22
Mowabi ḡalibonana Beilam ena talawainuwatau i giukamaḡe
1 Islael lavedi a nawa Mowabi wapunemo bi Diyoudan gaubina nevanemo, Deliko diyanemo a lauḡalavu.
2 Laḡannemo Mowabi ḡalibonana Balak Dipo natuna, i vaiye te bainewa Islael lavedi a tapipila te Amoli lavedi ai peki kovidi. Bi kota i vaiye te Islael lavedi a wapa dabalala,
3 ba ena lava vaitedi a naila gulata banina Islael lavedi ba a wapa gulata.
4 Ḡome Mowabi lavedi Midian waibabadidi a giuwedina gado, “Niga lavedi kumdi male matabuda sai peki kovidana, maibena bulumakau ḡawaḡawa sa kanikani kovidina.”
5 Mba laḡanemo Dipo natuna Balak tana Mowab ḡalibonana, tauwainoyanoya i wai ḡemotidi bi i giuwedi te sa nawa Beo natuna Beilam lisinemo. Tana Amowa dobunemo gauba Ifleitis diyedimo Petomo i miyamiya. Tauwainoyanoya niga giuna a vai nawe Beilam lisinemo gado, “E ḡoeḡoena kwa sibe te Islael lavedi Idipmo a potipotiyovona, niga dobuna ai wanavu bi diyagumo sa miyamiya. Sawai matanainaila te niga doḡana maso sa vai.
6 Tedi a wapa gulata mote luvana te ka lauyovoḡedi, taunana aubaina kwa nato bi aubaigu kwa pasilidina, kaka tama ḡemoḡemotina te niga dobunemo ka kwavivaidi. Tagu e sibe te tam laḡannemo lava kwa kavisuvisudina ba tedi visuvisu sa banavi bi laḡannemo kwa pasilidina ba tedi gebogebo sa banavi.”
7 Kamaina bi Mowabi bi Midian babadidi pasila kana mane a legaudi bi a nawa Beilam lisinemo bi Balak kalinana a giuwe.
8 Bi Beilam tedi i giuwedina gado, “Temi niga ḡome ta kena bi Bada bai ya giuwegu, kaka bokina yà tainuwataumi.” Ḡome te Mowabi babadidi, Beilam vaitena a kena.
9 Bi Maimaituwa Beilam lisinemo i laumaḡata bi i giuwena gado, “Lava mabai lisimmo sa miyamiya?”
10 Bi ena giu i waimunena gado, “Dipo natuna Balak mowabi edi ḡalibona kalinana i giuvitedi bi giukamaḡedi lisigumo.
11 “Bi i giu te lava Idipmo a potipotiyovona tedi dobu ai wanavu kamaḡe. Taunana aubaina tana ya ḡoeḡoegu te Islael lavedi yà pasilidi, mba mainana te tana Islael lavedi ya kwavi vaidi.”
12 Bi geḡa te Maimaituwa Beilam i giuwena gado, “Niga babadidi mote vaitedi koma nawa bi mote Islael kuma pasilidi, banina mba lavedi ba tagu e kavisuvisudi.”
13 Laḡan i sako olaolalemo Beilam i nawa Balak ena tauwainoyanoya lisidimo bi i giuwedina gado, “Ko munaḡa emi dobumo, banina Bada mote i wai aninegu te vaitemi ta nawa.”
14 Kamaina bi a munaḡa Balak lisinemo bi a giuwena gado, “Beilam nato vaitemai i daboka.”
Ḡome Balak ena waibabada laukaidi i giukamaḡe a munaḡa Beilam lisinemo. Bi i giu te mai'a didiga ya vite bamoda ya nato bi Islael lavedi ya pasilidina. Niga laḡannemo ba Maimaituwa Beilam i giuwe te waibabada vaitedi sa nawa lisinemo bi bai Maimaituwa ya giugiuwena taunana ya voiye.
21 Beilam olaolalemo ena donki i kanonoḡi bi Mowabi babadidi vaitedi a nawa Balak lisinemo.
22 Bi geḡa te Maimaituwa nuwana i medi, Beilam i nawanawana aubaina. Beilam ena donki dabanemo i gelu a nawanawa ena taupaula labu vaitedi ba etamo Bada ena aneya i moito gududi.
23 Sauginemo donki Bada ena aneya i kita etamo kepata vitena i moimoito ba eta diyanemo ba i moito gebi. Bi Beilam donki dibunemo i talaḡa bi i voiye te i tava munaḡa etamo.
24 Ḡome Bada ena aneya i moito nawa waen dabidi labu ganakukudi, mododimo eta ḡulilina i moito gudu.
25 Bi donki Bada ena aneya mainana i kitakita ba i moito nawa ganakuku modonemo bi Beilam kaḡena i ḡaviḡaki, ba Beilam donki i kwapu munaḡe.
26 Kamaina bi Bada ena aneya i moito nawa ganakuku mododimo ḡulili otinemo mote ḡemoḡemotina ya moito vitavitale.
27 Sauginemo donki Bada ena aneya i kitakita ba ma Beilamna i guliyovo. Bi Beilam nuwana i laimedimedi bi kwapumo donki i kwapu.
28 Kamaina bi Bada donki muduna i kaikamaḡe bi Beilam i giuwena gado, “Bai lisimmo e voiye waigebo te ma faiona kuna kwapugu?”
29 Bi Beilam donki ena giu i waimunena gado, “Tam kuna voiye te tagu bena em bu'uwa bi mainana kepata nimagumo maso noi taunana ei pekim.”
30 Bi donki Beilam i giuwena gado, “Tagu ba tam em donki otina, laḡan matabuna kwa gelugeluyegu, mainana wala lisimmo e voiye, ee?” Bi Beilam i giuna gado, “Geḡa.”
31 Ḡome Bada Beilam matana i kayana bi Bada ena aneya i kita kepata i vai bi i moimoito. Kamaina bi Beilam i laudulu i guliyovo mtana doḡamo.
32 Bi Bada ena aneya Beilam i waitalayena gado, “Bai aubaina em donki ma faiona kuna kwapu? Tagu e nato te em eta e moito gudu banina niga nawana mote yai anine.
33 Bi em donki i kitagu te ma faiona i moito gebi. Bi moito gebi geḡa, maso ei pekim bi donki maso i yawasana.”
34 Ḡome Beilam giu i waimunena gado, “Mote yà kitam, tam gode egu eta kuna moito gudu. Bamoda niga nawana gebo e voiye bi mote ku waianinegu ba avena te yà munaḡa.”
35 Bi aneya Beilam i giuwena gado, “Kwa nawa niga babadidi vaitedi bi bai yà giugiuwena, taunana kwa giuwe.” Kamaina bi Beilam, Balak ena waibabada vaitedi a nawa.