7
A kum Parisi det muri kut a wasiso anun a taro, ma awu sur a wasiso anun o God
(Mt 15:1-9)
A kum Parisi ma a kum tene ususer tagun a Warkurai ra det wan tagisapat o Jerusalem, det wan tomo torom o Iesu. +Det tama a ramano kum nat na ususer anunu ra det wangon kut nama dur na lamandet, ma ka det gos mugu pas a kum lamandet. A kum Parisi tomo nama taro Juda rop det mur a wasiso anun a taro tagun numugu, lena ka det nangon, ra ka det gos mugu pas a kum lamandet. +Ra det in milet tagitiro una nubual na siuru, det in gos lamandet mugu pas ut, numur det in nangon. Ma a ramano kum etowo kai anun a taro tagun numugu det ser muri, i lenri, det ser gos a kum kap, a kum kuro, ma a kum ketel.
A kum Parisi ma a kum tene ususer tagun a Warkurai det ting o Iesu lena, “Ilai sur anum a kum nat na ususer ka det ser mur a kum etowo anun anundat a taro tagun numugu? Det ser wangon kut nama kum dur na lamandet.” Ra o Iesu i balu det lena, “A wasiso anun o Aisaia i lingmulus ut, ra i wasiso na poropet mugu taru un mot a kum tene torotoro. I tumusi un mot lena,
‘A taro ri det ru iau kut nama wandet,
ikut a balandet i bakbak doko gusun iau.
Det lotu oros kut torom iau,
uni det ususer nama kum warkurai kut anun a taro.’ Ais 29:13
Mot sa wan gusun a kum Warkurai anun o God, ma mot muri mukut a kum etowo anun a taro.”
O Iesu i watungi tan a kum Parisi ma a kum tene ususer tagun a Warkurai lena, “A lingmulus ut, mot sa rosumur gusun a Warkurai anun o God, sur mot in muri kut a kum etowo anun anumot a taro tagun numugu. 10  +Uni o Moses i watungi lena, ‘Un ru o tamam ma o nam,’ Kis 20:12
ra i watungi kai lena, ‘Osi ra in wasiso laulau un o tamano ma o nano, din um doko i.’ Kis 21:17
11 Ikut mot, mot ususer a taro lena, i wakak kut, ra taio in watungi tan o tamano ma o nano lena, ‘Asau ra an warut mur nami, a sa tabor tar o God nami.’ 12 Mot turbati kut sur gong i warut o tamano ma o nano. 13 Ra mot pami lenra, mot unatino pas a wasiso anun o God, ma mot muri kut a kum etowo ra mot los pasi tan anumot a taro tagun numugu. Ma a susut na utna kai lenri ra ke tokodos, mot ser pami.”
A kum utna ra i udur a taro umatan o God
(Mt 15:10-20)
14 O Iesu i kabo melet pas a kunur na taro toromi, ra i watungi tandet lena, “Mot rop mot in longoro iau, ma mot in tasman lele anung a wasiso. 15-16  +Tu utna ra taio in nan pasi ma in ruk unin balano, ken uduri umatan o God. Ikut, a kum utna ra in pirso gusun a nuknukino, i ra in uduri umatan o God.”*
17 O Iesu i wan gusun a kunur na taro, ma i ruk una rumu. Anun a kum nat na ususer det tingi una wasiso elelar ri. 18 Ra i watungi tandet lena, “Pepetlai, mot kai, ka mot talapor utmakai? Pepetlai, ka mot tasmani lena a kum utna rop ra i ruk unin balan taio, ken uduri umatan o God? 19 Uni ke ruk una nuknukino, i ruk pas kut unin balano ra i pirso melet.”
Ra una nun a wasiso ra, i upuaso i lena, a kum utna na inangon rop i wakak. 20 I watungi kai lena, “A utna ra in pirso gusun a nuknukin a taro, i ra in udur det. 21 Iri a kum utna ra i ser wanpat tagun a nuknukin a taro: a kum sakino nuknuk, a kum petutna na pamuk, a wolong, a petutna ra di um doko a taro, a petutna ra di pam a sakino nam tu ino anun taio o nam tu musano anun taio, 22 a nemnem sur a susut na utna, a kum sakino petutna, a kum torotoro, a kum sakino nemnem na pinindi, a nuknuk laulau sur tu utna anun taio, a petutna ra di mang laulau ara, a petutna ra taio i ulabo pasi ut, ma a kum tuptup na petutna. 23 A kum sakino utna rop ri, det wanpat tagun a nuknukin a taro, ma i udur det umatan o God.”
A nurnur anun a ino ra awu sur a ino Juda
(Mt 15:21-28)
24 O Iesu i wan tagitiro, ra i wanpat milau a tamon Tair, ma i ruk un ara rumu. Ke nemi sur taio in tasmani ra kura i, ikut ke pet lar pasi sur gong det tasmani. 25 Ara ino, a nutunu a inolik, a laulau na nion kura uni. I longoro a wasiso un o Iesu, uniutra i wan ra i kis butkeke nisan a kikino. 26 A ino ra, a ino Ponisia tagun a papor Siria, i awu sur a ino Juda. I saring o Iesu sur in lakro ru a laulau na nion gusun o nutunulik. 27 Ra o Iesu i watungi tano lena, “Din tabor masur mugu tar a kum nat. Ke tokodos sur din los a utna ana kum nat, ma din woro i tan a kum pap.” 28 Ra a ino i balu i lena, “Labino, a lingmulus ut ra. Ikut, a kum pap kai det ser wan a kum mumumut na utna nago utuntudu ina kabulu na inangon ana kum nat.” 29 Ra o Iesu i watungi tan a ino ra lena, “Una num a wakak na minabalu, un nan kut. A laulau na nion i sa pirso gusun o nutumlik.” 30 A ino i milet melet, ra i tama o nutunu kura i inep taru una bano. A laulau na nion i sa pirso taru gusuni.
O Iesu i ulangolango pas ara musano ra i kutkut ma i ngat
31 O Iesu i wan gusun a tamon Tair ma i wan sakit o Saidon sur a du tasi Galili, ra i wanpat una papor Dekapolis. 32 Ara taro det ben ara musano i kutkut ma i ngat torom o Iesu, ma det saringi sur in ubek aru lamano netes uni. 33 O Iesu i ben gisen pasi kut gusun a kunur na taro, ra i ubek arin kaskas na lamano una arin talngan a musano ra. I ibis taru ra i pam in karmen a musano. 34 I tatado usapat una langit, i los wuwu pas, ra i watungi tano lena, “Epata!” a kukuraino lena: “Un papos!” 35 Uniutra, in talngano i talapor, ma in karmene i tapalos ra i wasiso pat. 36  +Ra o Iesu i turbat dekdek a taro sur gong det inanos tar taio uni. Ikut ka det longoro i, ma a wasiso uni, i wan sarara kut. 37  +Det ra det longoro a utna ri, det kisin doko uni, ma det watungi lena, “O Iesu i pam wakak pas a kum utna rop. I uwakak pas a kum kutkut sur det in longoro, ma a kum ngat sur det in wasiso!”
+ 7:2 Lk 11:38 + 7:4 Mt 23:25 + 7:10 Lo 5:16 + 7:15-16 Ap 10:14-15 * 7:15-16 Una ramano kum du buk una wasiso Grik, a ramano kum wasiso kai i kis una vers ri. I lenri: Ra taio arin talngano kura, i wakak sur in longoro nami. 7:31 O Dekapolis a kukuraino a noino lamlabino tamon. + 7:36 Mk 1:43-45 + 7:37 Ais 35:5