19
Ra o Pailat i itula sur din ben gisen pas o Iesu ma din mirasi namin narus na inaim. +A kum tene inaim det liko pas in narus ra a loklokono ma det ubek tari unin lorino elar nama kukup anun a king, ma det mar tari namin pepol na malu.* Det wanan toromi, ma det watungi lena, “Ui a king anun a taro Juda!” Ra det kubu pasor in masarino.
O Pailat i pirso melet, ra i watungi tandet lena, “Mot tama i, iri a ben pirso tari umatamot, sur mot in tasmani lena, ka sio pas tu niraro anunu.” Ra o Iesu i pirso, di sa mar tari namin narus ra a loklokono unin lorino, ma in pepol na malu. O Pailat i watungi tandet lena, “Mot tama a musano ri!” Ra a kum lamlabino tene etabor torom o God, ma a kum tene tamtamabat tagun a rumu na etabor det tama o Iesu, det kukukuk lena, “Sak wati unin nanai kutus! Sak wati unin nanai kutus!” Ra o Pailat i watungi tandet lena, “Mot in ben pasi, sur mot ut, mot in sak wati unin nanai kutus. Iau ka sio pas tu niraro anunu.” A kum te Juda det balu i lena, “Anumet a warkurai i lenri, din um doko i, uni i watungi lena i a Nutun o God.”
+O Pailat i longoro a wasiso ri, ra i ngara doko. I ruk melet usa urumu, ra i ting o Iesu lena, “Ui tagai ui?” Ikut o Iesu ke balu i. 10 O Pailat i watungi tano lena, “Sur asau ra ko balu iau? Ko tasmani lena, a utur ukai a warkurai sur an ulangolango ui, o an sak wat ui unin nanai kutus?” 11  +O Iesu i balu o Pailat lena, “Ra gunuk o God ken pitar tar a warkurai tam, kalako dekdekim sur un pam tu utna un iau. I mo ra o naro ra i pitar tar iau torom ui sur un warkurai iau, anun a sakino i labo taun anum a sakino.”
12  +O Iesu i watung len tari ra, ra o Pailat i lari sur in ulangolango ru i. Ikut a kum te Juda det kukukuk toromi lena, “Ra un palos ru i, ka mur pasano nama Sisa! Uni taio ra i ulabo pasi lena i a king, i lakai a warkurai anun a Sisa.” 13 O Pailat i longoro a kum wasiso ri, ra i ben pirso pas o Iesu unago upiso. Numur o Pailat i kis taru una kiskis na warkurai, kura una dino ra di watungi o Gabata una wasiso Ibru. A kukuraino i lena, di ubek bat a piso nama kum watat. 14 Ra in matanas i sa kis lekeleke, o Pailat i watungi tan a taro Juda lena, “Mot tama i, anumot a king ri.” A utna ri, i wanpat una bung na waninar, a bung numugu tan a labino bung na lotu na Wanlakai. 15 A taro Juda det kukukuk dekdek lena, “Sak doko i! Sak doko i! Sak wati unin nanai kutus!” O Pailat i ting det lena, “Mot nemi sur an sak wat anumot a king unin nanai kutus?” A kum lamlabino tene etabor torom o God det balu i lena, “A Sisa sot kut i anumet a king!” 16 Ra o Pailat i pitar tar o Iesu torom a kum tene inaim, sur det in sak wati unin nanai kutus. Ra det ben ru pas o Iesu.
Di sak wat o Iesu unin nanai kutus
(Mt 27:32-44; Mk 15:21-32; Lk 23:26-43)
17 O Iesu i pirso gusun a tamon Jerusalem, i los pas anun in nanai kutus ra i wan sur a nubual ra di watungi nama “Nubual na Lor na Minat,” ma una wasiso Ibru di watungi lena o Golgota. 18 Tiro iai, di sak wat tari unin nanai kutus. Ma di sak wat aru musano kai tomo nami, una ru paporino, ma o Iesu i kete potor tander. 19 Ma o Pailat i pitar a wasiso sur din tumus a tumtumus, sur din ubeki sapat netes unin nanai kutus. A tumtumus ra i lena:
O IESU A TE NASARET, A KING ANUN A TARO JUDA.
20 A susut na taro Juda det luk a tumtumus ri, uni a nubual ra di sak wat o Iesu unin nanai kutus iai, i milau kut o Jerusalem, ma di tumus a tumtumus ri una tulu ngas na wasiso, a wasiso Ibru, Latin ma Grik. 21 A kum lamlabino tene etabor torom o God det watungi tan o Pailat lena, “Gong u tumusi lena, ‘A King anun a taro Juda.’ Un tumusi kut lena, ‘A musano ri i watungi lena i a king anun a taro Juda.’ ” 22 O Pailat i balu det lena, “A tumtumus ra a sa tumus tari in lenutra.”
23 Ra a kum tene inaim det sa sak wat tar o Iesu unin nanai kutus, det los pas anun a kum malu ra i rakup bat anun a ememar nami, ma det isuaro pasi una a wat na tinibo, arara tene inaim anun ara tinibo. Det los pasi kai anun in namalu ra i pipisi. In namalu ra, katu sunusuk uni, in teken kudulano malu kut. 24 A kum tene inaim det wasiso etetalai torom det lena, “Gong dat rarosi, dat in pilai laki sur osi na pasandat in losi.” Det pami lenra sur din pam sot pas a wasiso na Buk Tabu. I watungi lena,
“Det isuaro anung a kum malu un det,
ma det pilai laki suri.” Sng 22:18
Iri a kum utna ra a kum tene inaim det pami.
25  +O nan o Iesu i tur milau nisan in nanai kutus anun o Iesu. I tur tomo nama tisino a ino, ma o Maria kai a ino anun o Klopas, ma o Maria Magdalen. 26  +O Iesu i tama o nano det tur tomo nam ara nat na ususer ra o Iesu i ser nem doko i, ra i watungi tan o nano lena, “Nang, o naro ra i, a nutumlik.” 27 I watungi kai tan a nat na ususer ra lena, “I ra i, o nam.” Turpasi ut una bung ra, a nat na ususer ra, i ben pas o nan o Iesu, sur in kis una nun a rumu.
O Iesu i mat
(Mt 27:45-56; Mk 15:33-41; Lk 23:44-49)
28  +O Iesu i tasmani lena i sa pam rop ru tar a kum pinapam, ra i watungi lena, “A muruk.” I watungi lenri sur in pam sot pas a wasiso ra di sa tumus tari una Buk Tabu. 29  +In teken nokoto na wain ra i mititir kura i tiro. Det los pas ara utna ra i ser dop a polo, ra det puk pasi una wain ra. Det ubek pasi unin nanai ra di watungi namin isop, ra det tulsu toto i usapat sur a wan o Iesu. 30 Ra o Iesu i sa dop pas a wain ra, i watungi lena, “I sa rop.” I lukun pirso in lorino, ra i ubek ru anun a nilaun.
Di so a paporin o Iesu
31  +A kum te Juda det saring o Pailat sur din sak pakpak tar a kum kikindetul, sur detul in mat lakit, ma din los pirso ru a pinindetul gusun a tulin nanai kutus, uni a bung ra, i a bung na waninar, a bung numugu tan ara labino Bung na Sabat, ma ka det nemi sur a pinindetul in kete una tulin nanai kutus una Bung na Sabat. 32 I mo ra a kum tene inaim det wan, ma det sak pakpak aru kikin a mugano musano, ra numur ara pasander bulung, ra di sak wat tomo detul nam o Iesu una tulin nanai kutus. 33 Ikut, ra det wanpat torom o Iesu, det tama i lena i sa mat, ra ka det sak pakpak aru kikino mo. 34 Ikut ara tene inaim i so a paporin o Iesu nama bele, ra a gap ma a danim i sal pirso mut.
35  +A musano ra i tama a kum utna ri, i wasiso uni sur mot kai mot in nurnur. A utna ri i wasiso uni, i lingmulus, ma i ut i tasmani lena i lingmulus. 36  +Di pam a kum utna ri sur din pam sot pas a wasiso ra di sa tumus tari una Buk Tabu lena, “Ka din sak pakpak tu surino.” Sng 34:20
37  +Di pam sot pas a wasiso na Buk Tabu kai lena, “Det in tama o naro ra det so tari.” Sek 12:10
Di uruk a minatin o Iesu una kulam na minat
(Mt 27:57-61; Mk 15:42-47; Lk 23:50-56)
38 Numur, o Josep a te Arimatia i saring o Pailat sur a minatin o Iesu. I kai ara nat na ususer ra i ser mur eno i kut o Iesu, uni i ngaran a kum te Juda. Ra o Pailat i mulaot tari sur in nan ma in palos pirso pas a minatin o Iesu. 39  +O Nikodimas, i ra numugu i wan torom o Iesu una ara bung na mirum, i kai i wanpat. I los pas ara utna ra i sangnain wakak, ra di pami tagun a mira ma a alo. A maut inder i elar nama tulu noino na kilogrem. 40 Der los pas a minatin o Iesu, numur der ubek a kum utna ra i sangnain wakak uni, ma der pulusi nama kum wakak na malu. A pinapam ra i elar nama ngasino anun a taro Juda, ra det ser pami una kum minat. 41 Ara kinobot kura milau nisan a nubual ra di sak wat o Iesu unin nanai kutus iai. Ara matok na kulam na minat kura tiro, ra ka di inep i utmakai tu minat uni. 42 Det inep tar a minatin o Iesu una kulam na minat ra, uni i milau kut. Det pami lenra uni a bung ra, a bung na waninar, a bung numugu tan a Bung na Sabat anun a taro Juda.
+ 19:2 Lk 23:11 * 19:2 In pepol na malu i tamtama elar nama ememar anun a king. + 19:8 Mt 27:12 + 19:11 Jn 10:18; Ap 2:23; Rom 13:1 + 19:12 Lk 23:2; Ap 17:7 19:12 A Sisa i a labino mugumugu tagun a gapman Rom, ma a taro Israel kai det kis utuntudu ina nun a warkurai. + 19:25 Mt 27:55-56 + 19:26 Jn 13:23 + 19:28 Sng 22:15 + 19:29 Sng 69:21 + 19:31 Lo 21:22-23 + 19:35 Jn 21:24 + 19:36 Kis 12:46; Nam 9:12 + 19:37 Tam 1:7 + 19:39 Jn 3:1-2