16
Anundet a etabor torom a taro na lotu sapat o Jerusalem
+An inanos mot un asau ra mot in pami nama mani ra mot woro tomo i sur a taro anun o God ra det kis sapat o Jerusalem. Mot in pami elar nami ra a sa inanos tar a taro na lotu una kum tamon tong una papor Galesia sur det in pami. Una kum mugano bung una rara wik, mot rop taktakai mot in ubek gisen ru tu mani tagun anumot a mani. Det ra det pam pat a labino mani det in pitar a labino, ma det ra det pam pat a natino det in pitar a natino. Mot in ulengi, sako ra an nanpat, mot in woro tomo i maragom a mani. Mot in pilok pas lako taro ra mot nurnur un det sur det in los anumot a etabor. Ma ra an nanpat tiro, an pitar tar a kum pas na wasiso talapor torom det sur det in losi tomo nam anumot a etabor, ma an tulu ru det nami usapat o Jerusalem. Ra i wakak sur iau kai an nan, met in nan tomo.
O Pol i inanos det una nun a inawan
+An nan utong una kum tamon una papor Masedonia. Ma numur an nan kai utiro torom mot, uni an nan ut utong o Masedonia. +Kutiro an kis lilik pas ut tomo nam mot tiro iai, o kutiro an kis tuk ra a kum kalang na kotokoto ma a labino wuwu in rop, ra numur mot in warut iau una nung a inawan sur a kum tamon gisen bulung ra an nan iai. Ka nemi sur an nan torom mot uniri, ra an tur pas kut nisamot una nung a inawan. Ra a Labino in mulaot iau, a nemi sur an kis suano pasi ut nisamot. +An kis nin o Epeses tuk una Bung na Pentikos, uni a kisapi i sa papos sur anung a pinapam in lubung ma in wu, ma a susut na taro kai det nem na turbati.
10  +Ra o Timoti in nanpat torom mot, mot in tamtamabati sur gong i ngara ra i kis nisamot, uni i pam a pinapam anun a Labino, elar nam iau kai a pami. 11  +Gong mot tama pisopiso i. Ra in milet urin torom iau, mot in tulu ru i nama malmal. Ma a kis langlang suri, ra in nanpat tomo nama kum tistisin dat.
12  +A nemi sur an inanos mot una tisindat o Apolos. A saring dekdeki sur in nan tomo nama kum tistisin dat torom mot, ikut ke nem na wan utmakai. Numur ra tu kisapi in papos toromi, in nan ut.
A kum ururop na wasiso anun o Pol
13 Mot in tumarong, ma mot in tur dekdek una nurnur. Mot in elar nama kum dekdek na musano, ra ka det ngara. 14 Mot in pam a kum utna rop nama marmaris.
15  +Mot sa tasmani lena a taro ra det kis una rumu anun o Stepanas, det a mugano taro ra det nukpukus tiro una papor Akaia, ma det sa pitar tar det sur det in warut a taro anun o God. A saring mot, a kum tistising, 16 sur mot in unatino pas mot torom a ngas na taro lenra, ma torom det ra det papam tomo nam det, ma det dekdek una pinapam ra. 17 A gas una inawan pat urin anun o Stepanas, o Potunatus ma o Akaikas, uni detul warut iau ra ka mot kis tomo nam iau. 18 Detul ugasgas pas a niong, ma a niomot kai. I wakak ra mot in tama lele a ngas na taro lenra, ma mot in pitar a urur torom det.
19  +A taro na lotu una kum tamon nin una papor Asia det pitar anundet a marmaris torom mot. O Akuila ma o Prisila ma a taro na lotu kai ra det ser lotu tomo una nunder a rumu, det pitar anundet a labino marmaris torom mot una risan a Labino. 20 A kum tistisin dat rop det pitar anundet a marmaris torom mot. Ra mot etorom, mot in nem etetalai mot nama egom na marmaris, ma mot in pami nama tokodos na petutna.
21 Anung a nat na wasiso na marmaris ri, iau ut, o Pol, a tumusi torom mot nama lamang. 22  +Osi ra ke nem a Labino, in iru tukum. Wan urin a Labino!
23 A marmaris anun a Labino o Iesu in kis tomo nam mot. 24 Anung a marmaris torom mot rop un o Karisito Iesu. Amen.
+ 16:1 Rom 15:25-26; 2 Kor 8:1-9 + 16:5 Ap 19:21 + 16:6 Rom 15:24 + 16:8 Ap 19:8-10; 2 Kor 2:12 + 16:10 1 Kor 4:17 + 16:11 1 Tim 4:12 + 16:12 1 Kor 3:6 + 16:15 1 Kor 1:16 + 16:19 Ap 18:2, 18, 26 + 16:22 Gal 1:8-9