8
Si Isa yang Dakowa na Imam sang Bago na Pyagapasadan
1 Na, yani adon yang karim ko ipasabot sang pyagalaong ko kamayo na aon kanatun Dakowa na Imam na yagaingkod da adto sang sorga apit sang karinto ng Tohan na labi na mabarakat.
2 Adto da yan magaimam sang sotti na logar na magonawa ng bunna na pagsasambayangan na ininang ng Tohan aw dili ng manosiya.
3 Na, yang kada isa na Dakowa na Imam yatagan ng gawbuk ng pagpasampay aw pagpakorban adto sang Tohan. Agaw, si Isa na yan yang Dakowa na Imam natun, kinaanglan na aon oman akaatag nan adto sang Tohan.
4 Na, kong adi pa yan sang donya di mapakay na amainang yan ng imam kay dili yan ng topo ni Libi. Kay sikun pa sangaon yang mga katopowan ni Libi gaid yang pipili na imam aw silan yang yagapasampay sang mga pyapangatag na pyagasogo sang Hokoman ni Nabi Mosa.
5 Yagainang silan ng gawbuk nilan sang pagsasambayangan adi sang donya na maynang anino gaid ng bunna na pagsasambayangan na adto sang sorga. Kay sidtong ona na ipatokod da ni Nabi Mosa yang Tolda na Pagsasambayangan pyagalaong yan ng Tohan, “Timani na inangun mo yaning kariko sobay sang opamaan na pyapakita ko kanmo adto sang butay.”
6 Awgaid yang gawbuk na yatag kang Isa labaw pa kaysang gawbuk nidtong mga imam. Kay si Isa yang tigpatunga ng bago na pyagapasadan na ininang ng Tohan sang manosiya. Aw yani na pyagapasadan mas madyaw kaysang ona na pyagapasadan kay yang yamakalasak sinyan yang mas madyaw na mga pasad ng Tohan.
7 Na, kong way kolang yang ona na pyagapasadan, di gao yan opolian ng ikadowa.
8 Awgaid aon kolang kay aon akasaway ng Tohan sang mga otaw na yamangagad sidtong pyagapasadan. Agaw yagalaong yan,
“Madatung yang wakto
na inangun ko yang bago na pyagapasadan
sang kariko ng bangsa Israil
na yagauya sa Israil aw sa Yodah.
9 Yaning bago na pyagapasadan dili magonawa ng ona na pyagapasadan
na ininang ko sang mga kaompowan nilan
sidtong wakto na dyadaa ko silan
sikun sang banwa ng Misir.
Wa silan apangagad sidtong pyagapasadan,
agaw pyapabayaan da ko silan.”
10 Yagalaong oman yang Tohan,
“Na, yani yang bago na pyagapasadan na inangun ko sang kariko ng bangsa Israil.
Pagdatung sinyan na allaw,
obutang ko yang mga kasogowan ko sa suud ng dumduman nilan
aw osoratun ko sang pangatayan nilan.
Aw ansinyan akatigaman nilan na ako yang Tohan nilan,
aw silan yang mga otaw na sakop ko.
11 Sinyan na wakto di da kinaanglan na magalaong pa silan sang mga kaupdanan
atawa mga kalomonan nilan na dait silan mikilaa kanak.
Kay yang kariko ng mga otaw, mga ilado aw dili ng ilado,
amatigam da silan daw sino ako.
12 Kay amponon ko yang mga dosa nilan
aw di da ko odumdumun yang ininang nilan na maat.”
13 Na adon, sabap sang pyaglaongan ng Tohan na aon bago na pyagapasadan pyapakatigam nan kanatun na dadaan da yang ona na pyagapasadan. Aw yang maskin ono na dadaan aw di da amagamit, madari da mawaa.