi, ma neidededi na toga ruda rei baeda.
1:1 Acts 16.12 1:13 Acts 28.30 * 1:14 ago; bura bedakai Sei di ago nufa. 1:30 Acts 16.19–40