10
O Konelias ra awu sur a te Juda, i itula sur o Pita
1 Tong o Sisaria, ara musano i kis, a risano o Konelias, i ara mugumugu anun ara mar na taro na inaim, det tagun a taro na inaim tagitong o Itali.
2 O Konelias ma det rop ra det kis una nun a rumu det a kum tene lotu mulus ma det ser urur torom o God. O Konelias i a tene etabor, i ser tabor a kum sibo na taro, ma a kum bung rop i ser wararing torom o God.
3 A tulu pakano bung un ara lirop i tama ara tamtama. I tama pupuaso a ensel anun o God i wanpat toromi ma i kabo i lena, “Konelias!”
4 Ra o Konelias i tamtama dekdek toromi nama labino nginara, ra i tingi lena, “Labino, asau ra?” Ra a ensel i balu i lena, “Anum a kum niaring ma a kum etabor torom a kum sibo na taro, det wan usapat torom o God, elar nama etabor ra i ugasgasi.
5 Uniutri un tulu ru lako taro utong o Jopa, sur det in ben pas ara musano, o Saimon, ara risano kai o Pita.
6 Kura i kis nisan o Saimon, i ara tene pam ututna nama pinin a wewegua. Anun a rumu i tur milau nago utasi.”
7 Ra a ensel, ra i wasiso toromi i sa wan, o Konelias i kabo pas aru tagun anun a kum tultul, ma ara tene lotu mulus tagun anun a taro na inaim.
8 I inanos detul una kum utna rop ri, ra i tulu detul utong o Jopa.
A tamtama anun o Pita
9 Una bung numur detul wan. Ra in matanas i kis lekeleke, detul wanpat milau a tamon Jopa, ra o Pita kai i ka tito usapat netes una rumu, sur in wararing.
10 Ra i wararing, i taramo a munurak ma i nem na wangon. Ra di waninari utmakai a utna na inangon, i tama ara tamtama.
11 I tama a langit i papos, ma ara utna i elar namin labino malu, ra di pam pas a wat na kukurino ma di ukete pirso i.
12 Tiro ubalano, a kum wur ngas na wewegua rop, det ra det wanan netes una piso ma det ra det kaukawar, ma a kum piko kai.
13 In nalngan ara i watungi tan o Pita lena, “Pita, un tur. Un um doko det, ma un nan det.”
14 Ra o Pita i watungi lena, “Labino, awu ut! Ka wan tar tu utna ra i dur umatam, ra i tabu torom met a taro Juda.”
15 Ra in nalngan ara i balu meleti lena, “A utna ra o God i sa utalapor tari, gong u watungi lena i dur.”
16 A utna ri di pami elar nama tulu dino, ra uniutra di dat toto melet pasi usapat una langit.
17 Ra a nuknukin o Pita i toboroboro utmakai una kukurai ina tamtama ri, a tulu musano ra o Konelias i tulu ru detul, detul sa sio pas a rumu anun o Saimon, ra uniri detul tur una matansako.
18 Numur detul kakabo ruk, detul iting lena, “O Saimon ara risano kai o Pita kura i tiro?”
19 Ra o Pita i nuknuk utmakai una tamtama ra, a Tokodos na Nion i watungi tano lena, “Tama i! A tulu musano detul sisio sur ui.
20 Un katutur, ma un nan pirso. Gong u nuknuk larlar sur un nan tomo nam detul, uni iau ut a tulu ru detul urin.”
21 Ra o Pita i pirso torom detul ma i watungi lena, “Iau kut ri, ra motul sisio sur iau. Motul wan urin sur asau?”
22 Detul balu i lena, “O Konelias, a mugumugu anun ara mar na taro na inaim i tulu ru metul. O Konelias i ara tene tokodos ma a tene urur un o God, ma a taro Juda rop det ru i. A ensel anun o God i inanos tari lena, in itula pas ui utong una nun a rumu, sur in longoro anum tu wasiso.”
23 Ra o Pita i ben ruk pas detul sur detul in inep pas.
O Pita i wanpat tiro una rumu anun o Konelias
Ra i sa waspi, o Pita i turpas a inawan, ma a ramano kum musano ra det tar tistisino una nurnur tagitiro o Jopa, det wan tomo nam det.
24 Una bung numur, det wanpat tong o Sisaria. O Konelias i sa tasmani lena det na wanpat, ra i sa kabo tomo pas a kum kukunu, ma a kum paspasano, ra det kis langlang sur o Pita.
25 Ra o Pita i ruk, o Konelias i wan barato i, ma i kis butkeke taru nama urur nisano, ra i lotu toromi.
26 Ra o Pita i dat utur pasi, ma i watungi lena, “Un tur, iau kai a musano kut.”
27 Ra der wasiso nanan, o Pita i ruk ma i tama a susut na taro kura det sa kis tomo.
28 Ra i watungi tandet lena, “Mot tasmani lena i tabu una numet a warkurai sur met a kum te Juda met in lason tomo nam taio ra awu sur a te Juda, ma met in lumu i kai. Ikut uniri o God i sa ese tar iau lena, gong a watungi un taio lena i dur umatan o God, ma gong a nuki lena i tabu torom met sur met in lason tomo nami.
29 I mo ra ka putut ra di itula sur iau urin. Ra uniri an ting mot lena: Asau ra mot itula pas iau suri?”
30 Ra o Konelias i balu i lena, “Ara bung a wararing una nung a rumu una du bung lenri, una tulu pakano bung una lirop, ra a tama ara musano i tur sa numugu tang. Ma uniri i sa tulu bung bati. A musano ra a tama i, i emar namin namalu ra i pilpil doko, i wanpat kisin torom iau,
31 ra i watungi lena, ‘Konelias, o God i sa longoro tar anum a niaring, ma i sa tasman anum a kum etabor torom a kum sibo na taro.
32 Un itula utong o Jopa, sur din ben pas o Saimon, i ra ara risano kai o Pita. Kura i kis na usiro nisan o Saimon, a tene pam ututna nama pinin a wewegua, ra i kis milau nago utasi.’
33 “Uniutra, a itula mut sur ui. I wakak sakit ra u wan urin. Ra kuri met rop met kis umatan o God, sur met in longoro a kum wasiso rop ra a Labino i sa watung tari tam sur un inanos met nami.”
O Pita i warawai
34 O Pita i watungi lena, “A tasman mulusi lena, a kum kamkabo taro rop det elar kut umatan o God.
35 I gas pas a taro tagun a kum kamkabo taro rop, ra det ru i ma det pam a tokodos na petutna.
36 Mot tasmani lena, o God i sa pitar tar anun a wasiso torom a taro Israel. A wasiso ri, i a Wakak na Wasiso na malmal. A malmal epotor tan o God ma a taro, ra i kibino un o Iesu Karisito, i ra a Labino anun a taro rop.
37 Mot tasman a kum lamlabino utna ra i wanpat una kum tamon tong o Israel, turpasi tong o Galili numur tan a baptais ra o Jon i warawai nami.
38 Mot tasmani lena, o God i sa pitar tar a Tokodos na Nion ma a dekdek torom o Iesu, a te Nasaret. Mot tasmani kai lena, i wan tuptupukus, ra i pam a kum wakak na pinapam, ma i ulangolango pas det rop ra det kis utuntudu ina dekdekin o Satan. O Iesu i pam a kum utna ri, uni o God i kis tomo nami.
39 “Ma met a kum tene wasiso puaso una kum utna rop ra met tama i, ra i ser pami una kum tamon anumet a taro Juda, ma sapat o Jerusalem kai. Di sak wati unin nanai kutus, ra i mat.
40 Ikut, numur tan a tulu bung, o God i ukatutur melet pasi gusun a minat, ma i ese tari torom a taro.
41 Awu sur torom a taro rop, torom det kut ra o God i sa pilok mugu tar det sur det in tama i ma det in wasiso puaso uni. Met a taro ra, met wangon ma met inum tomo nami numur tan a katkatutur anunu gusun a minat.
42 Ma i tulu ru met, sur met in warawai ma met in wasiso puaso uni, lena i ut ra o God i sa pilok pasi sur in tene warkurai anundet ra det laun ma det kai ra det sa mat.
43 Ma a kum poropet rop det wasiso puaso un o Iesu, lena osi ra i nurnur uni, din unus ru anun a kum sakino petutna nama risano.”
A Tokodos na Nion i wan pirso taru un det ra awu sur a taro Juda
44 Ra o Pita kura utmakai i wasiso una rumu anun o Konelias, a Tokodos na Nion i wan pirso un det rop, ra det longoro a wasiso ra.
45 Ra a kum tene nurnur tagun a taro Juda ra det wan tomo nam o Pita, det kisin, uni o God i etabor utkai nama Tokodos na Nion torom a taro ra awu sur a taro Juda.
46 Uni det longoro det, ra det wasiso nama kum ngas na wasiso ma det watung ulabo pas o God.
47 Ra o Pita i watungi lena, “Katutaio in turbat lar pas det ri sur gong di baptaiso det nama danim, uni a Tokodos na Nion i kis un det elar nami ra i kis un dat.”
48 Ra i itula sur din baptaiso det nama risan o Iesu Karisito. Ra numur det saring o Pita sur in kis munung torom det tu kabano bung.