4
A utumarong una kum torotoro na poropet
1 A kum wakak na paspasang, gong mot nurnur oros un taio ra i watungi lena a Tokodos na Nion i pitar tar a wasiso toromi. I wakak sur mot in lari munung a kum nion, ra det tagun o God o awu. Uni, a susut na torotoro na poropet kuri det una rakrakon bual.
2 Mot in tasman lele a Nion o God lenri: Det ra det watungi lena o Iesu Karisito i wanpat a musano mulus, det tagun o God.
3 Ikut det ra det ipul lena, awu sur o Iesu Karisito i wanpat a mulusino, awu sur det tagun o God. A nion ra, tagun a ebar anun o Karisito, ra mot sa longoro tari lena in nanpat, ma uniri i sa wanpat nin una rakrakon bual.
4 A kum nutnutung liklik, mot anun o God, ma mot sa winim pas a kum torotoro na poropet, uni a Tokodos na Nion ra i kis un mot, i dekdek taun a nion ra i kis una taro tagun a rakrakon bual.
5 A kum torotoro na poropet det tagun a rakrakon bual, ma a wasiso anundet tagun a rakrakon bual, ma a taro tagun a rakrakon bual det longoro det.
6 Dat anun o God, ma osi ra i tasman o God i longoro dat. Ikut osi ra awu sur tagun o God, ken longoro dat. Lenra dat in tasman lele a Nion ra i lingmulus, ma a nion ra i torotoro.
O God, i a kimkibin a marmaris
7 A kum wakak na paspasang, dat in nem etetalai dat, uni a marmaris i wan tagisapat tan o God. Det rop ra det tastasman a marmaris, det a kum nutnutun o God, ma det tasman o God.
8 Osi ra ke tasman a marmaris, ke tasman o God, uni o God, i a kimkibin a marmaris.
9 O God i ese anun a marmaris torom dat, ra i tulu ru o Nutunu, ara sot kut, urin una rakrakon bual, sur in pitar a nilaun torom dat.
10 A marmaris i lenri: O God ut i maris mugu dat. Awu sur dat, dat maris mugu o God, awu. O God i maris dat, ra i pitar ru o Nutunu sur in mat ra in ulangolango pas dat gusun anundat a kum sakino petutna ma in urop ru a kankan anun o God gusun dat.
11 A kum wakak na paspasang, o God i maris doko dat lenri, i wakak sur dat kai, dat in nem etetalai dat.
12 Katutaio utmakai i tama tar o God. Ikut ra dat nem etetalai dat, o God kuri un dat, ma anun a marmaris i bukus un dat.
13 Dat tasmani lena dat laun un o God, ma o God i laun un dat, uni i sa pitar tar a Niono tandat.
14 O Tamano i pitar ru o Nutunu sur in Tene Ulaun anun a rakrakon bual, ra met, met sa tama tari, ma met wasiso talapor uni.
15 Ra taio i wasiso puaso lena, o Iesu a Nutun o God, o God i laun uni, ma i kai i laun un o God.
16 I mo ra dat ut, dat tasman a marmaris anun o God torom dat ma dat nurnur uni.
O God, i a kimkibin a marmaris. Osi ra i tasman a marmaris, i laun un o God, ma o God i laun uni.
17 Una kisapi ri, anun a marmaris i bukus un dat, ma ka dat in ngara una bung na warkurai, uni nin una rakrakon bual, dat laun elar nam o Karisito.
18 Katu nginara i kis una marmaris. Ra a marmaris in bukus un taio, in lakro ru a nginara. Ikut, ra taio i ngara, i ese i lena, anun a marmaris ke bukus, ma i nuki lena in iru una warkurai na minabalu.
19 Dat nem etetalai dat, uni o God ut i nem mugu dat.
20 Ra taio i watungi lena, “A nem o God,” ikut i nget o tisino, i a tene torotoro. Uni osi ra ke nem o tisino ra i tama i, ken nem lar pasi kai o God ra ke tama i.
21 I pitar tar a warkurai ri tandat, lenri: Ra taio i nem o God, in nemi kai o tisino.