6
Ra dat mat tomo nam o Karisito, dat in laun kai tomo nami
1 Asau mo dat in watungi? Pepetlai, i wakak kut sur dat in pam a sakino sur a marmaris anun o God in lubung?
2 Awu! Dat mat gusun anundat a sakino petutna. Dat in laun pepetlai melet mo uni?
3 Pepetlai, ka mot tasmani lena, dat rop ra di baptaiso dat un o Karisito Iesu, dat mat tomo nami una baptais ra?
4 Lenra, ra di baptaiso dat, dat mat tomo nami ma di por tomo dat kai nami. O God a Tamandat i ukatutur pas o Karisito gusun a minat nama minamarino, lenkutkai ra dat in laun nama matok na nilaun.
5 Ra dat mat tomo nam o Iesu una nun a minat, i lingmulus dat in katutur tomo nami kai una nun a katkatutur melet gusun a minat.
6 Uni dat tasmani lena, a turai na nilaun anundat i sa mat tomo nam o Karisito unin nanai kutus, sur a sakino petutna una pinindat katu dekdekino. Ma ka dat in tene ititula melet mo anun a sakino petutna.
7 Uni osi ra i mat tomo nam o Karisito, i sa langolango gusun a sakino petutna.
8 Ra dat mat tomo nam o Karisito, dat nurnur lena dat in laun utkai tomo nami.
9 Uni dat sa tasmani lena, ra o Karisito i katutur melet gusun a minat, ken mat melet mo, uni a minat katu dekdekino mo sur in pam ukai i.
10 I mat ara dino kut, sur in rakon rop ru a dekdekin a sakino petutna, ma ken mat melet mo. Ra i laun melet, i laun sur in mur a nemnem anun o God.
11 Lenkutkai ra, mot in nuk pas mot lena mot sa mat gusun anumot a kum sakino petutna, ma mot, ra tagun o Karisito Iesu, mot laun sur mot in mur a nemnem anun o God.
12 I mo ra gong melet mo mot pitar a pinimot, ra i ser mat, sur in kis utuntudu ina dekdekin a sakino petutna, sur mot in mur a kum sakino nemnem ina pinimot.
13 Gong melet mo mot pitar tar tu du pinimot sur in elar nama utna na pinapam sur a pam sakino. Mot in pitar tar mot torom o God, uni mot sa laun melet gusun a minat. Ma mot in pitar tar a kum du pinimot rop torom o God, sur in elar nama kum utna na pinapam sur a tokodos na pinapam.
14 Ka mot in kis melet mo utuntudu ina dekdekin a sakino petutna, uni ka mot kis mo utuntudu ina kum Warkurai. Uniri mot sa kis utuntudu ina marmaris anun o God.
Dat a kum tene ititula anun a tokodos na petutna
15 Ka dat kis mo utuntudu ina kum Warkurai, dat kis utuntudu ina marmaris anun o God. Pepetlai, dat in pam melet a sakino petutna? Awu ut!
16 Pepetlai, ka mot tasmani lena, ra mot pitar tar mot torom taio sur mot in longoro i, mot a kum tene ititula anunu? Ra mot a kum tene ititula anun a sakino petutna, in pitar a minat torom mot. Ikut, ra mot a kum tene ititula anun o God ma mot ser longoro i, mot tokodos umatano.
17 A watung wakak torom o God, uni numugu mot a kum tene ititula anun a sakino petutna, ikut uniri mot mur a kum etowo nama balamot rop. A kum etowo ra di pitar tari tamot.
18 Di sa ulangolango pas mot gusun a sakino petutna, ma uniri mot a kum tene ititula mo anun a tokodos na petutna.
19 A wasiso nama kum wasiso elelar ri torom mot, uni a nuknuki mot ke talapor wakak una utna ra a wasiso uni. Numugu mot pitar tar a kum du pinimot sur in tene ititula anun a kum dur na petutna, ma anumot a kum sakino i lubung ma i labo. Ikut uniri, mot in pitar tar a kum du pinimot sur in tene ititula anun a tokodos na petutna, sur anumot a nilaun, anun o God.
20 Numugu, ra mot tene ititula anun a sakino petutna, ka mot kis utuntudu ina dekdekin a tokodos na petutna.
21 Numugu mot ser pam a kum sakino petutna, ra uniri mot maimai uni. Ra mot pami, i warut mot pepetlai? I ben mot kut sur a minat.
22 Ikut uniri di sa ulangolango pas mot gusun a sakino petutna, ma mot tene ititula mukut anun o God. A win a ngas na nilaun ra, i ben mot sur mot in talapor, ma katu dur un mot, ra o God in pitar a nilaun tukum torom mot.
23 Uni a kunukul ina sakino petutna, a minat. Ikut a etabor, ra o God i pitar orosi kut, i a nilaun tukum. A nilaun ra dat losi, kibino una pinapam anun o Karisito Iesu anundat a Labino.