3
O Jon a Tene Baptaiso i warawai
(Mt 3:1-12; Mk 1:1-8; Jn 1:19-28)
Ra i sa noino ma limo na kilalo una warkurai anun o Sisa Taiberius, o Pontias Pailat a labino mugumugu i warkurai sur a papor Judia, ma o Erod i mugumugu una papor Galili, ma a tisino o Pilip i mugumugu una aru papor Ituria ma o Trakonitis, ma o Lisanias i mugumugu una papor Abilene ma o Anas ma o Kaiapas der los a pinapam na mugumugu na tene etabor torom o God. Una kilalo ra, a wasiso anun o God i wanpat torom o Jon, a nutun o Sekaraia ra i kis una nubual kalako taro uni. +Ma i wan una kum nubual rop milau a danim Jodan, i ser warawai lena, a taro det in nukpukus ma din baptaiso det, sur o God in unus ru anundet a kum sakino petutna. Elar nami ra di sa tumus tari una buk anun a poropet Aisaia lena,
“Una nubual kalako taro uni, in nalngan ara i kakabo lena,
‘Mot in waninar a kisapi anun a Labino,
mot in pam kodos anun a kum kisapi.
A kum lala rop din por det
ma a kum du tultul rop ma a kum tangai din kil elaro det.
A kum kisapi ra i kiloklok din ukodos det,
ma a kum nubual i tungtung, din por kodos det.
Ra a taro rop det in tama i ra o God in ulaun a taro.’ ” Ais 40:3-5
+A kunur na taro det wanpat torom o Jon sur in baptaiso det, ra i watungi tandet lena, “Ai, mot a kum nutnutun a kum sui! Osi ra i inanos mot sur mot in kalabor eno gusun a warkurai na minabalu anun o God, ra in nanpat? Iau awu. +Mot in pam a kum utna ra in upuaso i lena mot sa nukpukus. Ma gong mot nuki lena, o God ken warkurai mot uni mot a kabotaro anun o Abaram. A inanos mot lena, o God in pet lari sur in pam pat pas a kabotaro anun o Abaram tagun a kum watat ri. +Di sa ubek tar a nawu nisan a kum kibino duwai, ma a kum duwai rop ra ka det wu lako wakak na windet, din tau ru det, ma din woro tar det una sungun.”
10 A kunur na taro det tingi lena, “Asau ra met in pami?” 11 I balu det lena, “Osi ra anunu lako rin namalu na kelkeles, in pitar tar tino tan taio ra ka tin namalu na ememar anunu, lenkutkai ra una utna na inangon.” 12  +Ma a ramano kum tene los takis det wanpat sur in baptaiso det. Ma det tingi lena, “Tene Ususer, asau ra met in pami?” 13 Ra i balu det lena, “Gong mot los a takis i labo tauni ra di sa kubus tari.” 14 Ma a ramano kum tene inaim det tingi lena, “Ma met, asau ra met in pami?” Ra i balu det lena, “Gong mot los na kankan oros pasi kut a mani gusun a taro, ma gong mot etakun torotoro, mot in gas kut sur a ikul ra din pitari tamot.”
15 A taro det kiskis langlang sur a Karisito in nanpat. Ra det longoro o Jon, det nuki lena kutiro a Karisito mo. 16  +Ra o Jon i watungi tandet rop lena, “Iau, a baptaiso mot nama danim. Ikut o naro ra a dekdekino i labo taun a dekdeking in nanpat. Ka elar sur an palos aru su gusun aru kikino, uni a natino doko tano. In baptaiso mot nama Tokodos na Nion ma a sungun. 17 I pam pas anun a pok nam aru lamano sur in lakro susuaro a pino wit gusun a wino wit*. Numur in ubek tomo anun a wino wit una nun a rumu na wit, ikut in tun ru a kum pinino una sungun ra ke ser mat.” 18 Ra o Jon i warawai torom det nama Wakak na Wasiso i udekdek det nama susut na wasiso sur det in pukus anundet a nilaun.
19  +Ma o Jon i wasiso dekdek torom o Erod a mugumugu, uni i nolin melet nam o Erodias, a ino anun o tisino. Ma i wasiso dekdek una kum sakino utna rop kai ra o Erod i sa pam tari. 20 Ma o Erod i wot melet ara sakino petutna ra i uruk tar o Jon una karabus.
O Jon i baptaiso o Iesu
(Mt 3:13-17; Mk 1:9-11)
21 Ra o Jon i baptaiso a taro rop, i baptaiso i kai o Iesu. Ma una du bung ra i wararing, a langit i papos, 22  +ma a Tokodos na Nion i wan pirso, i ubek pas a pinino lar in natabun ma i kis taru netes un o Iesu. Ma in nalngan ara tagisapat una langit i watungi lena, “Ui a Nutunglik, a nat na wakak, a gas doko nam ui.”
A utatos ina kabotaro anun o Iesu
(Mt 1:1-17)
23  +O Iesu i turpas anun a pinapam ra kutiro i tulu noino kilalo anunu. I a nutun o Josep, a nuknukin a taro kut lenra.
O Josep a nutun o Eli,
24 o Eli a nutun o Matat,
o Matat a nutun o Liwai,
o Liwai a nutun o Melki,
o Melki a nutun o Janai,
o Janai a nutun o Josep,
25 o Josep a nutun o Matatias,
o Matatias a nutun o Amos,
o Amos a nutun o Naum,
o Naum a nutun o Esli,
o Esli a nutun o Nagai,
26 o Nagai a nutun o Mat,
o Mat a nutun o Matatias,
o Matatias a nutun o Semein,
o Semein a nutun o Josek,
o Josek a nutun o Joda,
27 o Joda a nutun o Joanan,
o Joanan a nutun o Resa,
o Resa a nutun o Serubabel,
o Serubabel a nutun o Salatiel,
o Salatiel a nutun o Neri,
28 o Neri a nutun o Melki,
o Melki a nutun o Adi,
o Adi a nutun o Kosam,
o Kosam a nutun o Elmadam,
o Elmadam a nutun o Er,
29 o Er a nutun o Josua,
o Josua a nutun o Eliaser,
o Eliaser a nutun o Jorim,
o Jorim a nutun o Matat,
o Matat a nutun o Liwai,
30 o Liwai a nutun o Simion,
o Simion a nutun o Juda,
o Juda a nutun o Josep,
o Josep a nutun o Jonam,
o Jonam a nutun o Eliakim,
31 o Eliakim a nutun o Melea,
o Melea a nutun o Mena,
o Mena a nutun o Matata,
o Matata a nutun o Natan,
o Natan a nutun o Dewid,
32  +o Dewid a nutun o Jesi,
o Jesi a nutun o Obed,
o Obed a nutun o Boas,
o Boas a nutun o Salmon,
o Salmon a nutun o Nason,
33 o Nason a nutun o Aminadap,
o Aminadap a nutun o Atmin,
o Atmin a nutun o Arni,
o Arni a nutun o Esrom,
o Esrom a nutun o Peres,
o Peres a nutun o Juda,
34 o Juda a nutun o Jekop,
o Jekop a nutun o Aisak,
o Aisak a nutun o Abaram,
o Abaram a nutun o Tera,
o Tera a nutun o Naor,
35 o Naor a nutun o Seruk,
o Seruk a nutun o Reu,
o Reu a nutun o Pelek,
o Pelek a nutun o Eber,
o Eber a nutun o Sela,
36  +o Sela a nutun o Kainan,
o Kainan a nutun o Arpaksat,
o Arpaksat a nutun o Sem,
o Sem a nutun o Noa,
o Noa a nutun o Lamek,
37 o Lamek a nutun o Metusela,
o Metusela a nutun o Enok,
o Enok a nutun o Jaret,
o Jaret a nutun o Malelel,
o Malelel a nutun o Kenan,
38  +o Kenan a nutun o Enos,
o Enos a nutun o Set,
o Set a nutun o Adam,
o Adam a nutun o God.
+ 3:3 Ap 13:24 + 3:7 Mt 12:34; 23:33 + 3:8 Jn 8:33, 39 + 3:9 Mt 7:19 + 3:12 Lk 7:29 + 3:16 Ap 13:25 * 3:17 A ngasino ra di ser lakro ru a pinino wit gusun a wino i lenri: Di woro toto a wit ra a wuwu i wup ru a pinino ra a wino i puku pirso. + 3:19 Mt 14:3-4; Mk 6:17-18 + 3:22 Jn 1:32 + 3:23 Lk 4:22; Jn 6:42 + 3:32 Rut 4:17-22 + 3:36 Stat 11:10-26 + 3:38 Stat 4:25-26