17
A sakino petutna
(Mt 18:6-7, 21-22; Mk 9:42)
1 O Iesu i watungi tan anun a taro na ususer lena, “A kum utna in nanpat ut, ra in upuku a taro una sakino, ikut in laulau doko torom o naro ra i pam pat pasi.
2 Gunuk ra di sa kubus tar tu labino wat unin kabarano, ma di sa woro murung tari usa utasi, in wakak toromi, sako in ben raro ara tagun a kum nat liklik ri un tu sakino, ra kura numur in los a labino warkurai.
3 “Mot in tumarong mot! Ra o tisimlik i pam a sakino, un wasiso dekdek toromi, ma ra i sa nukpukus, un dumano ru anun a sakino.
4 Ra i pam a sakino torom ui a wonom mawit na dino un ara bung, ma i wan torom ui a wonom mawit na dino ma i watungi tam lena, ‘A sa pam tar a sakino torom ui. Uniri a nukpukus,’ un dumano ru anun a sakino.”
A nurnur
5 A kum aposel det watungi torom a Labino lena, “Un ulabo pas anumet a nurnur.”
6 Ma a Labino i watungi lena, “Ra anumot a nurnur in natino elar namin pitino mastad, mot in pet lar pasi sur mot in watungi tan in nanai ri lena, ‘Un taragot, ma un tur sa utasi,’ in muri kut anumot a wasiso.
A pinapam anun a tultul
7 “Ra taio tagun mot anun a tultul i papam pas tiro ukinobot, o i tamtamabat tar a kum sipsip, ra i wanpat tagisa ubual, pepetlai, un watungi mut tan anum a tultul lena, ‘Un nan urin, un kis ma un nangon’? Awu.
8 Un watungi tano lenri, ‘Un emar pas, un waninar anga utna na inangon, ma un tabor iau, ra an nangon ma an inum. Ra numur ui bulung un nangon ma un inum.’
9 Pepetlai, a mugumugu in watung wakak torom a tultul ra i tarom toromi? Awu, uni anun a pinapam utra.
10 Lenkutkai ra torom mot, ra mot sa pam sot pas a kum utna di pitar tari tamot, mot in watungi lena, ‘Met a kum tultul oros kut, met pami kut anumet a pinapam.’ ”
O Iesu i ulangolango pas a noino lepra
11 Ra o Iesu i wan nanan usapat o Jerusalem, i wan epotor tan aru papor Samaria ma o Galili.
12 I ruk una matansako ina tamon, ma det etorom nama noino musano ra det misait nama lepra. Det tur bakbak taru ut,
13 ma det kakabo dekdek lena, “Iesu, a Labino, un maris met.”
14 Ra o Iesu i tama det, i watungi tandet lena, “Mot in nan, ma mot in ese tar mot torom a kum tene etabor torom o God.” Ra det wan nanan, det langolango mut.
15 Ara tagun det i tama i lena i sa langolango, i milet melet, ma i watung ulabo pas o God namin labino walngano.
16 Ma i kis but keke nisan aru kikin o Iesu ra i watung wakak toromi. A musano ra, a te Samaria.
17 O Iesu i tingi lena, “Pepetlai, ka di ulangolango pas a noino rop? A lisu kai awai det mo?
18 Ilai ra katutaio i milet melet sur in watung ulabo pas o God? Ikut a usirolik ri.”
19 Ra i watungi tano, “Un katutur, ma un nan. Anum a nurnur i sa ulangolango pas ui.”
A inawan pat anun a matanitu anun o God
(Mt 24:23-28, 37-41)
20 A ramano kum Parisi det ting o Iesu lena, “Nangisin a matanitu anun o God in nanpat?” Ra i balu det lena, “A matanitu anun o God ken nanpat nama kum ukinalong ra din tama i.
21 Ma ka din watungi lena, ‘Iri mi!’ o, ‘I mo ra i!’ Uni a matanitu anun o God kura ut un mot.”
22 O Iesu i watungi tan anun a kum nat na ususer lena, “A du bung in nanpat ra mot in nemi sur mot in tama tar a bung tagun a kum bung anun a Nutun a Musano, ikut ka mot in tama i.
23 Lako taro det in watungi tamot lena, ‘Tama i, i mo ra i!’ o, ‘Kuri i nin!’ Gong mot mur tar det.
24 Uni una bung ra a Nutun a Musano in nan pat, a taro rop det in tama i. In elar namin nememe, ra i meme i tagitong un ara papor maino, tuk un ara papor kai.
25 Ikut a Nutun a Musano in taramo mugu a susut na ngunungut, ma a taro tagun uniri det in rosumur gusuni.
26 “A kum bung anun a Nutun a Musano in elar nama kum bung anun o Noa.
27 A taro det wangon, det inum, ma det unolin det, tuk una bung ra o Noa i kas una sip, ra in nabato i puku ma in nolomom i wanpat ma det iru rop.
28 Lenkutkai ra una kum bung anun o Lot. A taro det wangon, ma det inum, det kukul, ma det siuru, det marut utna, ma det pam rumu.
29 Ikut una bung ra o Lot i wan gusun a tamon Sodom, a sungun ma a salfa i puku tagisapat una bakut elar namin nabato, ra det rop det iru uni.
30 “In lenkutkai ra una bung ra a Nutun a Musano in nanpat puaso uni.
31 Una bung ra, ra taio in kis sapat netes una nun a rumu, gong i pirso sur in los pas anun a kum ututna tagisa urumu. Lenkutkai, ra taio in kis sa ukinobot, gong i milet melet unago utamon sur tu utna.
32 Mot in nuk pas a ino anun o Lot.
33 Osi ra i nem doko i sur in maris bat anun a nilaun, in iru. Ikut osi ra ke maris bat anun a nilaun, in laun.
34 A watungi tamot, una bung na mirum ra, ra lako ru der in inep un ara bat, din los pas tu pasander kut, ma ara pasander awu.
35-36 Ra lako ru ino kai der in papam tomo u gino a wit sur in nanpat a palawa, din los pas tu pasander kut, ma ara pasander awu.”
37 Ma a kum nat na ususer det tingi lena, “Labino, a kum utna ri in nanpat awai?” Ra i balu det lena, “A nubual ra a minat i inep uni, a kum kotkot det in nan tomo iai.”