53
1 Aiyai ema giu visuvisuna i wai sumaḡe
bi aiyai lisinemo Bada ena ḡailisi i wai maḡati?
2 Bada ena ḡowana luvanemo te ena taupaula i duga
mai kai doḡa tatakalinemo ya kalakalanapuna.
Tana mote waiguyauna bi wai nuwavaivaina te maso te kaiwata.
3 Tana te kita kamaḡe bi te daboke bi te laumulitauliye bi geḡa te tana
tuniyavi bi wai nuwatoi i asiwidi.
Mote aiyai i kita waitete bi a kita kamaḡena maibena lava yababa.
4 Kamaina te i lai epaiyanida, bi tunina i yavi bi i wai nuwatoi,
bi tei noḡota te bena tana ena gebo aubaina Maimaituwa i kovoḡi.
5 Tada eda gebo dabanemo tunina a doulisilisidi,
eda kauwawaigebo aubaina tana a kwapukwapu.
Bi kovoḡa i vaivaina ba i wai nuwaubada,
bi tunina a doulisilisina ba i wai yawasanida.
6 Tada matabuda mai sipu te ainawanawa,
Maimaituwa ena eta te gose bi ḡemoḡemotaḡa eda eta tabudi tei tubudi.
Eda ai kaukauwa bi eda gebo kovoḡidi tana i vai.
7 Tana a vawaidoḡadoḡa, a sulawaineḡa,
bi i sako yovoḡe te mote bai ḡesau mudunemo i giuwe.
Mai bena sipu lauewalina kapalina bwalina ee sa nawe waipekina aubaina ba
ya miya moimoisili mote bai i vato lubuḡe.
8 Ai wavu yababe, a kaididi bi ai doli nawe,
bi ena peki mote aiyai i wai nuwapoyae.
Tana i pekina ba tada eda gebo aubaidi.
9 Tana mote gebo bai i voiye ee lava i kaiyovuḡedi,
bi lava waibeyapotedi vaitedi a peki bi lava waiguyauna ena tauyewamo a sako.
10 Kamaina te Bada ena ḡowana luvanemo i voiye te i wainuwatoi,
bi i vite munaḡe te i waila sewasewa gebo ani bakilina,
te tana ena tubulelesa sa wapa.
Tana ya miyawailofa.
Bada ena ogatala lisinemo i voivoiyena baninemo i tava.
11 Ena wainuwatoi mulinemo ba yawasana yanayanana ya kita bi nuwana ya kena,
bi i sibe te ena wainuwatoi waibanina.
Bi egu taupaula didimanina lava wapewapedi edi gebogebo vitana ya avali bi ya kadidimanidi.
12 Lava saḡasaḡa guletidi poudimo
yà voiyem te kwa saḡa gulata.
Tana ena yawasana i vite munaḡe te gebogebo lavedi vaitedi ḡemoḡemotidi.
Tana gebogebo taukauwedi edi vita i avali.
Bi i laupali te maso Bada lava edi gebogebo i noḡoti kamaḡedi.