19
Det watung ulabo pas o God sapat netes una langit
1 Numur tan a kum utna ri, a longoro a labino ugaia elar nama walngan ara labino kunur na taro sapat netes una langit, det kukukuk lena,
“Aleluia!
Anundat a God i sa ulaun pas dat, ma a minamar ma a dekdek anunu kut,
2 uni anun a kum warkurai i lingmulus ma i tokodos.
I sa warkurai tar a pamuk na ino ra a risano i rereng una nun a sakino petutna,
i ra i ban laulau a rakrakon bual nama nun a kum pamuk na petutna.
O God i sa pitar tar a warkurai na minabalu toromi,
i kibino una gapin anun a kum tultul,
ra i um doko ru det.”
3 Ma det kukukuk melet lena,
“Aleluia!
In nimis ina ino ra i wan tito usapat netes ken rop ma ken rop.”
4 A ru noino ma a wat na mugumugu ma a wat na utna ra det laun det puku pirso nama urur, ma det lotu torom o God, i ra i kis una nun a kiskis na king ma det watungi lena,
“Amen, Aleluia!”
5 Ra in nalngan ara i wanpat tagun a kiskis na king, i watungi lenri,
“Mot in watung ulabo pas anundat a God,
mot anun a kum tultul,
a kum lamlabino ma mot ra ka di ulabo pas mot,
mot ra mot ser urur toromi!”
6 Ma a longoro a ugaia ra i elar nama walngan ara labino kunur na taro, a wungu ina danim, ra i noro, ma a pungpugur, i kukukuk lena,
“Aleluia!
Uni anundat a Labino o God,
ra i dekdek sakit, i kis na king.
7 Dat in gas,
ma dat in watung ulabo pasi!
Uni a bung na unolin anun a Barman na Sipsip i sa wanpat,
ma nun a ino i sa waninar.
8 Di sa pitar tar in wakak na malu, tan a ino sur in emar nami.
In namalu ra i matok ma i talapor.”
In wakak na malu ra, i tur ukinalong a kum tokodos na pinapam anun a taro anun o God.
9 Numur a ensel i watungi tang lena, “Un tumusi lenri: Det ra di sa inanos tar det sur a lukaro na unolin anun a Barman na Sipsip, det dan!” Ma i watungi kai lena, “A kum wasiso ri a kum lingmulus na wasiso ut anun o God.”
10 Numur, a puku pirso nama urur nisan a ru kikino sur an lotu toromi. Ikut i watungi tang lena, “Gong! Iau kai, a tultul kut elar nam ui ma a kum tistisim ra det pam ukai a wasiso puaso anun o Iesu. Un lotu torom o God! Uni a wasiso puaso anun o Iesu, i ut ra i ukatutur a taro sur det in wasiso na poropet.”
O naro ra i kas una kabang na os
11 A tama a langit i sa papos ma a tama a kabang na os i tur sa numugu tang. Ma i ra i kis netes uni di watungi lena, “I ser pam sot anun a pinapam” ma “I lingmulus.” Ma una nun a warkurai ma anun a inaim i mur a tokodos na petutna.
12 Arin nikiok na matano i elar namin kunabor ina sungun, ma a susut na kukup na king i kis unin lorino. Ma di tumus tar a rising uni, ra kataio i tasmani, i sot kut i tasmani.
13 I emar namin namalu ra di umurungi una gap. Ma a risano, “A Wasiso anun o God.”
14 A kunur na taro na inaim tagisapat una langit det kas una kum kabang na os ma det muri. Det emar nama kum wakak na malu ra i matok ma i kabang.
15 Ma in totok na inaim ra i wangon doko, kura uwano i gom pasi, sur in ban laulau a taro tagun a kum gapman rop nami, ma in warkurai dekdek det namin nubuku na aen. I pas ginogino a kum wino wain unin nutung na wat ra i tur ukinalong a karangop ina kankan anun o God, i ra i dekdek sakit.
16 Ma una nun in namalu ma una balangot na kikino di sa tumus tar a risano lenri,
A KING ANUN A KUM KING MA A LABINO ANUN A KUM LAMLABINO.
17 Numur a tama ara ensel i tur taru unin matanas, ma i kakabo namin labino walngano torom a kum piko rop ra det ro una maino lena, “Mot ro urin, mot in nan tomo una labino lukaro anun o God.
18 Ma mot in nan a komonong ina kum king, a kum mugumugu anun a taro na inaim, a kum taro na inaim, a kum os ma det kai ra det kas un det, ma a komonong ina taro rop, a kum tene ititula ma det ra awu sur a kum tene ititula, a kum lamlabino ma det ra ka di ulabo pas det.”
19 Numur a tama a kuabor na wewegua ma a kum king tagun a rakrakon bual, ma anundet a kum kunur na taro na inaim ra det wan tomo, sur det in waim nam o naro ra i kas una os tomo nama nun a kunur na taro na inaim.
20 Ikut di pam sikot pas a kuabor na wewegua tomo nama torotoro na poropet, i ra i pam a kum utna na ukisin una risan a kuabor na wewegua. Ra i pam a kum utna na ukisin ra, i toro pas det ra a ukinalong anun a kuabor na wewegua kura un det, ma det lotu torom a malalar ina kuabor na wewegua. Di woro lalaun tar a torotoro na poropet ma a kuabor na wewegua unin labino tung na sungun, ra i wangon nama salfa.
21 Di um doko ru anunder a kunur na taro na inaim namin totok na inaim, ra o naro ra i kas una os i gom pasi. Ma a kum piko rop det wan a komonongin det ma det masur doko nami.