John di
Niokuna sina
Ago di ini adina
John di niokuna sina di bura reyo ariri, ekalesia vene esika esika maradi ini mokena vari gira Iesu Keriso bi Varika amiye aeyadi dada. Bura reyo amiye di ago tora bi ini bura vededi vene uka mokena ma egira rena ago masi esika esika ma toe moina di medari, toga toga ini vegu buni reyaganedi usa nigika.
Mina buka di sina sina tora bi niokuna sina bedakai sui ago dudu; mina bura reyo medari ekalesia vene bi ini sui ago diba niyadi, idu amiye idana bi toto. Mina buka di sina sina bi ida idana idana dudu, niokuna sina tau ideri dudusa bura reyo. Amiye di mokena mina buka di ago rama bi idana idana, idu ini adina bi mini: Sei yaku Keriso Varika amiye dudu ini tuma vene tau gade Satani sa uketo rego. Sei ini u vau rena vegu koina nigori, bi ini mokena vari gira aena vene buni tora gade mago; mina bi oma ma kono ruaka.
Beika sina ideri
Ago di ini adina 1.1–8
Ouresi niokuna sina ma bura dubu 7 rofu 1.9—3.22
Buka firo riyo ini biri rina gauna 7 sa 4.1—8.1
Kibi 7 8.2—11.19
Siya ma tuma dona nadina remanu 12.1—13.18
Yaduka kana bedakai 14.1—15.8
Sei di gubuyo di dodoku 7 16.1–21
Babylon moi kekevata una ma tuma dona nadina, ofa ago nido amiye ma Satani u vau rena 17.1—20.10
Metona kota aena 20.11–15
Oma ruaka, kono ruaka ma Jerusalem ruaka 21.1—22.5
Metona ago 22.6–21
1
1 Mina bi Iesu Keriso di niokuna sina sina Sei yaku ina maro, ye beika meda atafuri, vata niyainedi ini moimai rei tavoi rededi vene oteimago. Mina ago ini naivo naivo vima dudu ini moimai rei tavoi reida amiye na, John rofu nifeideyo,
2 kaere bi Sei di ago ma Iesu Keriso di niokuna ago tau veyaka mina niogau reyaka.
3 Buni tora gade bi amiye, kaere mina beika vata nigo sina di bura veyaine ma buni tora gade bi amiye, kaere beika ideri bura reyaka neidesi reyainedi, adina ari bi atafu niyo.
Yuata nina dubu 7 rofu
4 Na John yaku dubu 7 Asia gaganiri rofu bura reida:
Amiye kaere amedo ma ameyo ma amego, ma vima 7, kaere bi ini ourefeidena amena fata di budari amededi, bi buni tora gade ma uka amuta ya mado.
5 Ka bi Iesu Keriso rofu, kaere bi vegu rama rena amiye, ago niokuna amiye siko muyena gutuna dadi rae resi kono tora noibanu vene di kini di ourefeidena amiye.
Ina yaku una uka mado ma ini dava dudu uni vegu no erufusi
6 ini Baba Sei naivo regi, ini ourefeidedo vene ma Sei ma amiye utari naivo vene kana una riyo. Ye ina rofu bi vabara ma vava iniye toga toga ameyaine! Rama.
7 Ve kumo, ina bi seuyasa dego ma amiye tau vanu yaku imiyadi amiye vegedi. Mina kono tora di amiye tau noibanu ina dada isaka nigedi. Ye mina bi rama iniye!
8 Varika amiye Sei yeiva iniye kaere amedo ma ameyo ma amego yaku niyo, “Na bi ouresi ma gabi mamo.”
Keriso di niokuna sina yokoi
9 Na bi John yi dubuini, ma Sei di ourefeidena amena sana dada, toro rena dudu, duku risi Iesu dada vakoi toe baku reyafa, adina Iesu yaku ago rama moi negau riyo ma na yaku Sei di ago niogau reyaka dada, motumotu roka Patmos ri na aeyadi.
10 Varika amiye di medari, na bi Vimasa nivakegasa kibi kana goroka tora nai fufutari neideyaka.
11 Yomakai niyo, “Beika veisa bi bukari bura resi dubu rofu mina taoni 7 ri moi feide: Ephesus, Smyrna, Pergamum, Thyatira, Sardis, Philadelphia ma Laodicea.”
12 Kamini goroka yaku na ago nimagamo vegika kero regasa goro ramefa aena gugura 7 veyaka.
13 Ma ramefa aena gugura utari, bi Amiye di mida kana, varuka doba akugamo mina ini yukari nei rovai reyo ma ini kokobari, bi goro berota yaku dai reyo.
14 Ini ada iye bi feyo mamoe di ueta kana, feyo tayataya aisi kana, ma ini nemoko bi ita fairo kana.
15 Ini yuka bi auri roka bronze ita vavari aeyo ma kama reyo kana, ma ini goroka bi aba tora makuna di kukuroka kana.
16 Iya 7 ini vana ramari moiyo ma bainasi berou berou arikasa ini vena ma yakuyo. Ini ne uruma bi meda yaku kama resi vabara iniye nido kana.
17 Na yaku ina veyakari, muyena kana ini yuka adinari abouyaka. Ma ini vana rama na fafau aesi niyo: “Ori ga re! Na bi ouresi ma gabi.
18 Na bi vegu ameida amiye kaere bi muyeyaka, idu gua bi toga toga vegu ameida! Muyena vene di amena sana ma muyena di vava bi na yaku moi gira reida.
19 Mina dada beika gua amedo ma beika bi gabi vata nigo, mina beika veyo bi bura re.
20 Mina iya 7 nai vana rama rofu veyo ma goro ramefa di aena gugura 7 di sui ago di adina bi yomakai: iya 7 bi dubu 7 di naivo naivo vima, ma ramefa di aena gugura 7 bi mina dubu 7.”