18
Yang Pagsapad sang Syodad ng Babilon
1 Adon, aon oman kikita ko na malaikat na yakawas sikun sang sorga. Dakowa yang kanan kapatot aw sabap sang kanan kasiga kyakaallagan yang tibok donya.
2 Ansinyan yamangiyak yan ng matanog, laong nan,
“Yamasapad da yang bantoganun na syodad ng Babilon!
Adon yamainang da yan ng pyagauyaan ng mga saytan aw mga jin.
Aw yang kariko ng mangkaripa aw maat na mga langgam yanagpogad ansan.
3 Yang Babilon maynang bobay na yagakadopang. Yang kariko ng mga bangsa yamadaa nan sang paginang ng maat
kay maynang pyapainum nan silan ng maisug na bino.
Yang mga soltan sang donya yanagjina upud kanan
aw yang mga negosyante sang babawan ng donya yamakasapi sabap kanan
kay yaganapso yan sang mangkamahal na mga butang.”
4 Ansinyan aon oman dyudungug ko na tuna pa na sowara sikun sang sorga na yagalaong,
“Kamo na mga sakop ko, panaw da kamo sikun ansan na syodad
antak di kamo makaapil sang ininang na maat ng mga otaw ansan
aw di oman kamo adatungan ng siksa na madatung kanilan.
5 Kay syomongko da adto sang langit yang mga dosa nilan
aw wa akaringawi ng Tohan yang kadarowakaan na ininang nilan.
6 Daw ono yang ininang nilan adto sang kadaigan, maynan oman yang amainang kanilan.
Aw dait na doble yang pagbaus kanilan.
Dait na painumun silan ng bino na doble yang kaisug kaysang pyapainum nilan adto sang kadaigan.
7 Pasakitan silan aw atagan silan ng dakowa na karido
na magonawa sang kadakowa ng pagpasigarbo nilan sang kabantog aw kakawasaan nilan.
Kay yagalaong silan sang kanilan ginawa, ‘Yang kanatun banwa magonawa ng soltana!
Dili yan magonawa ng biyoda aw di oman amagi ng karido.’
8 Na, sabap sinyan sakadyap silan adatungan ng mga batalo.
Sang sangallaw gaid magadungan domatung kanilan yang sakit, karido aw gutum.
Aw ansinyan osonogon yan na syodad
kay yang Tohan na kanatun Tagallang na yagahokom kanan labi na mabarakat.
9 “Yang mga soltan adi sang donya na yanagjina upud kanan aw yamakasawit sang kakawasaan nan, pagkita nilan sang ubul na yagasikun sang pagkasonog nan, amarido aw managtiyao silan sabap kanan.
10 Awgaid matanaw gaid silan sikun sang mawat kay yamalluk silan na basin maapil sang siksa kanan. Aw magalaong silan,
“ ‘Astaga! Kanogon ng Babilon na dakowa aw bantoganun na syodad!
Kay sisiksa da yan ng Tohan sang sangka pamiluk gaid.’
11 “Yang mga negosyante adi sang donya amarido aw magatiyao oman sabap sang yamaitabo kanan kay waa day magabili sang kanilan mga barigya.
12 Waa day magabili sang kanilan bowawan, pilak, mangkamahal na mga bato, perlas atawa yang mangkadyaw na mga tela, mga tela na mapowa aw bayolet na para sang dagom ng soltan, aw yang masinaw na mga tela. Way oman magabili sang mangkaballo na mga kaoy, mga butang na ininang sikun sang tango ng elepante aw mahal na kaoy, bronsi, potaw aw marmol.
13 Waa day magabili sang mangkaballo na mga anag, mga toob, mangkaballo na taguk, bino aw lana ng jayton, mangkadyaw na arina aw trigo, mga baka, karniro, koda, mga kalisa, aw maskin pa yang mga otaw na allang.
14 “Na, magalaong da silan sinyan na syodad,
“ ‘Yang kariko ng mangkadyaw na mga butang na kyakallinian mayo yamangkawaa da.
Yang kabantog aw kakawasaan mayo yamawaa da aw di da mayo ikitaun.’
15 “Yang mga negosyante na yamangkasapi sabap sinyan na syodad, adto silan managindug sang mawat kay yamalluk silan na basin maapil sang siksa kanan. Magatiyao silan sabap sang karido nilan
16 aw magalaong silan,
“ ‘Astaga! Kanogon sinyan na bantoganun na syodad!
Yang mga yanaguya ansan yamandagom sangaon ng mangkadyaw na mga tela, yang bayolet aw mapowa na para sang soltan,
aw syosoot nilan yang mga alahas na bowawan, yang mangkamahal na mga bato aw mga perlas.
17 Awgaid sang sangka pamiluk gaid yamasapad da yang kanilan kakawasaan.’
“Na, yang kariko ng mga kapitan sang dakowa na bangka, mga pasahiro aw mga trabante kipat sang kariko ng mga otaw na yamanginabowi sang dagat, adto silan managindug sang mawat.
18 Pagkita nilan sang ubul na yagasikun sang yamasonog na syodad, amangiyak silan, ‘Way lain na syodad na malabaw pa sinyan na syodad yang kabantog!’
19 Sabap sang karido ng ginawa nilan asabodan nilan ng abo yang kanilan oo aw managtiyao silan. Aw magalaong silan,
“ ‘Astaga! Kanogon sinyan na bantoganun na syodad!
Yang kariko ng mga tagtomon ng dakowa na bangka yamanapi
sabap sang kakawasaan nan.
Awgaid sang sangka pamiluk da gaid yamawaa da yang kariko.
20 Awgaid kamo na adto sang sorga, pangkasowat da kamo sabap sang yamaitabo sidto na syodad!
Kamo na mga sakop ng Tohan, mga sahabat aw mga nabi, pangkasowat kamo!
Kay yokman da ng Tohan yang idto na syodad sabap sang ininang nan kamayo.’ ”
21 Adon, aon sambok na malaikat na mabarakat na yakamang ng dakowa na bato na magonawa ng dakowa na galingan aw labakan adto sang dagat. Aw yagalaong yan,
“Magonawa sinyan yang kakusug ng pagsapad
sang bantoganun na syodad ng Babilon,
aw di da yan ikitaun oman.
22 O kay Babilon, di da odungugun ansan kanmo
yang oni ng kodlong aw yang pagkanta ng mga otaw, yang oni ng soring aw mga trompita.
Di da oman ikitaun yang mga otaw
na matigam maginang ng maskin ono na mga butang.
Aw di da oman odungugun
yang tingug ng galingan.
23 Waa day ikitaun na ilawan ansan kanmo
antak magatag ng kaamdagan.
Aw waa day odungugun
na pakaradyaan ng kawin.
Yang kanmo mga negosyante byabantog sangaon sang tibok donya.
Aw yang kariko ng mga bangsa yamailad sabap sang pagsalamangka mo.
24 Na, sisiksa da yan na syodad
kay iyan san pyapatay yang mga nabi aw yang kadaigan pa na mga sakop ng Tohan.
Yang kariko ng mga otaw sang babawan ng donya pyapatay sabap kanan.”
Na, idto yang pyaglaongan ng malaikat.