19
Si Isa aw si Sakiyo
1 Ansinyan dyomatung si Isa sang longsod ng Ariha aw yamagi yan ansan.
2 Ansidto na longsod aon pangoo ng mga mangobraay ng bowis na pyagangaanan ni Sakiyo. Yani si Sakiyo sapian na otaw.
3 Adon, sang yalabay da si Isa, magatanaw gao si Sakiyo daw sino yan. Awgaid sabap ng makagpa na otaw si Sakiyo wa yan makakita sabap sang kadaig ng mga otaw.
4 Agaw yang ininang nan, dyomaagan yan sang onaan ng mga otaw aw pyomanik yan sang kaoy na sikomoro antak kitaun nan si Isa kay ansan yan malabay.
5 Pagdatung ni Isa sidto na kaoy, imingao yan aw yagalaong yan kang Sakiyo, “Apas-apas dosan pagkawas, kay Sakiyo, kay adon na allaw dait na adto ako pomanik sang kanmo baay.”
6 Agaw yomapas-apas komawas si Sakiyo aw pyagaagad nan si Isa adto sang baay nan na aon kasowat.
7 Adon, yang kariko ng mga otaw na yakakita kanilan yanagpatomod-tomod, laong nilan, “Nanga sa yani na otaw yakadto sang baay ng baradosa na otaw?”
8 Na, adto sang baay imindug si Sakiyo aw yagalaong yan kang Isa, “Paningug kanak, kay Dato. Atag da ko yang katunga ng kanak kabtangan sang mga miskinan. Aw kong aon pyagalimbongan ko, ori ko kanan yang maskin makaopat pa!”
9 Ansinyan yagalaong si Isa kanan, “Adon na allaw lyolowas da ng Tohan yani na pamilya kay yaning otaw topo oman ni Nabi Ibrahim.
10 Kay ako na Anak ng Manosiya, yakani ako antak anapun aw lowasun ko yang mga otaw na mawat sang Tohan.”
Yang Pasombingay makapantag sang mga Sogowanun na Syasarigan ng Sapi
(Mat. 25:14-30)
11 Adon, sarta yamaningug yang mga otaw sang pyaglaongan ni Isa, pyagalaong pa nan silan ng sambok na pasombingay. Ininang nan yani kay masaid da silan sang Awrosalam aw yagadumdum yang mga otaw na sinyan na wakto magasogod da magdato kanilan yang Tohan.
12 Agaw, yagalaong si Isa, “Aon sambok na otaw na barabangsa na kyomadto sang mawat na banwa antak atagan yan adto ng kapatot pagsoltan kay antak pagori nan magadato da yan sang banwa nan.
13 Adon, sang wa pa yan apanaw, tyatawag nan yang sampoo na ka otaw na mga sogowanun nan aw pangatagi nan yang matag-isa ng tagsambok na sapi na bowawan aw laong nan, ‘Pagnegosyowan mayo yani sampay sang pagbarik ko.’
14 “Awgaid yani na otaw dyudumtan ng mga imamanwa nan. Agaw pagpanaw nan, yagapadaa silan ng mga otaw adto sidtong banwa na kyakadtowan nan antak maglaong silan na di silan marim na yani na otaw yang magadato kanilan.
15 “Awgaid yamainang da yan na soltan aw yomori da yan antak magdato sang banwa nan. Pagori nan, pyapatawag dayon nan yang mga sogowanun nan antak tanawon nan daw pila yang yamaganansya nilan.
16 “Yang yamakaona domatung yagalaong kanan, ‘Kay Dato, yang sambok na sapi na yatag mo kanak yakaganansya ng sampoo.’
17 “ ‘Madyaw!’ laong ng amo nan. ‘Madyaw kaw na sogowanun. Sabap ng kasarigan kaw sang tagbi na butang, asarig ko kanmo yang pagdaa sang sampoo na mga syodad.’
18 “Na, dyomatung da yang ikadowa na sogowanun aw maglaong, ‘Kay Dato, yang sapi na yatag mo kanak yakaganansya ng lima.’
19 “Yagalaong yang amo sidto na sogowanun, ‘Kong maynan, magadaa da kaw sang limambok na syodad.’
20 “Na, dyomatung da oman yang sambok pa na sogowanun aw maglaong, ‘Kay Dato, idi kay yang kanmo sapi. Byabalot ko yan ng panyo aw tagowa ko.
21 Yamalluk ako kanmo kay maisug kaw na otaw. Akamangun mo yang wa mo pagapagodi, aw aganiun mo yang wa mo atanuma.’
22 “Yagalaong kanan yang amo nan, ‘Way poos mo na sogowanun! Kastigoon ta kaw magonawa sang pyaglaongan mo. Yamatigam kaw kadi na ako maisug, na akamangun ko yang wa ko pagapagodi aw aganiun ko yang wa ko atanuma?
23 Na, kong maynan, nanga sa wa mo ooga sang bangko yang kanak sapi kay antak pagbarik ko amakamang ko yang sapi ko na aon pay tobo?’
24 “Ansinyan yagalaong yan sang mga otaw na yanagindug sang masaid kanilan, ‘Kamanga mayo yang sapi na iyan kanan aw atagan mayo sidtong sogowanun na aon kanan sampoo na sapi.’
25 “Awgaid yagalaong silan, ‘Kay Dato, aon day sampoo nan!’
26 “Yagalaong yang amo, ‘Pagalaong ko kamayo na sino-sino na kasarigan, atagan pa. Awgaid yang otaw na dili kasarigan, maskin yang tagbis na iyan kanan, akamangun pa kanan.
27 Aw adon, idtong mga kalaban ko na wa akallini na ako yang magadato kanilan, daa mayo silan adi aw pataya mayo silan sang atobangan ko!’ ”
Byabantog si Isa Pagdatung nan sang Awrosalam
(Mat. 21:1-11; Mark. 11:1-11)
28 Paglaong sinyan ni Isa, pyomanaos yan adto sang Awrosalam.
29 Nang masaid da silan sang mga baryo ng Bitpagi aw Bitani na adto sang Butay ng Jayton, pyapaona ni Isa yang dowangka otaw na mga inindowan nan
30 aw laong nan kanilan, “Kadto kamo sang baryo sang onaan. Pagsuud mayo aon makita mayo na nati ng asno na yukutan ansan na wa pa gaid akasakayi. Obadi mayo aw daa adi kanak.
31 Kong aon magaosip kamayo daw onoon mayo yang asno, paglaonga mayo, ‘Kinaanglan yani ng kanami Dato.’ ”
32 Ansinyan pyomanaw da idtong mga syosogo ni Isa aw pagdatung nilan sang baryo, kikita nilan yang asno sobay sang pyaglaongan kanilan ni Isa.
33 Nang yagaobad da silan sang asno, yagalaong yang mga tagtomon kanilan, “Nanga sa yobadan mayo yang asno?”
34 Tyomobag silan, “Kinaanglan yani ng kanami Dato.”
35 Ansinyan dyadaa da nilan yang nati ng asno adto kang Isa, yampasan nilan ng mga dagom nilan aw pasakaya nilan si Isa.
36 Nang yagapanaos da si Isa na yakasakay sang asno, pyanagampas ng mga otaw yang mga dagom nilan ansang daan na agian nan silbi tanda sang pagbantog nilan kanan.
37 Ansinyan nang masaid da si Isa sang Awrosalam aw pagtobang da nan sang daan sikun sang Butay ng Jayton, yamangkasowat yang kariko ng mga otaw na yamagad kanan. Yagasogod silan magpoji sang Tohan ng matanogay sabap sang kariko ng mga katingaan na kikita nilan.
38 Yanaglaong silan,
“Atagan gao ng kadyawan yaning soltan na syosogo ng Tohan!
Adon akaonan kita ng kalinaw sikun sang sorga.
Pojiun ta yang Tohan na Labi na Mabarakat!”
39 Ansinyan aon mga Parisi ansang kadaig ng mga otaw na yagalaong kang Isa, “Kay Goro, sagdaa kono yang mga inindowan mo antak magpakatingun!”
40 Tyomobag si Isa, “Pagalaong ko kamayo na kong magpakatingun silan, yang mga bato da yang magapoji kanak ng matanog.”
Pyagatiyaowan ni Isa yang mga taga Awrosalam
41 Nang masaid da si Isa sang Awrosalam aw kikita da nan yang syodad, yagatiyao yan sabap sang pagkallat nan sang mga otaw disidto na syodad.
42 Laong nan, “Aw kyakatigaman pa gaid mayo adon na allaw daw ono yang makaatag kamayo ng kalinaw! Awgaid wa mayo akatigami.
43 Madatung sagaw yang wakto na osolongon aw asarikopan kamo ng mga kalaban mayo. Pagalupunan nilan yang kariko ng mga agianan mayo antak di da kamo makalogwa.
44 Apatayun nilan kamo aw ogubaun nilan yang kamayo syodad na way maskin isa na bato na amabilin sang kyakabutangan nan. Yang kariko sinyan amaitabo kamayo kay wa mayo adawata yang Tohan pagdatung nan sang paglowas kamayo!”
Kyomadto si Isa sang Baay ng Tohan
(Mat. 21:12-17; Mark. 11:15-19; Yah. 2:13-22)
45 Ansinyan kyomadto si Isa sang Baay ng Tohan aw yagasogod yan magpalogwa sang mga yanagbarigya ansan.
46 Laong nan kanilan, “Yamakasorat sang Kitab na yagalaong yang Tohan, ‘Yang kanak baay atawagun ng Baay ng Pagdowaa.’ Awgaid ininang da mayo yan ng tagowanan ng mga tolisan!”
47 Na, matag allaw yagaindo si Isa adto sang Baay ng Tohan. Awgaid yang mga pangoo ng mga imam, yang mga magiindoway ng Hokoman kipat sang mga pangoo sang banwa, yamanganap silan ng pamaagi sang pagpatay kanan.
48 Awgaid sidto na wakto way amainang nilan kay yang kariko ng mga otaw yamallini abay maningug sang pyaglaongan nan.