A Wakak na Wasiso un o Iesu Karisito
o Mak
i tumusi
A wasiso talapor mugu
O Mak, ara risano kai o Jon, i tumus a buk ri. I a mugano musano ra i tumtumus una Wakak na Wasiso. O Mak, i awu sur ara tagun a noino ma aru nat na ususer anun o Iesu. A taro det nuki lena, o Mak i los a wasiso un o Iesu gusun o Pita, ra numur i tumusi. O Mak i labo pat sapat o Jerusalem. I kai i tama a kum utna ra o Iesu i pami. Ra dat luk a buk Mak 14:51-52 kutiro i wasiso uni ut.
Numur i wanpat a tene warut anun o Pol ma o Banabas una nunder a pinapam (tama Ap 12:25).
O Mak i tumtumus torom a taro Rom sur det in tasman a Wakak na Wasiso un o Iesu. Una buk ri, i inanos det lena, o Iesu kut ra a dekdekino i labo ma i utur ukai a warkurai. I nemi sur a taro Rom ma dat kai dat in tasmani lena o Iesu a Nutun o God.
O Mak i tumus a susut na utna na ukisin ra o Iesu i pami, ma a kum mamaut ra i taramo i, ikut ke tumus sikot a ramano wasiso na ususer anun o Iesu. Ara utna kai ra o Mak i tumusi, i lenri, o Iesu a dekdekino i labo sakit taun o Satan, ma i a Tene Ulaun anundat.
A tumtumus anun o Mak i tuk taru kut una 16:8. Ma a buk Mak 16:9-20 ara musano gisen ut i tumusi.
A inawan ina buk Mak:
O Iesu i turpas anun a pinapam (1:1-13)
O Iesu i papam tong o Galili (1:14-9:50)
O Iesu i wan usapat o Jerusalem (10:1-52)
A ururop na wik ma a minatin o Iesu (11:1-15:47)
A katkatutur melet anun o Iesu gusun a minat (16:1-20)
1
O Jon a Tene Baptaiso i warawai
(Mt 3:1-12; Lk 3:1-18; Jn 1:19-28)
Iri a Wakak na Wasiso un o Iesu Karisito, a Nutun o God.
+I turpasi elar nama wasiso anun o God ra a poropet Aisaia i sa tumus tari lena,
“Tama i, iau an tulu ru anung a tene los wasiso sur in mugu tam,
i ra in waninar anum a kisapi.
Una nubual kalako taro uni, in nalngan ara i kakabo lena,
‘Mot in waninar a kisapi anun a Labino,
mot in pam kodos anun a kum kisapi.’ ” Ais 40:3
+A musano ra, i o Jon a Tene Baptaiso. I kis una nubual kalako taro uni, ra i ser warawai lena, a taro det in nukpukus ma din baptaiso det, sur o God in unus ru anundet a kum sakino petutna. A taro rop tagisapat o Jerusalem ma tagun a kum tamon rop kai una papor Judia, det wan toromi. Det watung puaso anundet a kum sakino petutna, ra i baptaiso det una danim Jodan. +O Jon i ser emar namin namalu di pami nama iwu na kamel, ma i ser ker wati namin pino bulumakau. I ser wan a kum ko ma a polono tatos. +I ser watungi lena, “O naro ra in mur tang, a dekdekino i labo taun a dekdeking. Ka elar sur an par piso, ma an palos aru su gusun aru kikino, uni a natino doko tano. Iau, a baptaiso mot nama danim, ikut i, in baptaiso mot nama Tokodos na Nion.”
O Jon i baptaiso o Iesu, ra numur o Satan i lari
(Mt 3:13–4:11; Lk 3:21-22; 4:1-13)
Una ara bung, o Iesu i wan tagitong o Nasaret una papor Galili, ra o Jon i baptaiso i tiro una danim Jodan. 10 Uniutra o Iesu i saur gusun a danim, ra i tama a langit i papos, ma a Tokodos na Nion i wan pirso toromi elar namin natabun. 11  +In nalngan ara tagisapat una langit i watungi lena, “Ui a Nutunglik, a nat na wakak, a gas doko nam ui.”
12 Uniutra a Tokodos na Nion i tulu ru o Iesu usa una nubual kalako taro uni, 13  +ra i kis tiro a wat na noino bung, ra o Satan i lari. I kis tomo nama kum kuabor ma a kum ensel det waruti.
O Iesu i kabo pas a wat na musano ra a kum tene woro uben
(Mt 4:12-22; Lk 4:14-15; 5:1-11)
14  +Ra di sa uruk tar o Jon una karabus, o Iesu i wan utiro una papor Galili, i warawai nama Wakak na Wasiso anun o God. 15  +I watungi lena, “A du bung i sa sot, ma a matanitu anun o God i sa milau. Mot in nukpukus, ma mot in nurnur una Wakak na Wasiso.”
16 O Iesu i usal una usalin ina du tasi Galili, ra i tama pas o Saimon dersino nam o Endru. Der woro a uben sa utasi, uni der aru tene woro uben. 17 I watungi tander lena, “Mur in mur iau, sur an ususer mur sur mur aru tene ben taro.” 18 Uniutra der katutur pas gusun anunder a kum uben, ma der muri.
19 I wan lilik melet, ra i tama pasi bulung o Jems dersino nam o Jon, aru nutnutun o Sebedi. Der kis taru una pot ma der mabon anunder a kum uben. 20 Uniutra, o Iesu i kabo der, ma der wan gusun a tamander ma a kum tultul kura una pot, ra der muri.
O Iesu i lakro ru a laulau na nion gusun ara musano
(Lk 4:31-37)
21 Det wan utong o Kapernaum. Ra una Bung na Sabat o Iesu i ruk utiro una rumu na lotu, ma i ususer a taro. 22  +Ra det kisin una nun a kum etowo, uni i ususer det elar nam ara, ra a warkurai kura ut tano. Ke ususer det elar nama kum tene ususer tagun a Warkurai.
23 Uniutra ara musano, a laulau na nion kura uni, i ruk utiro una nundet a rumu na lotu, ma i kakabo lena, 24  +“Iesu, a te Nasaret u ling na pam asau un met? U wanpat sur un ban laulau met? A tasman ui, ui a Tasur na Musano anun o God.” 25 O Iesu i sakbati lena, “Gong u wasiso! Pirso gusun a musano ra!” 26  +Ma a laulau na nion i gunu dekdek tari, ra i kukukuk ma i pirso gusuni.
27 A taro rop det kisin doko, ra det ting etetalai det lena, “Asau ri? A matok na ususer. A musano ri i ususer nama dekdek, ma a warkurai kura ut tano. I ser wasiso tan a kum laulau na nion, ra det ser mur anun a wasiso.” 28  +Ra a wasiso un o Iesu i wan sarara lakit utiro una kum tamon rop una papor Galili.
O Iesu i ulangolango pas a susut na misait
(Mt 8:14-17; Lk 4:38-41)
29 O Iesu tomo nama nun a kum nat na ususer, det pirso gusun a rumu na lotu. Uniutra, det wan tomo nam o Jems ma o Jon ra det wan utiro una rumu anun o Saimon der nam o Endru. 30 Ara ino a inumun o Saimon, i misait nama pinino mararong, kura i inep. Uniutra det inanos o Iesu uni. 31 Ra o Iesu i wan toromi, i pam a lamano, ma i ukatutur pasi, ra a mararong i rop mut gusuni. Numur a ino ra i tabor det mo nama utna na inangon.
32 Ra in matanas i sa sup taru, a taro det ben pat a kum misait rop torom o Iesu, ma det kai ra a kum laulau na nion kura un det. 33 A taro rop tagun a tamon ra, det wanpat ma det bukus una matansako. 34  +Ra i ulangolango a susut ra det misait nama kum wur ngas na misait. I lakro ru a susut na laulau na nion gusun det, ma i turbat a kum laulau na nion sur gong det wasiso, uni det tasmani ut o Iesu.
O Iesu i warawai tiro una papor Galili
(Lk 4:42-44)
35  +Una lar, o Iesu i tuangun ra i pirso. I wan sur a nubual kalako taro uni, ma i wararing tiro iai. 36 O Saimon ma det ra det wan tomo nami, det sisio suri. 37 Ra det sa sio pasi, det inanosi lena, “A taro rop det sisio sur ui.” 38 Ra o Iesu i balu det lena, “Dat in nan gisen bulung utiro un lako kum tamon milau, sur an warawai kai torom det. Uni i a kibino ra a wanpat suri.” 39  +Ra i wan tuptupukus una papor Galili rop. I warawai una nundet a kum rumu na lotu, ma i lakro ru a kum laulau na nion gusun a taro.
O Iesu i ulangolango pas ara lepra
(Mt 8:1-4; Lk 5:12-16)
40 Ara musano, i misait nama lepra, i wan torom o Iesu, ra i kis butkeke, ma i saring dekdeki lena, “Ke ngangitin torom ui. Ra u nemi, un ulangolango pas iau.” 41 O Iesu i maris doko i. I kodos a lamano, ma i pam a pinino ra i watungi tano lena, “A nemi ut, un langolango.” 42 Uniutra, a lepra i rop mut gusuni, ra i langolango melet. 43 Uniutra, o Iesu i tulu ru i, ma i pak dekdek tari lena, 44  +“Gong u inanos tar taio nami. Un nan ma un ese mugu tar ui torom a tene etabor torom o God, ma un pitar a kum etabor torom o God elar nami ra o Moses i sa watung tari, sur un talapor umatan o God. Ra un pami lenra, a taro det in tasmani lena u sa langolango.” 45 Ikut a musano ri, i wan ma i wasiso tuptupukus, ra a wasiso uni, i wan sarara. I mo ra, o Iesu ke wan puaso melet un tu tamon. I wan ra i ser kis tuptupukus mukut tiro una kum nubual kalako taro uni. Ikut a taro tagun a kum tamon det ser wan toromi.
+ 1:2 Mal 3:1 + 1:4 Ap 13:24; 19:4 + 1:6 2 Kin 1:8; Mt 11:8 + 1:7 Ap 13:25 + 1:11 Sng 2:7; Ais 42:1; Mt 12:18; Mk 9:7 + 1:13 Sng 91:11-13 + 1:14 Mk 6:17 + 1:15 Mt 3:2 + 1:22 Mt 7:28-29 + 1:24 Mk 5:7 + 1:26 Mk 9:26 + 1:28 Mt 4:24 + 1:34 Mk 3:10-12 + 1:35 Mt 14:23; Mk 6:46 + 1:39 Mt 4:23; 9:35 + 1:44 Wkp 14:1-32