A Mugano Pas
anun
o Jon
A wasiso talapor mugu
A pas ri, o Jon i tumusi. O Jon i ara tagun a noino ma aru nat na ususer anun o Iesu. I tumus a pas ri ra i sa takano, ra i kis tong o Epeses. I tumusi torom a taro na lotu una papor Asia.
O Jon i inanos det lena det in tur dekdek una nurnur un o God o Tamano ma o Nutunu o Iesu Karisito. Ra det nem o God, det in nemi kai a kum paspasan det. A marmaris, i a labino utna.
Ra i utumarong det gusun a kum torotoro na tene ususer. A kum tene torotoro ri det watungi lena, o Iesu ke wanpat a mulusino elar nam dat, uni det nuki lena a pinindat i a laulau na utna.
A kum tene torotoro det watungi kai lena, a mananos i a labino utna, ikut a marmaris ma a wakak na petutna der utna oros kut. A taro ra det watungi lenri, det a kum ebar anun o Karisito, ra o Jon i nemi sur dat in tama lele det.
A inawan ina Mugano Pas anun o Jon:
O Iesu i a Wasiso na nilaun (1:1-4)
A talapor ma a dumirum (1:5-2:29)
A kum nutnutun o God ma a kum nutnutun o Satan (3:1-4:6)
A marmaris (4:7-21)
A nurnur i winim pas a rakrakon bual (5:1-21)
1
A Wasiso na nilaun
+Met wasiso talapor un o naro ra i a Wasiso na nilaun, i laun tagun numugu ut, ra kabaut di ukis a rakrakon bual. Met sa longoro tari, met sa tama tari nama matmata met, ma met sa pam tari ut a pinino. +A nilaun i sa wanpat puaso, ra met sa tama tari. Ma uniri met wasiso talapor torom mot uni lena, i ra a nilaun tukum. Numugu i kis tomo nam o Tamano, ra uniri i wanpat puaso torom dat. Met inanos mot un o naro ra met sa tama tari ma met sa longoro tari, sur dat in lason tomo, elar nam met, met lason tomo nama Tamandat, ma o Nutunu o Iesu Karisito. +Ra met tumus a kum utna ri, sur anundat a gasgas in kudulano.
O God i a talapor
+A wasiso ri, met longoro i gusun o Iesu Karisito, ma met upuaso i torom mot lena, o God i a talapor mulus, ma kalako dumirum tiro uni. +Ra dat watungi lena, dat lason tomo nam o God, ikut dat kis kut una dumirum, dat a kum tene torotoro, ma a lingmulusino ke kis un dat. Ra dat laun una talapor, elar nam o God i kis una talapor, dat lason etetalai torom dat, ma a gapin o Iesu, a Nutunu, i rus talapor dat gusun a kum sakino petutna rop.
+Ra dat watungi lena, ka dat pam tar tu sakino petutna, dat toro melet pas dat ut, ma a lingmulusino ke kis un dat. Ra dat watung puaso anundat a kum sakino petutna, o God ut i tokodos, ma in pam sot pas anun a liliman, ma in unus ru anundat a kum sakino petutna, ma in utalapor dat gusun a kum petutna ra ke tokodos. 10 Ra dat watungi lena, ka dat pam tar tu sakino petutna, dat watungi lena o God a tene torotoro*, ma anun a wasiso ke kis ubalandat.
+ 1:1 Jn 1:1 + 1:2 Jn 1:14 + 1:4 Jn 16:24 + 1:5 1 Tim 6:16; Jem 1:17 + 1:6 1 Jon 2:4 + 1:8 Sng 32:5; Snd 28:13 * 1:10 O God i watungi lena dat rop dat pam a sakino petutna. Tama Rom 3:23. Ra dat watungi lena ka dat pam a sakino petutna, dat nuki lena o God a tene torotoro.